Matáyɔ 28
28
Yéso ajujúki ka kukuwa
(Ɔna phɔtɔ Mkɔ 16.1-10; Lók 24.1-12; Yoá 20.1-10)
1Mbusa á saɓáto, ka koɗokana á esa á yenga, Malía á ka Magadála na Malía ɓaangbo, ɓáoga ɔɔnjia bóta. 2Mɔngɔ moci, ɓaningina akpɛ áobika nga, malaéka nde ɓa Mɔkɔta ɗádidi ka toka na koba, áobika otiɓa ɛtɛ ndɔ ka mpɛphɛ, áoika gǔ í. 3Keongi akɛ ɗáophénuaga biɛ, biɛ, biɛ! Ngɔ́mbɛ nɛkɛ ɗátú ábu phɛɛ. 4Kó, ɓato á emani, ɓundɔ ɗáɓáoɓondeaga bóta, ɓáoɓá na kɔɓɔɓɔkɔ phɛɛ, nyama aɓɔ áɔɛkana, ɓáoɓá ɓea ɓakpa na ɓáku.
5Malaéka â gǎkɛ ǒngoɗea ɓake ndɔ te: «Ɓenu, ɓókoɓɛmbɛ na kɔɓɔɓɔkɔ nga, neoúba gea, ɓoonkaɓa Yéso, mmbɔ ɗáɓánkɔkɛigi gǔ á moyangɔ. 6Nna ye wani, ajujúki ka kukuwa, ɓíndɔ ɗáyɔngi. Cɔ, bikani ɓɔ́ɔnɛ ɔma nde ɓátóbisi mǒnda akɛ. 7Kamisagani, gǎ ngoɗea á ɓagoigi nɛkɛ gea: ‹Ajujúki sɔsɔɓɛ á ɓasí, agě mosá anu na Galiláya, na kó unge ɓɔmɔnande.› Nndɔ unge nenóngoɗi.» 8Cɔ, ɓake ndɔ ɓáokamisaga tóka ka bóta, ɓáoɓá na kɔɓɔɓɔkɔ na maseye phɛɛ, ɓáoga mbangɔ ka tɔ̌mia á ɓagoigi ndea Yéso nyɔngɔ ndɔɔ. 9Ka mbenɔ ndɔ tɔ, Yéso áobika odondana na ɓɔ. Áǒsesea: «Sambani.» Ɓake ndɔ ɓáɔnsɛkɛɗɛa, ɓáondunga Yéso k'écinji, ɓáonɗokomisa. 10Mpɔ Yéso áǒngoɗea: «Ɓɔ́kɔɓɛmbɛ na kɔɓɔɓɔkɔ. Gǎni ɓɔ́tɔmiɛ ɓana-ayi ɓágɛ na Galiláya, na kó unge ɓámɔɔnande.»
Ɓato émani ɓáge ɔtɔmiaga mbino
11Na ɓake ndɔ ɓá phɔ́tɔ k'aphe, ka ɓato émani nde ɗáɓáoɓondeaga bóta, ɓáoja na ntanga-nji ka tɔ̌mia á ɓagbɛga á ɓatoɓeigi-phɛ́a nyɔngɔ bui nde ɗágeani. 12Ɓagbɛga á ɓatoɓeigi-phɛ́a na ɓagbɛga á ka nji ɓáodondana, ɓáɔɔ́kana, ɓáǒɓopha ɓato émani imɔna ásii phɛɛ, 13na ngoɗea aɓɔ te: «Ɓɔyɔngande gea, ɓagoigi nɛkɛ ɓábikima kǐpha, ɓáoúɓa mǒnda akɛ na ɓe ka tɔ̌. 14Aoɓá mɔkɔta n'aɔ́ki nyɔngɔ ndɔ, ámbé ɓesu ɓɛyɔngagande na yɛ bîbíbí gea, ɓákanógeɛmbɛ ájeɗe. 15Ɓato émani ɓáɔbɛɗa imɔna ndɔ, ɓáogea ɓíndɔ ɗáɓáɛphɛí. Nyɔngɔ ndɔ áɔɛmba ka ɔlɔ á Ɓayúda na ka kesande.»
Yéso aɛsɛnɛkɛi ɓagoigi nɛkɛ
(Ɔna phɔtɔ Mkɔ 16.14-18; Lók 24.36-49; Yoá 20.19-23; Eku 1.6-8)
16Cɔ, ɓagoigi nkama na moci (11) ndɔ, ɓáoga na Galiláya ka mamba nde Yéso ɗáephangi. 17Ɓî ɗáɓámɔni, ɓáonɗokomisa, ɓagoigi ɓunɛngbo ɗáɓátú gǎkɛ na ngǎka. 18Mpɔ Yéso áobika ka mpɛphɛ aɓɔ, áǒngoɗea te: «Ɓámopi kɔkɔta bui á na koba na nnde á ka mokonda. 19Cɔ, gǎni ka ɓato á ekuna bui, ɓókětiɛ ɓɔ ka ɓá ɓagoigi#Ɔna Eku 1.8, ɓóǒɓatisɛ ɓɔ k'ína á Abɛ, k'ína á Anakɛ, na k'ína á Měma á kanga ɓojeɗe. 20Ɓógoisɛgɛ ɓɔ amba á nyɔngɔ bubui nde ɗénósosi. Na úbani gea, ne kimoci na ɓenu esa bui na ka sungiaga á mokonda.»
Sélection en cours:
Matáyɔ 28: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
