John 12

Iesu ta hamo ta Mary na oil mune te amina kuhena

(Matthew 26:6-13; Mark 14:3-9)

1Eto Jarukari pondo ari ta iji 6 irae ae mihinu Iesu na da Bethany ta puvuto embo Lazarus pehenu enu vasiri te erena 2amita bande ta indari indesi pambuo Martha na indari ikenu Iesu te Lazarus te eto umoro embo nenei te aingeto gaga ta arumbeto indie mihio 3Mary na oil javo ‘Nard’ higi isapa amita mine amo pajire bera te amina humbuto Iesu ta utu ta overeketo kuheto amita siro hu na tuhenu bande jo amo mune na ohugara unu 4ambotani tapa 12 rate ambotani vahai javo Judas Iscariot Iesu jenge indesuja embo amina ke einge ena, 5“Oil mune te emo koro pajire be ombuto koro humbuto donda ambu embopo ta ikahera avo teho aijaja ere ua,” 6ke ainge ena amo donda ambu embopo amo be hotembae rate ambotani ta koro tapa avo amina simba aja ke eo koro goru simba ue iji hekeri ta pegene humbaguja avoeto ena. 7Iesu na embo amita degi ke einge ena, “Aravorate to, na pehano kovasora amo oil mune te emina hamo nau jigesuja avoeto simba ere ua, 8te donda ambu embopo amo iji koso ungote iresora te na ungote iji koso mane iresona,” ke ainge Iesu na ena.

Priests Pepeni na Lazarus tasi sirikea

9Eto Judea embomeni isapamane Iesu ta duru ingito kesi pambua amo Iesu pere mane rate embo Lazarus pehenu Iesu na enu vasiri te erena amite tapa kesi pambuto 10-11Lazarus kito Judea ta ari avo toto Iesu ke be ijio priests pepeni na ke avo ingito Lazarus te tapa taro pehaja ke ea.

Eto Keriso na da Jerusalem ta pambuna

(Matthew 21:1-11; Mark 11:1-11; Luke 19:28-40)

12Eto iho nei embomeni pondo ta puvua amina Iesu Jerusalem ta puvutuhunu duru ingito 13koropa iki kahumbeto humbuto Iesu hambasi degi ta pahue ke jajage eto einge ea, “Hosanna, Israel embo ta ‘King’ Bada ta javota puvuto ere hua. Javotoho ari amita degi iroi.” ainge ijie puvutohuo 14Iesu na o ‘Donkey’ meni hambuto humbuto o hamo ta arumbeto pambuna amita ke avo God ta ke mahu kajari ai ta einge mihia, 15“Israel embomeni ungo joru avojo ungo ta ‘King’ o ‘Donkey’ meni ta hamo ta arumbeto puvuto ere hua.” Ke ainge mihia 16amo iji amikote Iesu ta ambotani na hotembae rate Iesu vasiri te ereto uhu usasa ta pahunu amita ambotani na God ta ke mahu kajari amite Israel embomeni na pekea amite avo hotembeto ke be ea. 17Ainge eto degi ta pahue Lazarus Iesu na jage enu use ta eto erenu kia embomeni amina embo tapa ta degi ke hande eo ingihe degi ta pambua. 18Eto hajire avo Iesu na enu embo isapamane na duru ingito Iesu kesi degi ta puvua 19eto Pharisee embomeni na kogue ke einge ea, “Kivu, ari emo haekari inono aera te enda embomeni tapa na embo emita ambota ere orovikihera.”

Enda Greek embopo na Iesu jombure ea

20Eto God jakeka ari embo nenei pondo ta pambua amo enda Greek embopo 21amina pambuto embo Philip amo enda Galilee amita da Bethsaida embo amita degi ke einge ea, “Dago Iesu kesi uje ere ora,” ainge eo 22Philip na pambuto Andrew eto amiga pambuto Iesu ta degi eo ingito 23Iesu na ke mine einge ena, “Embo ta Meni na amita Usasa ta horasuja iji puvija erevira, 24na ungota degi ke be erena. Eto ‘wheat’ ve vahai enda ta veto mane pehasuja amo ve vahai aisuja te enda ta veto pehasuja amo be isapamane aisuja. 25Eto embo amuna enda ta ari amita uje ue iresuja amita vasiri amo veto pambau irae aisuja eto embo nei amuna enda ta ari avo uje ae aisuja amo amita vasiri amo daroho iresuja. 26Eto embo amuna ke nau agi ue amo na ambo ambo aisuja. Eto na dainge iragona ai ta nau agi ari embo te tapa iresuja. Eto embo amuna ke nau agi aisuja embo amo nau Mama na otohu aisuja.

Iesu amburesuja avo ke ena

27Rate eha oroho nau jo ta osaga ere kogona te na ke do ano? ‘Mama, nau iji puvija erevi peiketo na hondate e’ ainge anote, ke ainge mane aisona te ari erevi asi puvua avoeto ari emita iji puvija erevira avoeto 28Mama, javo no avo ejo peni ai.” ainge ijinu uhu i ta ke einge puvuna, “Javo nau avo ijione peni ereouva avo ehako ano peni aisuja.” ke ainge puvutuhunu, 29embomeni areto mihia amina ingito ke einge ea, “Uhu ta tururu eria” ainge ijio embo nei na, “Uhu ta Anera na ke eria,” ainge eo 30Iesu na ke einge ena, “Ke puvuto ere hua amo namo avoembo ae rate ungo avoembo eria. 31Eto enda ta ari tapa do aingere amo God na mahu siriketo hajire ikasi ere ua eto enda ta tihi jigari embo amo God na ohimbau pambasuja. 32Eto namo avo jigoro vivihe embo tapa amo nau degi ta puvuresora,” 33ke ainge Iesu na ena amo ahe ivo do eto taisora avo harikena. Eto ke ainge Iesu na enu 34embomeni ai ta mihia amina ingito ke einge ea, “Dago Moses na ke kajena avo eheketo kiora amo Keriso puvuresuja amo nangote daroho iresuja ke avo eheketo kiora te inena Embo ta Meni jigoro vihito pehasuja ainge erea amo Embo ta Meni mo davore?” ainge eo, 35Iesu na ke mine einge ena, “Usasa amo ungote iji isapa mihima irae aisuja 36te usasa mihia emikote ungo isa evujo eto isa ari embo na mume sihukasuja amo sio pambasuja avoeto usasa ungota degi irirou usasa ke be ijie usasa ta meniundi evujo,” ke ainge Iesu na eto embomeni kiae toto pambuto ojikena.

Embomeni na Iesu ke be ae ea

37Eto Iesu na ari neite neite ena amo Judea embomeni na kia te ke be ae ea 38amita ke avo Peroveta Isaiah na mahu einge kajena, “Bada, dagota ke mo embo amuna ingito ke be erei? Eto God ta sovera neite neite mo embo amuna kito ke be erei?” Ke ainge amo mahu kajari mihia. 39Eto embomeni na ke avo ingito ke be ari haite mane avo God na enu Isaiah na ke einge kajena, 40“Eto embomeni nau degi ta puvuore eagone kojagora avo tihi ano tahimbau mane kesora eto embo ta jo ano ngahia au mane hotembasora,” ke ainge kajena 41amo Isaiah na Iesu ta usasa kogue Iesu avoembo kajena. 42Eto Judea ta embo pepeni nenei amo Iesu ke be ea amo Pharisee embomeni na kahekeore oenga iragona joru ue ojikari na Iesu ke be ea. 43Amo God na embomeni avo osa aisuja amo hotembae ue embomeni na kito osa ara uje ea.

Iesu ta ke na iji kombu te embo pehumba aisuja

44Eto Iesu na embomeni tapa ingora ke peni vahai be eto einge ena, “Eto embo amuna na ke be eaguja amo na pere mane rate na ikari Embo amite tapa ke be eaguja, 45eto embo amuna na kiaguja amo na ikari Embo amite tapa kiaguja 46eto na usasa avo puvuto enda ta mihirono embo amuna na ke be ijie mume ta mane iresuja 47eto na enda ta pehumba asi puvurae rate enda oreketo humbasi puvena avoeto embo amuna ke nau agi ae aisuja amo nanena mane pehumba aisona te 48na uje ae ue ke nau agi ae ere ora embopo amita pehumba ari embo mihia amo ke nau tapa erevona amina iji kombu te pehumba aisuja 49eto ke amita be amo erevira. Ke nau amo nau degi ta puvurae rate nau Mama na ikari Embo amina ana ijioi eagona 50eto na kogona amo amita ke ikari ai ta amo vasiri daroho mihia avoeto nau Mama na ke do nau degi ta eaguja avo pere eagona,” ainge Iesu na ena.

Sélection en cours:

John 12: OKVH

Surbrillance

Copier