यूहन्ना 3
3
यीशु होर निकुदेमुस
1फरीसी में निकुदेमुस ना रअ एक मणश, जोह यहूदी रअ सरदार थी। 2तेऊए राची यीशु सेटा इछी करे तेऊबै बोलू, हे गुरु, हामे जाणा कि तूह परमेश्वरा री तरफा का गुरु होई करे आउअद, किबेकि कोहे भी याह चिन्हा जोह तूह रिहाई सका। 3यीशु तेऊबै उतर दिना, हाऊं ताहब सच-सच बोला, अगर कोई नऊंऐं सिरे का नांई जन्मे तेबा परमेश्वरा रे राज्य नांई हेरी सकतअ। 4निकुदेमुस तेऊबै बोलू, मणश जेबा बूढलअ होऊ, तेबा केहड़े जन्म लई सका? कैह सह आपणी आमा बे गर्भा में दूज़ी बारी नाहीं करे जन्म लई सका? 5यीशु उतर दिना, हाऊं ताहबे सच-सच बोला, जेबरे तणी कोई भी मणश पाणी होर आत्मा का नांई जन्मे तेबा परमेश्वरा रे राज्य में नाहीं नांई सकतअ। 6किबेकि जोह शरीरा का जमुदअ, सह शरीर साहा; जोह आत्मा का जमुदअ, सह आत्मा साहा। 7हेरान नांई होए कि मांई ताहब बोलू, ताहा नउंऐ सिरे का जन्म लउंणा जरूरी साहा दा। 8बागुर ज़ेसी चाहंदा तेसी ही चला होर तूह तेसकी छेहढ शूणा, पर यह नांई ज़ाणदअ कि यह कंदा का ईहदा होर कंधा बे नाहंदा? जोह कोई आत्मा का जमुदअ साहा ऐडा ही साहा दा। 9निकुदेमुस तेऊबै उतर दिंना, या गला कैहडे होई सका? 10यह शूणी करे यीशु तेऊबै बोलू, तूह इस्राएली रअ गुरु हुणे का बाद भी तूह याह गला नांई समझदअ? 11हाऊं ताहब सच-सच बोला कि हामे जोह जाणा तेता बोला, होर जोह हामे हेरू तेतकी गुआही दींदा, होर तमें महारी गुआही ग्रहण नांई करदे। 12जेबा मांई तांई संघे धरती री गला करी होर तमें बुशाह नांई करदे, अगर हाऊं तांई संघे स्वर्गा री गला खोज़े बुशाह तेबा केहडा बुशाह करणा? 13कोहे सरगा पेंदे नांई चढु, सीधी सह जोह स्वर्गा का उतरु, मतलब मणशा रे शोहरू जोह स्वर्गे साहा। 14होर जासू रीति संघे मूसा बूणे सर्प उछटे में चडाऊ, तेसी रीति संघे जरूरी साहा कि मणशा रअ शोहरू भी उछटे में चडाऊ लोडी; 15कि जोह कोहे भी तेऊ पैंदे बुशाह करे तेऊ अनन्त जीबन पाऊंणा।
16किबेकि परमेश्वरे संसारा में ऐडा प्रेम डाहू कि तेऊ आपण एके शोहरू भी दींनअ, कि जोह कोई भी तेऊ पेंदे बुशाह करे सह नष्ट नांई होए पर अनन्त जीबन पाए। 17परमेश्वरे आपणे शोहरू संसारा में एतकि तणी नांई भेजु कि ज़गता पेंदे न्याया री आज्ञा दे, पर एतकि तणी कि जगत तेऊरे साबे उद्धार पाए। 18जोह तेऊ पेंदे बुशाह करा, तेऊ पेंदे दण्डा री आज्ञा नांई हुँदी पर जोह तेऊ पेंदे बुशाह नांई करदअ, सह दोषी ठहेरू; एतकि तणी कि तेऊ परमेश्वरा रे शोहरू रे ना पेंदे बुशाह नांई करू। 19होर दण्डा री आज्ञा रा कारण यह साहा कि ज्योति संसारा में आई, होर मणशे निहारा ज्योति का बहू प्यारा समझु किबे त्यारे काम बुरे थी। 20किबेकि जोह कोई बुराई करा, सह ज्योति संघे बैर डाहंदा होर ज्योति नेड नांई ईनदी , ऐडा नांई होए कि तेऊरे कामा में दोष लाए। 21पर जोह सत्य पेंदे चला, सह ज्योति नेड ईधाआ, कि तेऊरे काम प्रकट हो कि त्याहे परमेश्वरा री तरफा का करी दे हो।
यीशु रे बारे यूहन्ना री गुआही
22ऐता बाद यीशु होर तेऊरे चेले यहूदी देशा में आउए; होर सह तखे त्याह संघे रही करे बपतिस्मा दींदअ लागअ। 23यूहन्ना भी सलीमा रे नेड ऐनोना में बपतिस्मा दींदा थी, किबेकि तखे बहू पाणी, होर लोका तखे इच्छी करे बपतिस्मा लऊंदा थी, 24यूहन्ना तेऊ वक्ते तणी जेलखाने में नांई पाऊ। 25तखे यूहन्ना रे चेले रा कासु यहूदी संघे शुद्ध हूणे रे बारे में बाद-बिबाद होउ। 26होर त्याहे यूहन्ना सेटा इच्छी करे तेऊबै बोलू, हे गुरु, जोह मणश यरदना नइ रे पाहर तांई संघे थी, होर जासू की तांई गुआही दिंनी; हेरू, सह बपतिस्मा दींदा, होर सबे तेऊ सेटा इंधा। 27यूहन्ना उतर दिना, जेबरे तणी मणशा बे स्वर्गा का नांई दिना, तेबरे तणी सह किछे नांई पाई सकतअ। 28तमें तअ मेरे ही गुआही साहादे कि मांई बोलू, हाऊं मसीह नांई, पर तेऊ ज़ैहं भेजुदअ। 29जासकी लाड़ी साहा, सह लाडअ साहा; पर लाडे रअ मित्र जोह खड़अ होऊ तेऊरी शूणा, लाडे रे शब्दा का बहू खुश हुँदा, ऐबा मेरी यह खुशी पूरी होई। 30जरूरी साहा कि सह बढ़े होर हाऊं घटे।
31जोह उज्हे का ईन्धा सह सर्बोतम साहा; जोह धरती का ईंहंधा सह धरती रे साहा, होर सह धरती री ही गला बोला, जोह स्वर्गा का ईहंदा, सह सभी का उज्हे साहा। 32जोह कुछ तेऊ हेरू होर शुणु, तेरी गुआही दींदा; होर तेऊरी गुआही ग्रहण नांई करदअ। 33जूणी तेऊरी गुआही ग्रहण करी तेऊ ऐसा गला री मोहर लाई कि परमेश्वर सचअ साहा। 34किबेकि जोह परमेश्वरे भेजुदअ, साहा परमेश्वर री गला करा; किबेकि सह आत्मा नापी-नापी करे नांई दींदा। 35बापू शोहरू संघे प्यार डाहंदा, होर तेऊए सारी चीज़ा तेऊरे हाथे दींनी दी। 36जोह शोहरू पेंदे बुशाह करा, अनन्त जीबन तेऊरा साहा; पर जोह शोहरू री नांई मनदअ तेऊ जीबन नांई हेरणा, पर परमेश्वर रा रोश तेऊ पेंदे रहंदा।
Sélection en cours:
यूहन्ना 3: ISJNT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
