Matáyɔ 17
17
Keongi á Yéso ěkěti
(Ɔna phɔtɔ Mkɔ 9.2-13; Lók 9.28-36)
1Mbusa á ɓ'esa ngianjaga (6), Yéso áɔ̌bɛɗa Pɛ́tɛɛ, Yakɔ́ɓɔ na muna-amakɛ Yoáni, áɔ̌sɔndɔɛa gǔ á mamba nde akoi, ɓáoɓá sasaɓɔ. 2Kó, keongi á Yéso áǒketia mosá aɓɔ, áɔbɛnya ɓea maní. Ngɔ́mbɛ nɛkɛ áobusumana ɓea owanga#Ɔna 2 Pɛ́t 1.16-18. 3Mpɔ, Mósa na Elía ɓáɔ̌sɛnɛkɛa, ɓáɔyɔngaga na Yéso. 4Pɛ́tɛɛ áongoɗea Yéso te: «Mɔkɔta, aánjá ka ɓesu ika wani. Aoɓá n'okondi, nɛphɛkande ɛma isaɔ wani: Moci k'oɓɛ, moci ka Mósa na moci ka Elía.»
5N'a phɔ́tɔ ɔyɔnga, iimbiɔ á egugu nde ana owanga áǒgbukumia. Ɛsɔ áɔɔ́kɛkana k'egugu ndɔ ɓe: «Mmbé ande Miki nɛmɔ á ekondi, nena maseye ka yɛ phɛɛ. Mɔ́kani yɛ.» 6Ɓî ɓagoigi ɓáɔ́ki ɛsɔ ndɔ, ɓáoɓá na kɔɓɔɓɔkɔ phɛɛ, ɓáoguwa ka oɗo na ɓákpúngbúmanigi. 7Yéso â gǎkɛ ǒbîmisia, áǒdunga, áǒsosea: «Máni, ɓókoɓángɛ mɔnɔ.» 8Mpɔ ɓáotáisa iso aɓɔ, ɓákámɔnɛ ye nkpa ɓaangbo, tɔndɔ Yéso sasakɛ. 9Ka dida aɓɔ mamba, Yéso áǒsosea te: «Ɓókontɔ̌miɛ mɔnɔ nkpa nyɔngɔ á mphaniɔ nde, na ka ɓî Muna-Nkpa ajujukande ka kukuwa.»
10Mpɔ ɓagoigi ɓáomúsia Yéso: «Ka nyɔngɔ sina nde ɓaɗundu-ɛɔphi ɓámáɔyɔnga te, akeni phɔ́ Elía ábikɛ#Ɔna Mkɔ 3.23?» 11Yéso áǒsikisia: «Eya, Elía akeni na bika ka gea, áɓɔngisiɛ nyɔngɔ bui. 12Cɔ, nenóngoɗi gǎkɛ te: Elía a ye biki, ɓakpa ɗáɓákánengekisi, ɓâ ndiu ongea na kema bui nde ɗáɓákondi. Ɓondɔ tɔ unge ɓɔ, ɓántambisagande Muna-Nkpa.» 13Mpɔ, ɓagoigi ɓáoengekisa gea, ɗáǒngoɗea nyɔngɔ ka phɔa á Yoáni-Mɓatisi.
Yéso anamisi miki moci na an'egǎ
(Ɔna phɔtɔ Mkɔ 9.14-29; Lók 9.37-43)
14Mbenɔ nde Yéso na ɓagoigi nɛkɛ ɓákiɗi ɔma nde usɛsɛ á ɓakpa ɓáɓei, nkpa moci áombikia Yéso, áongbukia muanku, 15áongoɗea: «Mɔkɔta, nkuia miki nɛmɔ ngomi. Yɛ, aotambaga phɛɛ na kukuwa á egǎ. Mbenɔ nde aontena, mɔngɔ ásii áommaka ka nsa, nɛngbo ka iɓo. 16Nembikima ně ka ɓagoigi nɛkɔ, ɓákátɔkima gǎkɛ amisa akɛ.» 17Yéso áonsikisia gea: «Ɓenu ɛɓɔkɔti ájeɗe á kanga ɓeekea á Mokonga nde ca! Neikande na ɓenu ka mbenɔ ángaáni? Mbenɔ ángaáni nde nenóphiphiande? Cɔ, mbikani kani na miki ndɔ koni.» 18Yéso áonkeea nsombo ndɔ, áonjuana miki ndɔ, ka mbenɔ ndɔ tɔ, miki áoama.
19Mbusa, ɓagoigi ɓáɔsɛkɛɗa bíbí á Yéso, ɓáomúsia ka mpɛphɛ gea: «Ka nyɔngɔ sina nde ɓékétɔki phúia á nsombo ndɔ?» 20Yéso áǒsikisia gea: «Ka nyɔngɔ nde ɓeekea anu aábɔa phɛɛ. Nenóngoɗi ɗoni gea, atúoɓá na ɓo tɔ na ɓeekea ábɔa ɓea mbuka á aladáli, ɓotóngoɗeande mamba ndee: ‹Tówa wani, ógɛ kó!› Atógande, ka kema kátóúkɛku tɔtɔkɛana ka njaga anu. [21Ka phumba á nkoko á nsombo nde, akeni tɔ na ɛmɛmi na ika kángá á eaga ka nyɔngɔ mɛma á Mokonga.]»
Yéso a goto ɔtɔmia nyɔngɔ á kukuwa na jujúka akɛ
(Ɔna phɔtɔ Mkɔ 9.30-32; Lók 9.43-45)
22Esa moci, Yéso na ɓagoigi ɓɔbu ɗáɓádondani kimoci na Galiláya, Yéso áǒgea: «Ɓámbisande Muna-Nkpa, ka njaga á ɓakpa. 23Ɓɔ, ɓánkusisande. K'ésa á ko isaɔ, ajujukande ka kukuwa.» Ɓagoigi ɓáɔɓɛa phɛɛ.
Pɛ́tɛɛ na Yéso ɓáphendi manjanja á endu ndea Mokonga
24Mbenɔ nde Yéso na ɓagoigi nɛkɛ ɓákiɗi ka Kapɛɛnaúmu, ɓaphendisigi-manjanja á endu ndea Mokonga, ɓáɔnsɛkɛɗɛa Pɛ́tɛɛ, ɓáomúsia: «Ngoisigi nɛnu nnaophenda manjanja á endu ndea Mokonga ee#Ɔna Jua 30.11-16?» 25Pɛ́tɛɛ áonsikisia: «Eya, aophendaga.» Ɓî Pɛ́tɛɛ angí k'éndu, Yéso â phɔ́ okpanga ngoɗea akɛ: «Simɔ́ni, okanisi ɓo? Ɓ'ani ɓunde ɓaamɛ á ka mokonda nde ɓáǒphendisa manjanja: Ɓaniki á nji? Ɓakɛni?» 26Pɛ́tɛɛ áonsikisia gea: «Ɓakɛni.» Yéso áongoɗea: «Ande gea ɓaniki á nji ɓánáophenda ka kema. 27Cɔ, ɓékéokonda ɓɛisa á ɓakpa ndee. Kaɓondɔ, gǎ k'étǔ, ómakeɛ kɔ̌ɓɔ, sú nde ɔɔmɔpha k'ama mosá-mosá, kóɗa aphenɔkɔ akɛ. Kó, odondande imɔna moci, bɛɗa ú, óɓophɛ ka phenda á manjanja ínɛmɔ na ndeakɔ.»
Sélection en cours:
Matáyɔ 17: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
