John 8

Viro evohu jigito puvua

1Eto Iesu na tiri javo Olives ta pambuto evinu 2iho vujenu egerembeto temple ta pambunu embomeni amita degi puvuo arumbeto ahe poekihinu 3enana ke pepeni kiari embopo te Pharisee embomeni te aingeto evohu vahai avo tiha unu kito humbuto embo tapa ta tihi ta embo tapa kiora ikeo hetenu 4Iesu ta degi ke einge ea, “Ahe Poekari Embo, evohu erevi tiha oi kito haekehera 5eto Moses ta ke pepeni ta amo koro na tiha evohu taro pehaja ena te hotembari no avo ejo ingore.” ainge ea 6amita be amo Iesu ta degi popoja ke asi humbuto puvua. Rate Iesu na aruse eto veto ingeni na enda ta ahari ue mihinu 7embomeni na eto ingari ke kaiketo ijio Iesu na hange ambu eto ke einge ena, “Ungo embo puveva amo embo vahai amuna ari sapura irae embo amina karu humbuto kihi taisuja.” 8ke ainge eto tihi hu ta eto enda ta ahari unu. 9Embomeni na ingito sisiketo embo evovo amina oenga pahunu eto embo nei nei amo vahai pamba uo evohu oenga Iesu ga heteto mihinu 10Iesu na hange ambu eto evohu amita degi ke einge ena, “Pamone, embo daingere, eto embo vahai amuna umo pehumba aerete? 11Aravora, te nane umo mane pehumba asona te umo pambuto no ari sapura toto irari javotoho na irijo,” ainge Iesu na ena.

Iesu amo enda ta usasa ra

12Eto Iesu na embomeni ta degi ihiketo ke einge ena, “Na enda ta usasara. Eto embo amuna na ambo ambo aisuja embo amo mume ta isa mane aisuja te vasiri daroho ta usasa amo amita degi iresuja.” ainge enu 13Pharisee embomeni na ingito ke mine einge ea, “No harika ari embo irae umo oenga erea amo ke be mane asora.” Ainge eo 14Iesu na ke einge ena, “Ari nau avo na oenga harikihena amo ke be ra. Na puvurari degi eto na pambari degi amo na kiarira te na puvurari degi eto pambari degi amo ungo kiaera. 15Eto ari javotoho davore sapura davore amo ungota enda ta ari avo ungo embo na eagova nanena embo kogue embo emo sapurara eto embo emo javotohora ainge mane eagona 16te ke aisona amo ke be na pere aisona amita be amo na ikari embo amo namote mihia amina ijioi eagona. 17Eto ungota ke pepeni ta kajari mihia amo eto embo heriso na jo vahai eto ke vahai aisora amo ke be ra. 18Avoeto ke nau erena amo na ikari Embo Mama nau amiga ke emo erena avoeto dago heriso na ke emo harikihera.” Iesu na ainge enu, 19Pharisee embomeni na, “Mamo no davore?” ainge ena, “Ungona na kiae ere ova ainge Mama nau ungo kiae ere ova te ungona na kiaeheva ainge Mama nau amo ungo kiaeheva.” Ke ainge ena amo 20temple jo ta God ta hande ikari degi ai ta ke emo ena. Amo Iesu ta iji puvurae avoeto andito umbae toa.

Judea embomeni na Iesu ke be ae ea embopo amita degi Iesu na ke ena.

21Eto Iesu na ke nei einge ena, “Eto na pambasona amo ungona na jombure ue ungota ari sasapura avoeto ungo pehasova. Eto na pambasona ai ta ungo pambari inono ae aisova.” Ainge enu 22Judea embomeni na ke mine ara eto einge ea, “Na pambasona ai ta ungo mane pambasova ainge eria amo umo oenga teto pehasi ereite?” ainge eo, 23Iesu na einge ena, “Ungo enda embopora eto na uhu embo ra. Eto ungo enda erevi tohora te na enda emita toho manera. 24Eto na ungota degi ke mahu ehene ingeva amo ungota ari sasapura avoeto pehasova. Eto kivu, na amunure avo ke erena amo ungo ingito ke be ae ere ova amo ungota ari sasapura avoeto pehasova” ainge Iesu na enu, 25“Umo amunure?” ke ainge eo Iesu na ke mine einge ena, “mahu kihi ungota degi ijiena amo namora. 26Eto na ungo embo ke isapamane ahena eto ungota ari sasapura isapamane harikaehena te na ikari Embo amita ke amo ke be perera avoeto amita ke avo nau degi ta enu ingia avo enda embo ta degi hande ere ona.” ainge ena amo 27Iesu na amita Mamo God avo ke ena te embomeni na ingae uo, 28Iesu na ke einge ena, “Eto kiari amo nau mane rate nau Mama ta kiari nau degi ta ikena avo ungota degi hande eagona avo eto Embo ta Meni i ta tavo mihirou ungona na amunure ke eagona avo kito ke be aisova. 29Eto na iji tapa na ikari Embo ta uje tapa avo eagona avoeto na egikae namote tapa mihia.” Ke ainge 30ijinu embo isapamane na Iesu ta ke avo ingito ke be ea.

Judea embomeni ta Ohihi Abraham

31Eto Judea embomeni Iesu ke be ea amita degi Iesu na ke einge ena, “Eto ungo ke nau avo be jigesova amo ambotani nau be ururovo 32nau ke be avo ano ingihirovo ke be amina ungo ari sasapura na andirari avo vujekasuja” Ainge enu 33ingito ke mine einge ea, “Dago ta Ohihi Abraham ta degi eto puvurari eto embo nei na dago pundurae mihovora erevira te umo do eto dago vujekasi ke ere?” ainge eo, 34Iesu na ke einge ena, “Na ungota degi ke be erena, Embo amuna ari sapura aisuja amo ari sapura na pundurari avoeto ari sapura ta pure ari embora. 35Eto pure ari embo na bande ta daroho mane iresuja te meni be amina bande ta iresuja. 36Eto ungo ari sasapura na pundurari avoeto God ta Meni na ungo vujekaehija amo ungo na jeneambueto daroho iraeheva. 37Eto ungo Abraham ta meniundi amo na kiari rate ungota ohihi Abraham hotembae ue ke tapa do erena avo ungota jo ta horae avoeto na taisi ere ova. 38Rate namo avo nau Mama ta degi do kiagona avo ke hande ere ona te ungo avo kogue ambo ambo ere ova.” ainge Iesu na enu, 39embomeni na, “Dago ta Mama Abraham ra.” ainge eo, Iesu na, “Ungo Abraham ta meniundi kito amo Abraham na ena ainge dombo aheva. 40Amo na God ta ke be avo ingihe ungota degi erena te ungona na taisi ere ova te Abraham na ari ainge amo ae ra. 41Rate ungo eagova amo ungota mama na eaguja vahai avo eagova.” ainge Iesu na enu embomeni na ingito ke mine einge ea, “Dago suhita ari na ingae rate dagota mama amo God eto dago amita meniundi ra.” ainge eo. 42Iesu na ke einge ena, “Eto God amo ungota Mamo kito amo na osa aheva amo na God ta degi puvuto mihena amo uje nau na puvurae rate na amina ikenu puvua, 43te ke erena emo ungo ingito mana mana ue ingari inono ae avoeto ere ova. 44Te ungota mamo amo Satan avoeto amita pure avo asi uje ere ova amo iji kihi ta amo embo tari embo eto embo amita ke be irae ke sokova avo pere iraguja. Avoeto embo amo ke sokova ta mamora eto embo amo ke ijie amo amita jo ta hotembari ke sokova avo puvaguja. 45Rate nanena ke be eagona avoeto ungona na ke be ae eagova. 46Te ungo embo vahai na nau ari sapura vahai do eagone kiagove avo harikevu ingone. Eto na iji tapa ke be pere eagona te ungo do eto na ke be ae eagove? 47Eto God ta Meni na God ta ke ingaguja te ungo God ta ke ingae eagova amo ungo God ta meniundi mane avoeto.” Ainge Iesu na enu.

Iesu te Abraham te amita ke

48Judea embomeni na ke mine einge ea, “Dago kogora amo umo enda Samaria embo ahihi sapura na jo ta horari avoeto erea.” ainge eo 49Iesu na ke einge ena, “Na ahihi sapura na horae rate na nau Mama Otohu eagona te ungona na otohu ae ere ova. 50Amo nanena ae rate embo ta ari siriketo hajire ikari Embo amina javo nau otohu ara uje ere ua avoeto hajire amina ikasuja. 51Eto ungota degi ke be erena, embo amuna ke nau ingito agi aisuja embo amina mane pehasuja.” ainge enu, 52Judea embomeni na ingito ke einge ea, “Eto umo ahihi sapura na horari ke erera amo ke be perera. 53Eto Abraham pehena eto peroveta tapa pepehekea te inena ‘embo amuna ke nau agi aisuja amo mane pehasuja,’ ke ainge erea amo dagota mama Abraham te peroveta tapa pepehekea amo inena dembari rete? Eto umo embo amunurami ke ere?” ainge eo 54Iesu na ke mine einge ena, “Eto na oenga peni asi ahena amo ke be mane aehija te Mama nau ungo na ‘Dagota God ra’ ainge eagova amina au embo peni aisona. 55Te, ungo amo God kiae ere ova te nanena God kiagona. Eto nanena God kiae ke ahena amo ungo ainge ke sokova embo ahena te na God kogue ke amita tapa avo ingihe agi eagona. 56Eto ungota mamo Abraham na na puvuresona avo hotembu hotembu ue tunga javotoho ena.” ainge Iesu na enu, 57Judea embomeni na ke einge ea, “Eto no humbari jua amo 50 mane rate Abraham inena kiari ke erea,” ainge eo 58Iesu na, “Na ungota degi ke be erena, eto Abraham e na ingae pekota amo nanena mihahena,” ainge ena. 59Eto Judea embomeni na ingito Iesu tasi koro siriketo humbuho Iesu na kito kiae ojikari na temple toto pambuna.

Sélection en cours:

John 8: OKVH

Surbrillance

Copier