Málikɔ 12
12
Yéso aɔtɔmiaga mɛní á ɓagubi ɓájeɗe
(Ɔna phɔtɔ Mat 21.33-46; Lók 20.9-19)
1Mbusa á wa, Yéso áokpanga yɔnga na ɓɔ ka mɛní. Aǒgea: «Nkpa moci ɗákoni ciko á Mujabíbu, áogáa ú, áotongea okanga ka kama á mbuka í na kɛndɛa iɓo í. Áɔphɛka ngbángbá#12.1 Ka matú ndɔ, Ɓayúda ɗáɓáɔphɛka ngbángbá k'égo kusi í ɓáɔphɛka etae. ka mɓondigi ciko#Ɔna Isa 5.1-2. Aǒbisa ɓabɛɗanigi, áɔmɛa tamba.
2Cɔ, ka mbenɔ á ɗungu, áonteka mbɛɗanigi moci gea, ɓabɛɗanigi ka ciko ɓántekisiɛ keɓu ínɛkɛ. 3Ɓabɛɗanigi ka ciko ɓâ gǎkɛ ondunga mbɛɗanigi ndɔ, ɓáɔmɓɛta, ɓáonjisa njaga jǎi. 4Mpɔ, â goto onteka mbɛɗanigi ɓaangbo. Ɓabɛɗanigi ka ciko ɓâ gǎkɛ ɔmɓɛta ka mɔ̌, na kusa akɛ na soni. 5Mɛna-ciko â goto onteka ɓaangbo. Mmbɔ, ɓáommowa. Ɓondɔ unge ɓâ phɔtɔ ǒgeea ɓateki ɓunɛngbo ɓásii. Ɗáɓáɔ̌ɓɛta ka ɓɔ, na ɓá phɔtɔ ǒma ɓunɛngbo.
6Cɔ, mɛna-ciko â tɔ ojiga na nkpa moci ande miki-mǒko nɛkɛ ékondi. Ka sungiaga, áonteka kuɓî ɓáɔ. ‹Ɗátúoúba te, ɓámɓángande.› 7Ɓabɛɗanigi ka ciko ɓámɔni ye, ɓáɔyɔngaga sɔsɔɓɛ aɓɔ te: ‹Cɔ, mɛna-ɓotukɔ aámbé. Ɓémmowɛni ka gea, ciko ndɔ áɓɛ nɛsu.› 8Mpɔ, ɓáondunga miki ndɔ, ɓáommowa, ɓáomaka mǒnda akɛ bǎ á ciko.» 9Cɔ, nenoúsi ɓe: Mɛna-ciko ndɔ, ageande ɓo? Kábikɛku ǒma ɓabɛɗanigi ka ciko ndɔ, áɔbɛɗa ciko, áǒɓopha ɓabɛɗanigi ɓunɛngbo? 10Ande gea te, ɓókótangimbɛ mɔnɔ suɓi á Ɓuku á Mokonga nyɔngɔ nde ɓáɗundu gea:
«Etae nde ɓaphɛki ɗáɓáyé ka mɔphɛkɔ,
aunge a ye tɔ etae á kantíti ka mɔphɛkɔ.
11Mɔkɔta sasakɛ aámbé agi ndɔ,
Kema kau, ande ketangaɔ k'íso asu.#Ɔna Jab 118.22-23»
12Wandɔ, ɓakɔta á Ɓayúda, ɓáokaɓa aphe á dunga á Yéso. Nga, ɗáɓáúbi gea te, mɛní ndɔ Yéso ayɔngi ka phɔaɓɔ. Ɓî ɗáɓátú gǎkɛ ǒɓánga ɓakpa, ɓáonkámba, ɓáoga.
Mophani Kaisáa kema nɛkɛ, ɓómophɛ phɔtɔ Mokonga kema ínɛkɛ
(Ɔna phɔtɔ Mat 22.15-22; Lók 20.20-26)
13Ɓáǒteka ka Ɓaphaisáyɔ na ka ɓakpa ndea Moamɛ Ɛlɔ́dɛ kuɓî Yéso aɔ, ka gea ɓánkongoɛ ka ɓoabi nɛkɛ. 14Ɓondɔ unge ɓáombikia, ɓáomúsia: «Ngoisigi, ɓeoúba gea, onde nto á ɗoni, kóomɓánga nkpa. Kó phɔtɔ oenga keongi á ɓakpa. O ndiu ǒphangiaga ɓakpa, nyɔngɔ á ɗoni ndea Mokonga. Cɔ, ósongoɗea: Aánjá ka ɓesu phenda á manjanja ka Moamɛ Kaisáa? Ɓéphendɛ? Ɓékephendɛmbɛ?» 15Yéso â gǎkɛ oúba maibe nɛɓɔ, áǒúsia te: «Ɓoomotombaga ka ɓo? Cɔ, bikani kani na ka imɔna á ngɔa moci nɛ́ɛnjiɛ.» 16Ɓáombikia ně. Mpɔ, áǒúsia: «Cɔ, keongi, na ina nde ɓáɗundu wani ande á ani?» Ɓáonsikisia: «Ande á Moamɛ Kaisáa.» 17Yéso â gǎkɛ ǒsikisia: «Mophani Kaisáa kema nɛkɛ, ɓómophɛ phɔtɔ Mokonga kema ínɛkɛ.» Ɓáɔ́ki ye ɓó, ɓáotangaaga.
Ɓasadukáyɔ ɓáomúsia Yéso nyɔngɔ á jujúka á ɓasí ka kukuwa
(Ɔna phɔtɔ Mat 22.23-33; Lók 20.27-40)
18Ka Ɓasadukáyɔ ɓáobika mɔtɛ á Yéso. Ɓasadukáyɔ ɓánde ka Ɓayúda nde ɗáɓátú ɔphɛa gea, ɓasí ɓákájujúkaeka ka kukuwa#Ɔna Eku 23.8. Kaɓondɔ, ɓáomúsia Yéso te: 19«Ngoisigi, Mósa ɗáɗundu ka phɔasu ɓe: Aoɓá nku n'ankambi nke kángá miki, mɔtɔ akɛ ángiiɛ nke ndɔ ka gea, ámonjeɛ mokenji á phomi akɛ ɓaniki. 20Cɔ, nkpa moci ɗɛ́ɓɔkɔti ɓaganda ngianjaga iɓɛ (7). Phomi aɓɔ áomuka nke, áokuwa kángá á onja. 21Phaphata akɛ áongiia nke ndɔ. Yɛ phɔtɔ, áokuwa kángá á onja. Mmbé ɓa ko ɓasaɔ â phɔtɔ okuwa ɓó. 22Ɓaganda ndɔ ɓɔbu ngianjaga iɓɛ (7) ɓáosía, ɓákánkambɛ ka ɓaniki. Mbusa á ɓɔbu, nke ndɔ â phɔtɔ okuwa. 23Cɔ, esa á jujúka á ɓasí ka kukuwa, ani sɔsɔɓɛ aɓɔ aɓande munya-nke ndɔ? Nga, ɓɔbu ngianjaga iɓɛ (7) ɗáɓámukí tɔ nke ndɔ.»
24Yéso áǒsikisia te: «Ɓoódemaga sasanu nga, ɓókóoúba nyɔngɔ nde ɓáɗundu suɓi á Ɓuku á Mokonga, ɓókó phɔtɔ oúba ɓukpɛkɛ nɛkɛ. 25Mbenɔ nde ɓasí ɓájujukaeka ka kukuwa, ɓǒko ɓákáeɓukɛku ye ɓake na ɓake ɓákáɔmanɛku ye nga, ɓɔbu ɓáɓande ɓea ɓamalaéka. 26Ka nyɔngɔ á jujúka á ɓasí ka kukuwa, ɓókótangimbɛ mɔnɔ suɓi á ɓuku ndea Mósa nyɔngɔ nde Mokonga ɗáyɔngi ka esasa á me nde ɗátúosiɗa? Mokonga ɗákántɔ̌mi Mósa gea te: ‹Nende Mokonga nde ɓa Abalaámu, Mokonga nde ɓa Isáka na Mokonga nde ɓa Yakɔ́ɓɔ#Ɔna Jua 3.2,6.› 27Cɔ, Mokonga, nna Mokonga á ɓakpa nde ɓáku, a ndiu Mokonga á ɓunde ɓáoenda. Ɓenu gǎkɛ, ɓoɓúngigi phɛɛ ka ɓɔphɛi nɛnu.»
Ɛɔphi sina nde aangbóngbó?
(Ɔna phɔtɔ Mat 22.34-40; Lók 10.25-28)
28Nɗundu-ɛɔphi moci aɔ́ki ye yɔngaga nde Yéso ɗátú na Ɓasadukáyɔ kau, áoɗigimisa gea, yɛ ayɔngi ánjá. Kaɓondɔ, â phɔtɔ omúsia gea te: «Ngoisigi, ɛɔphi sina nde anyɛ́nyi nɛngbo bui?» 29Yéso áonsikisia te: «Ɛɔphi ángbóngbó phɛɛ a ɓe: Ɔ́ka phɔ́, Isilaɛ́li, Mɔkɔta nɛsu Mokonga a tɔ Mɔkɔta mo. 30Cɔ, nkonda Mɔkɔta nɛkɔ Mokonga na měma akɔ bui, na mosenda akɔ bui, na úbapha akɔ bui, na ɓukpɛkpɛ nɛkɔ bui#Ɔna Tɔl 6.4. 31Ɛɔphi á ko iɓɛ aungee: Nkonda dakɔ, ɓíndɔ ǒkondi sasakɔ#Ɔna Ɓlw 19.18. Ɛɔphi nɛngbo nna ye ɓei gǔ índɔ.»
32Nkpa ndɔ áonsikisia te: «Ngoisigi, ɔyɔngi ánjá phɛɛ. Ande ɗoni. Mokonga a tɔ mo. Nna na dakɛ#Ɔna Tɔl 4.35. 33Ande gea te, nkonda Mokonga ka měma akɔ bui, na úbapha akɔ bui, na ɓukpɛkpɛ nɛkɔ bui, phɔtɔ nkonda dakɔ ɓea oɓɛ sasakɔ, ɛɔphi ndɔ anyɛ́nyi etéte bui ɔ́phɛɔ á ɓanyama.» 34Yéso aɔni ye kɔɓɔɔngɛ nde ɗátú suɓi á ɓoabi ndea nɗundu-ɛɔphi ndɔ, áongoɗea: «Kó ɗanga na koɓoamɛ ndea Mokonga.» Mbusa á wa, ka ɓakpa ɗákákengi ye úsia akɛ.
Masíya na Daúdi
(Ɔna phɔtɔ Mat 22.41-46; Lók 20.41-44)
35Mbenɔ nde Yéso ɗátú ɔphɛa k'éndu á Mokonga, áǒngoɗea ɓakpa te: «Nyɔngɔ sina nde ɓaɗundu-ɛɔphi ɓáogea te, Kiísito ande mosuko á Daúdi? 36Nga, Daúdi sasakɛ, Měma á kanga ɓojeɗe ɗánteki áyɔngɛ ɓe:
Mɔkɔta Mokonga ɗángi Mɔkɔta nɛmɔ te,
Ika ka njaga ani á mǔku,
na ka ɓî něbisande ɓaɓiɓia akɔ kusi á ecinji akɔ#Ɔna Jab 110.1.
37Daúdi sasakɛ, ansǔ ‹Mɔkɔta.› Cɔ, Kiísito aɓande mosuko akɛ ɓo?» Usɛsɛ á ɓakpa ɗáɓáɔɔ́ka ɓɔphɛi nɛkɛ na maseye.
Yéso aɔ̌ɛngɛphisa usɛsɛ á ɓakpa ka nyɔngɔ á ɓaɗundu-ɛɔphi
(Ɔna phɔtɔ Mat 23.1-12; Lók 20.45-47)
38Ka ɓɔphɛi ndea Yéso, ɗɛ́phɛi phɔtɔ ɓakpa te: «Óengani na ɓaɗundu-ɛɔphi. Nga, ɓákondi tamba na ɓáɔ́ligi ngɔ́mbɛ éndandandǎ, na ɓakpa ɓaɓɛǒsesea k'ɔ́ma á madondanɔ. Suɓi éndu á madondanɔ ndea Ɓayúda ka nyɔngɔ á Mokonga, ɓákondi phɔtɔ ikiɗia kankaanga á k'ama mosá-mosá na ka jaí ɗanga-ɗanga ɓáikɛ k'ɔ́ma á kɔkɔta. 39Ɓéɓophɛ phɔtɔ kankaanga á ɓakɔta k'éndu á madondanɔ ndea Ɓayúda ka nyɔngɔ á Mokonga, na k'ɔ́ma á ɓokutú k'ɛ́kɛka. 40Ɓɔ, ɓá phɔtɔ kouta kema bui ndea ɓake á kekusa na mɛma á Mokonga ka mbenɔ éndǎ mosá á ɓakpa ka gea ɓakpa ɓɛ́ɓɔnɛ. Mokonga atenaeka gǎkɛ nyɔngɔ nɛɓɔ akpɛ phɛɛ.»
Ɔphɛ́ɔ ndea nke á kekusa
(Ɔna phɔtɔ Lók 21.1-4)
41Esa moci Yéso ɗáoika k'ɔ́ma á makea á ɛkɔmi ka Mokonga. Áɔɔnjia ɓî usɛsɛ á ɓakpa ɗáɓáomakea imɔna. Ɓatɔi ɓásii ɗáɓáomakea imɔna ásii. 42Cɔ, nke á kekusa moci n'ande mǔki, áobika. Áomakea gbútuka á imɔna iɓɛ nnde ɗákátú na kantíti. 43Wandɔ, Yéso áɔ̌ɓɔphana ɓagoigi nɛkɛ, áǒgea: «Nenóngoɗi ɗoni, múki á nke á kekusa nde amaki imɔna ásii suɓi á sanduku á ɛkɔmi ka Mokonga kɔ̌nyɛ́nya ɓakpa ɓɔbu. 44Nga, ɓakpa ndɔ ɓámaki tɔ due ɛ́tɔi nɛɓɔ. Mǔki, amaki ndiu, imɔna bui nde ɗátú ně. Eya, ɗátú imɔna nɛkɛ bui á enda ně.»
Sélection en cours:
Málikɔ 12: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
