Luke 8
8
Bakaase bàbàkémbenge na Sése
1Vayulavane, Sése nàyɛndenge gutsɔ mala na misɛnge nàtɔsenge tsaange Buyumune bua Nzɛmbi. 2Ndɛ bone baate bɛndi ba lekumi na bɔli na bakaase ba ndɛ funze matɛnge mu maniute ma bɔ na ba ndɛ bɛlese bibéde àkémbege. Mandoge ma bakaase muɛne ni maneme. Mari wa muchi Magedale wu Sése àfunze matɛnge tsaambe. 3Sane mukɛdi a Susa wuwàkɛlenge mabuɛ ma Irodi. Susane na bakaase bakime mvuabɔvɛ bàbàyamesenge Sése bone baate bɛndi na mabuɛ ma bɔ.
Kokome a muniéndji a tsaange
4Piti a baate mvuayɔvɛ na baate bakime bàbàmate gutsɔ misɛnge bàkokene va Sése àbade, nàtadele bɔ kokome yineyi ndé: 5«Letsuge lemochi, mutu nàyɛnde gu nianze tsaange.» Ndɛ nianze tsaange, lekabe léna lerage va yulu a ndjile baate bàtchate, namoni a baniodi nibàdɔde. 6Aléne lekabe lerage va yulu a tɔtɔ ya mamani, tsaange imɛne, bivɛdi nibiàkanini muti tɔtɔ yisàbade na maambe vɛ. 7Aléne lekabe nilàrage gutsɔ bifundi. Bifundi na bivɛdi bimɛne tchitse, biboge, bifundi nibiàbamege bivɛdi. 8Aléne lekabe lerage va yulu a leniɛnge, tsaange imɛne, iboge, niyàbote milonde mvuamiɔvɛ. Avanekaniva Sése àlɛle bɔ ndé: «Babalidi na matchui buɛchi, batchikese maambe muɛne.»
Sése asopele kokome muniéndji a tsaange
9Baduki ba Sése nibàfule ndɛ bo: «Kokome muɛne kabuni ya yɛndegele.» 10Sése nàkale bɔ ndé: «Bamamane béne pandele maambe ma Buyumune bua Nzɛmbi. Tɔ gulidi baate bakɛ, batadele bɔ makokome mu bo, bɔ nabakɛngese basamɔne, bɔ nabayoge bachitchikese vɛ.»
11Kiyogani buni kokome muɛne ya yɛndegele. Tsaange mabige ma Nzɛmbi yafuane. 12Tsaange yiyàrage va yulu a ndjile, baate babayoge mabige ma Nzɛmbi, tɔ mubéli ayade, akamase mabige ma bɔ bayugi mu ndé bɔ bachilele, bakapɔtege yafuane. 13Tsaange yiyarage va yulu a tɔtɔ ya mamani, baate babayoge mabige ma Nzɛmbi, nachinge mɔ na ngɔmbe yafuane. Tɔ bɔ mabige muɛne masasondese mikɛngi gutsɔ mitéme mia bɔ vɛ. Lebiɔge labɔ ndile mua pése. Va maambe mamanɔne mayadele bɔ, mitéme mia bɔ mikagabege mbise. 14Tsaange yiyarage gutsɔ bifundi, baate babayoge mabige ma Nzɛmbi yafuane. Tɔ ibɛyi na lenuingi la maambe ma bulɔnge bunebu bibamege mabige ma Nzɛmbi mabɔ bayugi, bɔ mulinge gɛle vɛ. 15«Tsaange yiyàrage va yulu a tɔtɔ yiyibuɛ, baate babayoge mabige ma Nzɛmbi na mutéme wuwasonde yafuane. Bakɛle mɔ gutsɔ mitéme mia bɔ, bakábade ka baate babayɛbene na babamagɛle mulinge.»
Maambe ma gutsɔ ifunde na ma gutsɔ iyalele
16Mutu asatsome page mu kuduge gutsɔ mulumbu vɛ. Voki mu sose yɔ gu tchine a tɛngi vɛ. Ndɛ tsome page, mu témbe yɔ va yulu a kande, mu ndé baate babaningele gutsɔ nzɔ bákábade gutsɔ iyalele. 17Maambe motchi ma basade gu musuɛge nimápole va ndande. Namoni a maambe mabasade gutsɔ ifunde nimápole va iyalele. 18Rambelani mu biyugili bia béne bia maambe. Muti mutu wuwulidi na biɛndi, Nzɛmbi abuɛse ndɛ bikime. Tɔ mutu wuwa vɛ na biɔ, Nzɛmbi apoke ndɛ kiti lendji le ndɛ tase ndé amabage.
Ngua Sése na baane ba taate a ndɛ batɔnde ndɛ mɔne
19Letsuge lemochi, ngua Sése na baane ba taate a ndɛ nibàyɛnde gu ndɛ bàde. Bɔ bàsote va ndɛ bàde, bàsatoge ndɛ mɔne vɛ muti piti a baate yàbade mvuayɔvɛ. 20Mutu nàlɛle Sése ndé: «Ngu a wɛ na baane ba taate a wɛ bobe balidi gu mbɛdi. Bɔ batɔnde wɛ mɔne.» 21Tɔ Sése nàkale ndɛ ndé: «Ngu a me na baane ba taate a mɛ, baate babayoge mabige ma Nzɛmbi na sade buni mɔ màlɛle.»
Sése akubese mukungu na mingébe
22Letsuge lemochi, Sése ànage gutsɔ mbunge bone baate bɛndi ba lekumi na bɔli, nàlɛle bɔ ndé: «Wokani lesabegani ngule mudibe yéne. Bɔ nibàsabege.» 23Va bɔ bàsabagenge, Sése nàlase chɔle. Mukungu àyade, mambe nimaningele gutsɔ mbunge. Bɔ nibàbade ka gutsɔ tchambe la lenɔne. 24Baate bɛndi bàkukule va pédi a ndɛ, bàsole ndɛ, nibàlɛle ndɛ bo: «A Kumu, a Kumu bése a béne lɔlɔ nilekuadani.» Sése àsoge chɔle, nàkubuse mukungu na mingébe. Biɔ nibiàbade ndile ka lingii. 25Sése nàfule baate bɛndi ndé: «Béne ka lebiɔge vɛ?» Bɔɔme bukuate baduki bɛndi, bɔ bagémbe, nibàyambele pfuɛchi abɔ muɛne na bɔ muɛne bo: «Awunewu mutu wuwakubuse mukungu na mingébe biɔ bikagɔbichi ndɛ guni amate?»
Sése apotele mutu wu matɛnge mapepene
26Vayulavane, Sése bone baate bɛndi nibàsabege mu yɛnde va kɛse Sénésarɛne ngule mudibe yéne songe a songe na kɛse a Ngalilé. 27Sése àpole gutsɔ mbunge, lebagele lelàtsagelenge gutsɔ musɛnge wa va kɛse muɛne lelàbade na letɛnge lapapene mu niute, nilàkɛsele ndɛ. Lekɛse àbade mvualɔvɛ, le lebagele muɛne àsàbaluatenge mangoyi na tchàdenge na tsàgelenge gu nzɔ ndɛ vɛ. Tɔ ndɛ tsagelenge ndile ka gutsɔ mapéchi. 28Lebagele muɛne àmɔne Sése, àsome mabɔnge va busu bua buɛndi nàbuamege mbuliambuli ndé: «A Sése Muane a Nzɛmbi wulidi gu kɛti a yulu, tchambe lelidi pɛngidi a bése a nawɛ naa? Kɔkɔle a wɛ yatchise mɛ chigi.» 29Sése nàfunze letɛnge lelàbade gutsɔ niute a lebagele muɛne. Letɛnge muɛne mapapene mvuamɔvɛ làpapenenge ndɛ. Nimulɔ bàgadenge ndɛ mile na miɔge na mapaange mu kɛle ndɛ. Tɔ lebagele muɛne nàpabenge mapaange. Avanekaniva letɛnge muɛne làbétenge ndɛ gutsɔ bitchige bia legɛngi. 30Sése nàfule ndɛ ndé: «Ndoge a wɛ naa?» Ndɛ nàkale ndɛ ndé: «Ndoge a mɛ piti.» Muti matɛnge mvuamɔvɛ màbade mapapene ndɛ mu niute. 31Matɛnge muɛne nimàbɔnde Sése bo: «Kɔkɔle a wɛ yatcindege bése gutsɔ itchige cha mimbɔnde.» 32Va kɛse muɛne niguàbade na dimbe la bangulu lelàtcadenge gu yulu a mukɔnge. Matɛnge nimàbɔnde Sése bo: «Kɔkɔle a wɛ tchindege bése gutsɔ dimbe la bangulu lineli.» Sése nàtchindege mɔ gutsɔ dimbe la bangulu. 33Matɛnge màpole gutsɔ niute a lebagele muɛne, nimàyɛnde gu ningele gutsɔ dimbe la bangulu, dimbe la bangulu lepatege gutsɔ mudibe, nilàyine lotchi. 34Bakéli ba dimbe la bangulu bàmɔne maambe muɛne, bàbate, nibàyɛnde gu yulu musɛnge na mutsɔ bitchige bibàkɛlenge baniame gu yole musame a tchambe muɛne. 35Baate bàpole gu mɔne buni tchambe muɛne làviɔge, nibàbakese lebagele le matɛnge màpole mu niute atsagele va pédi a Sése. Ndɛ bàde àmàluate mangoyi ndile ka buédi. Bɔɔme nibuàkuate baate muɛne. 36Baate bàbàmɔne buni tchambe muɛne làviɔge, nibàyole musame buni lebagele muɛne làpɔtege. 37Bɔɔme bukuate baate ba va kɛse a Sénésarɛne, bɔ nibàfunze Sése bo: «Mate va kɛse a bése.» Avane, Sése ànage gutsɔ mbunge na gabage. 38Lebagele le Sése àfunze matɛnge mu niute nàlɛle Sése ndé: «A Sése mɛ tɔnde yɛnde a nawɛ bitchige biotchi.» Tɔ Sése nàkale ndɛ ndé: 39«Gabege gu mboge a wɛ, wɛ yole musame a maambe motchi ma Nzɛmbi achidili wɛ.» Lebagele muɛne leyɛnde gutsɔ musɛnge, nilàyole musame a maambe motchi ma Sése àsadele ndɛ.
Sése abɛlese mukaase ngua muvova na muane Sayirise
40Va Sése àgabege ngule mudibe yéne, piti a baate mvuayɔvɛ niyàyake ndɛ. 41Lebagele le bàtɛdenge Sayirise, wuwàbade ivonde cha nzɔ yibàbondenge Nzɛmbi, àsome mabɔnge va busu bua Sése, nàbɔnde ndɛ mu yade gu nzɔ ndɛ. 42Muti muane a ndɛ wa mukaase wa lekike, wuwàbade na lekumi la biléme na biléme biɔli àbade kabɛle na leku. Va Sése àyɛnde gu mboge a Sayirise, piti a baate niyàbamege ndɛ ngule na ngule. 43Gutsɔ piti a baate muɛne niguàbade na mukaase wuwàbade na muvova mu makumi ma biléme na biléme biɔli. Mukaase muɛne àbade àmàkabe mabuɛ mɛndi motchi gu mboge a bangaange. Tɔ ngaange ti mumochi àsàtoge ndɛ bɛlese vɛ. 44Mukaase muɛne àkukule va pédi a Sése, nàbɛmbe lepɛpi la lengoyi la Sése ngule a mbise. Vakɛtiavane, muvova mukaase muɛne nàkani. 45Sése nàfule ndé: «Wu bémbi mɛ naa?» Baate botchi bàtone, Piɛre nàlɛle ndɛ ndé: «A Kumu piti a baate ngɛ wɛ yadinge na bamege wɛ ngule na ngule.» 46Tɔ Sése nàkale Piɛre ndé: «Mutu abémbi mɛ, nimulɔ bungudi buni méti mu mɛ.» 47Mukaase muɛne àmɔne ndé tchambe lɛndi bamayabe, àyade na tɛbe lekambe, nàsome mabɔnge va busu bua Sése. Avanekaniva ndɛ àyole musame a buni ndɛ bɛmbe Sése na buni ndɛ bɛlege va mise ma baate botchi. 48Sése nàlɛle ndɛ ndé: «A muane a mɛ, wɛ beligi mu lebiɔge le wɛ buli mu mɛ. Kiyɛnde na pɔle.» 49Va Sése àbade ki yambele a yambele, tome àmate gu nzɔ Sayirise, nàlɛle Sayirise ndé: «Yabarɔkese Mulongichi, muane a wɛ amakuade.» 50Tɔ Sése àyoge maambe ma tome àlɛle, Sése nàlɛle Sayirise ndé: «Niage bɔɔme mɔne. Bole ndile lebiɔge, muane a wɛ ábɛlege.» 51Bɔ batɔde gu nzɔ Sayirise, Sése àsàchinge ndé baate botchi baningele na ndɛ gutsɔ nzɔ vɛ. Ndile Piɛre, Sa, Sake, taate a muane na ngua muane. 52Baate botchi bàmɔne page, nibàléle mu muane muɛne. Avanekaniva Sése àlɛle bɔ ndé: «Salélani, muane asakuade vɛ ndɛ chɔle alidi.» 53Tɔ baate muɛne nibàsɛbe Sése muti bɔ bàbàyabenge bo muane amakuade. 54Sése àkuate muane mu gɔgɔ, nàlɛle mbuliambuli ndé: «A muane a mɛ, soge.» 55Vakɛtiavane muane muɛne àsoge, nàtɛmene. Sése nàlɛle bɔ ndé: «Vɛdani ndɛ biéle atchade.» 56Taate a ndɛ na nguɛndi bàgémbe, Sése nàlɛle bɔ ndé: «Yayolani musame a maambe muɛne gulidi baate.»
Sélection en cours:
Luke 8: NZB
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
