John 5

Iesu na Umo ireremba javo Bethzatha ai ta embo vahai enu kojena.

1Eto amita ambota Judea ta pondo iji nei Iesu na da Jerusalem ta aumihe pambuna. 2Eto da Jerusalem ai ta o ‘sheep’ ta horari huga pe amita engihi ta embo ta umo ireremba amo Judea ta ke na Bethzatha ke eagora amo arara tapa 5 amina umo amo joekari 3eto popora embo tihi vahaikari eto utu ihirari eto ingeni meni pehari amina arara ai ta mihie umo simba ere uahera. 4Avo God ta Anera na veto umo enu vasiri unu popora embo vahai amina kihi umo ai ta sorueto veto kuheto kojena 5eto embo vahai ai hereketo mihina amita ambure umbuna amita jua tapa 38 6avo Iesu na amita ambure iji koso mihahija avo kito, “Umo kojasi uje ere oete?” Ainge enu, embo amina ke mine einge ena, 7“Embo, na humbuto umo ta ikari embo irae avoeto umo ta pahuore embo nei na na seriketo umo ta veaguja,” ainge enu, 8Iesu na einge ena, “Umo ereto no evari besi humbuto pambu.” ainge enu 9embo amina kojeto amita evari besi humbuto pambuna. Rate jangu indari iji te ari erevi ena, 10avoeto Judea embomeni na embo kojena amita degi ke einge ea, “Umo jangu indari iji te no evari besi humbuto ere pahoa amo ke pepeni ere poekihea,” ainge eo, 11embo amina ke mine einge ena, “Ke be rate na ehei kojehena embo amina ehei evari besi humbuto ere pambuhona,” ainge enu, 12enana na, “Embo amuna ehei humbuto ere pambuhoe?” ainge ijio, 13Iesu na embo isapamane ta orohuta pahunu popora embo kojena amo kiae ena. 14Eto ambota Iesu na popora embo kojena avo temple jo ta kito ke einge ena, “Umo kojehea te no ari sapura tapa avo tojo. Eto no ari sasapura tapa toae amo hajire ngahia be no degi ta puvuresuja,” ainge enu, 15embo amina egerembeto pambuto Judea embomeni ta degi, “Na Iesu na ehei kojehena,” ainge ena.

16Eto Iesu na jangu indari iji te ari neite neite ena avo eto Judea embomeni na Iesu ta degi pambuto ke ngahia eo, 17Iesu na ke mine einge ena, “Nau Mama na iji tapa pure eaguja avoeto na ainge ereona.” ainge enu, 18Judea embomeni na jangu indari iji te ke pepeni poekena avo pere mane rate Iesu na God amo amita Mamo eto Mamo ga inono ke ena avoeto daingeto taro pehasuja avo degi jombure ea.

Iesu amo God ta Meni bera

19Eto Iesu na enana ta pehumba ta ke mine avo einge ena, “Na ungota degi ke be erena, Meni na oenga mane eaguja te Mamo na do eaguja avo Meni na kito eaguja avoeto Mamo na do eaguja amo Meni te tapa eaguja. 20Eto Mamo na Meni osa ue amita ari tapa amo eoi kiaguja. Eto au Meni na vasiri sovera te aisuja amo ari eha ere ona eingeko mane avo ungo na kito haha puha aisova. 21Amita be amo embo pepehekari Mama na au vasiri te erasora ainge dombo meni na amita uje na siriketo au vasiri te erasora 22eto Mamo na embo ta ari sasapura siriketo hajire mane ikaguja te embomeni na God Mamo amo Otohu ke eagora ainge dombo God ta Meni Otohu ke ara God na eoi Meni na ari sasapura ta hajire siriketo ikaguja. 23Rate embo amina Meni otohu ae eagora ainge dombo Meni ikari Mamo avo otohu ae eagora.

24Eto na ungota degi ke be erena. Embo amuna nau ke ingito na ikari embo avo ke be ijie humota ere ua amo irari daroho mahu humbuto iresuja amo pehari ta eto ereto amita ari sasapura ta hajire mane kesuja te tiumbehei vasiri te daroho mihia.

25Eto ungota degi ke be erena, iji puvija amo mahu puvija amo embo pepehekari na God Meni ta ke avo ingito be ingesora amo vasiri te erasora 26amita be amo Mamo amo vasiri ta susu avoeto Meni amo ehei vasiri ta susu ere ua. 27Eto amo Embo ta Meni avoeto ehei ari sirikari ta embo peni ehija. 28Eto ungo ke erevi ingihe jopapa mane aisova te embo pehari na Embo amita ke ingihe use toto ereto 29ari jajavotoho embomeni na vasiri te daroho iresora te ari sasapura embo avo hajire ikau kesora.

Iesu ta ari harika ari Embora

30Rate na oenga ari inono aera te ari erevi daingeto sirikasona avo eoi ingito eagona te nau uje na mane eagona te na ikari embo ta uje avo pere eagona avoeto embo ta ari sirikasona amo ke be na pere aisona.

31Eto ari nau deire avo na oenga harikasona amo ke be mane ra. 32Te ari nau harika ari Embo nei mihia amina harikasuja eto na kogona amo Embo amita harikari amo ke be ra. 33Eto ungo na John ta ke ingora ikeheve pambuto amita ke avo be pere ingihera. 34Rate embo na na orekari ta ke avo ae rate ungo God na orekasuja amita ke avo erena. 35Eto John amo ungota kerivo ijimbeto usasa ikari embo avoeto ungo usasa iji isapa kito tunga javotoho eagova 36te ke nau amo peni John ta ke amo isapa ra. Nau Mama na nane pure ana ikena avo ururono embomeni na kesora avoeto na ikari Embo amo nau Mama avo embo na be kesora. 37Eto nei amo nau Mama, na ikari Embo, amina na amunure avo ungota degi eoi mane ingagova eto amita ke avo ungo ingagova te amita hamo avo do aingere amo ungo kiae ra. 38Eto God na amita Meni ikehei puvija avo ungo ke be ae avoeto amita ke avo ungota jo ta irari uje aera.

39Eto ungo God ta ke kajari avo iji tapa eheketo kogue vasiri daroho ai ta humbasi eagova te God ta ke kajari amina na amunure avo harikaguja, 40rate ungo vasiri daroho humbasi nau degi ta puvurae eagova. 41Na embo peni ke ijie ungo na na osa ana ke aera 42eto na ungota jo amo na kogona ungo God osa ae embopora. 43Eto na nau Mama ta javota puvena te ungo na na pekaera eto embo nei na tohota javo ta puvuraehija amo ungo na pekaeheva.

44Eto God vahai amina ungo javotoho retemo sapura re avo ere kogua te amo ungo be hotembae ue embo nei na ungo jakeka ara uje isapamane eagova avoeto ungo daingeto God ke be avo. 45Ungo nane God Mamo ta tombu ta pehumba eagona mane hotembasova te ungota embo vahai Moses avo ungo humota eagova embo amina ungo Mamo ta tihi ta pehumba aisuja. 46Eto Moses na ke kajena amo namo avoembo kajena te ungo Moses humota ue namo te tapa humota aheva 47rate ungo Moses ta ke kajari avo ke be ae eagova avoeto ke nau ungo daingeto ke be avo?” ke ainge Iesu na oje kahena.

Sélection en cours:

John 5: OKVH

Surbrillance

Copier