मत्ती 22
22
ब्याह रै धामा रा दृष्टान्त
(लूका 14.15-24)
1तेऊकी यीशु दृष्टान्ता में त्यावे बोलदअ लागअ, 2स्वर्गा रा राज्य तेऊ राजा रे बराबर साहा, जासू आपणे शोहरू रे ब्याहा में धाम दीनी। 3होर तेऊ धामा में शादी दे लोका बै ईहणे बे आपणे दास भेजी कि; पर त्या छांदे रे लोका ईणा नांई चाहदे थी। 4तेऊकी तेऊ होर दास यह आज्ञा देई करे भेजू, भोजा रे छांदे रे लोका वे बोल हेरा, माई धाम तैयार डाउदा करी, मेरे बड़े-बड़े बाकरे होर पालीं दे पशु काटी दे साह, होर सब कुछ तैयार करुदअ साह; ब्याहा रे धामा वे ईच्छा। 5पराऊणे राजे रै छांदे शूणी करे भी नांई शूणू, कोई आपणे खेचा बै, कोई आपणे ब्यपारा बै नाठे। 6होर लोका जोह बचीदे थी तेऊरे दास ढाकी करे त्यारा अनादर करू होर त्या मारी पाई। 7तेबा राजे रोष आउआ, होर तेऊ आपणी सेना भेजी करे त्यारी हत्या करन आल़े रा नाश करू, होर त्यारा ग्रां ज़ाल़ी पाऊ। 8तेबा तेऊ आपणे नोकरा वै बोलू, ब्याहा रा धाम त्यार साहा पर छांदे रे लोका एता लायक नांई आऊए। 9एतकी तणी तमे चुराह में नाहाँ होर जेतरे लोका तमा भेटले, सभी ब्याहा रे धामा में शादा। 10तेबा त्याह नोकर सड़का में नाहीं करे कैह बुरे कैह भले, जेतरे लोका भेटे, सभे कठे करी होर ब्याहा रअ घर पराऊणे संघे भरू।
11जेबा राजा पराऊणे हेरदअ मीतर आउअ, तेबा तेऊ तखे एक मणश हेरू, जूणी ब्याहा रे झिकड़े बान्हीं दे नांई थी। 12तेऊ तेऊका पुछु, हे दोस्त; तूह ब्याहा रे झिकड़े बानी बिना अखे किबे आउअ? तेऊरअ मुँह बन्द होऊ। 13तेबा राजे सेबका बे बोलू, एउरे हाथ ज़ाघा बान्हीं करे तेऊ बागे न्याहरे में पाआ, तखे लेरना होर दांद पिशणा हुणा। 14किबेकि शादीदे तअ बहू साहा पर चुनीदे थोड़े साहा।
कैसरा बे कर दींणा
(मरकुस 12.13-17; लूका 20.20-26)
15तेबा फरीसी नाहीं करे आपु में न्याय करू कि यीशु कासु साबे गला में फसाए। 16पर त्याहे आपणे चेले हेरोदिया संघे यीशु सेटा यह बोलणे बे भेजी, हे गुरु, हामे गल्ला जाणा कि तूह सचअ साहा, होर परमेश्वरा रे रास्ते में सचाई संघे सिखाउंदा, होर कासी री पर्बाह नांई करदअ, किबेकी तूह मणशा रे मुँह हेरी करे गला नांई करदअ। 17एतकी तणी हामा बे खोज़ कि तूह कैह सोचा? कैसरा बे कर दींणा कानूना रे सावे ठीक साहा कि नांई? 18यीशु त्यारी दुष्टता जाणी करे बोलू, हे कपटियो, महा किबे परेखा? 19करा रअ सिक्क महा बे रिहा। तेबा त्याहे तेऊ सेटा एक दीनारा रअ सिकअ आणु। 20तेऊ त्याका पुछु, यह मूर्ति होर ना कासका साहा? 21त्याहे तेऊबै बोलू, कैसरा रा। तेबा तेऊ तयाबे बोलू, जोह कैसरा रा साहा, सह कैसरा बे; होर जोह परमेश्वर रा साहा, तेऊ परमेश्वरा बे देआ। 22यह शुणी करे त्या परेशान होई, होर तेऊ छाडी करे नाठे।
पुनरुत्थान होर ब्याहा
(मरकुस 12.18-27; लूका 20.27-40)
23तेसी धियाड़ी सदूकी जोह बोला, की मुएँदे रा पुनरुत्थान साहा ही नांई, तेऊ सेटा आउए होर तेऊका पुछु, 24हे गुरु, मूसा बोलू, कि अगर कोई मणश बिना शोहरूये मरे, तेबा तेऊरअ भाई तेऊरी बेटड़ी संघे ब्याहा करी करे आपणे भाई बे बंश पैदा करे। 25एबा माहरे अखे भी सात भाई थी; पहिलअ ब्याहा करी करे मुअं होर शोहरू नांई हूँणे री बजा का आपणी बेटड़ी आपणे भाई बे छाडी। 26एउ साबे दूजे होर चिउणे भी ऐडा करू, होर सात तणी यहे ही होऊ। 27सभी का बाद सह बेटड़ी भी मुईं। 28पर पुनरुत्थाना बाद सह त्या साता मे का कासकी बेटड़ी हूँणी? किबेकि सह सभी री बेटड़ी होई छेकी थी। 29यीशु तयाबे उतर दिंना, तमे पवित्र शास्त्रा होर परमेश्वर री सामर्थ्य नांई ज़ाणदे; एसा बजा का भ्रमा में पड़ी दे साहा। 30किबेकि पुनरुत्थान होई करे नाहंत्या ब्याहा करना होर नाहं त्या ब्याहा में दींणे पर स्वर्गा में परमेश्वरा रे दूता रे बराबर हूँणे। 31पर पुनरुत्थान हूँणे रे बारे में कैह यह बचन नांई पढू जोह परमेश्वरे तमाबे बोलू: 32हाऊं अब्राहमा रअ परमेश्वर, होर इसहाका रअ परमेश्वर, होर याकूबा रअ परमेश्वर साहा? सह मुएँ दे रअ नांई, पर जिऊंदे रअ परमेश्वर साहा। 33यह शुणी करे लोका तेऊरे उपदेशा का परेशान होई।
सभी का बड़ी आज्ञा
34जेबा फरीसी यह शुणु कि यीशु सदूकी रअ मुँह बन्द करू, तेबा त्या कठे होई। 35त्याह मेंज़ा का एक व्यवस्थापक शास्त्री यीशु परेखणे री तणी पुछु, 36हे गुरु, व्यवस्था में कूंण जेही आज्ञा बड़ी साहा? 37यीशु तेऊबै बोलू, तूह परमेश्वर आपणे परमेश्वरा का आपणे सारे मना होर आपणे सारे प्राण होर आपणी सारी बुद्धि संघे प्रेम डाह। 38बड़ी होर मुख्य आज्ञा तअ यह साहा। 39होर तेसी रे बराबर यह दूजी भी साहा कि तूह आपणे पड़ोसी संघे आपु बराबर प्रेम डाह। 40या ही दुई आज्ञा सारी व्यवस्था होर भविष्यद्वक्ता रा आधार साहा।
मसीह कासकअ शोहरू साहा
(मरकुस 12.35-37; लूका 20.41-44)
41जेबा फरीसी कठे थी, तेबा यीशु त्याका पुछु, 42मसीहा रे बारे में तमे कैह सोचा? सह कासकअ शोहरू साहा? त्या तेऊबै बोलू, दाऊदा रअ। 43तेऊ त्याका पुछू, दाऊद आत्मा में होई करे तेऊबै परमेश्वर किबे बोला? 44परमेश्वरे, मेरे परमेश्वरा बै बोलू, महा धुरा फेरे बैश, जेबरे तणी कि हाऊं तेरे बईरी तेरी ज़ाघा थंईं ना करे। 45भला, जेबा दाऊदा तेऊवै परमेश्वर बोला, तेबा सह तेऊरअ शोहरू केहड़ होऊ? 46एतके उतरा में कोई भी एक गल नांई बोली सकू। तेसा धयाडी का कासी भी तेऊका पूछणे रा सहास नांई होऊ।
Sélection en cours:
मत्ती 22: ISJNT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
