Luka 7
7
Yeso ma we orere owo osoja osaru o Roma a ngamo
(Mat 8.5-13)
1Ni si Yeso jamu bezeze akanye to gogorro zal, nze ma pete Kafarnahum 2A gemme se oye osoja o roma osaru se orere okome se ozema kunalomene mana ngona voto owǝnǝ. Ono saru osoja oromame ma barsa orere me ganka. 3Nze makune odara o Yeso, nze ma Toma aye ano asasarru a tuYahudi a nga gom me kusu ama rai ma we orere okon ama ngamo. 4Nze ana sasaru me nga ngame nga ka morra Yeso nze nga gunan me kusu, “Ono gemme yankǝnǝ se ngo ta benkeme dede!” 5Baka ma barsa ano akado ma saido ogora beroromo. 6Nze Yeso nga neng nye.
Ni se ma denye voto neng atitǝu ono saru otosoja o roma, nze ma Toma arene akame agon Yeso, “Asharri dekei, tego ushi uwahalla bakokon ne! In ta bare guna ngo ta rai emi atitǝu ni. 7Ezena ngona min ta bare in rai a ngo ne, buku belle base, vano okon ya ngamo. 8Min gaze oware oye ono saru ze, toye tosoja tome, emi ma marro, ingan gon ono gina ‘Ngame,’ mawa ngame. Ingan gon ‘Woi Era,’ mawa rai. In gon orere okon, ‘Wuza epegina,’ ma wawoza eme.”
9Ni se Yeso kuna nane, nze umameke meme, nze ma wangrro ma gon ano tarse me, “Miya gosan nyi kang, ayimi Isaraila zal a dawa morra ano yeta eyabo neng biruwa zal sakama ono gina ne.” 10Ana geme se ana Toma nye se nga kuri atitǝu awuno saru tosoja to roma, nga kuru nga morra orere me na ngamo.
Yeso ma werse za vana owai ogome se ono rrommo me ma wi
11Ni se ata dakano ne, nze Yeso ngame oye ogwerri se a gosan no Nayin, ane yemasanga tome neng ano chebete tarse me. 12Ni se ma we voto neng arakai awo pete gwerri mi, nze aye ano kasuru neng eye ekeze o oye onomenyane, se maze base ayimi se mayome, onorromome gaze ma wi. Ano chebete asuru ogweri mi angame a teyame. 13Ni se Yeso ni owai ogomme, nze ma kuna ogwengwene okome, nze ma gon owai me, “Tego rrewa ne.”
14Nze ma ngame maka dorre uwago owe kezeme, nze ano zaka me nga tore. Nze Yeso go, onemanyene, “Min gon ngo wera!” 15Nze ono gome se mana wǝnǝ mi ma wera ma chǝkǝnǝ, ma bura belen, nze Yeso watǝ mi ayimi.
16Nze beye bimi nye zal, nze nga tongarra Asharri nga go, “Gangan, oye annabi na wera ayima akado! Asharri na rawa buza kado!” 17Epegeme se Yeso ma wuza, beleng beme bi ma ngame a Yahudiya neng tukerkerro tome.
Ane yetuma asuru a Yohana ono Obaptisima
(Mat 11.2-19)
18Nze ane yemasanga to Yohana ono Obaptisima nga beze me togogorro tome zal, nze ma tisa anka repo ayima akanyi. 19Nze ma Toma nye Achakura a nga sangarra me, “Ngo ze ono geme se ngo ya ra, ne worro we a ji awoi.”
20Ni se nga morra Yeso, nze nga gom me, “Yohana ono Obaptisima zen a Toma do a woro sangarrai, ‘Ngo ze ono gome se ma ya ra me, ne worro we a ji awoi?’ ”
21Ochogumme gaze, Yeso ma ngamo neng ano chebete se nga ta kunalomene neng tokwene atunyi, neng ano uruhu obo. Aro chebete nga morra unarǝ ra. 22Nze Yeso garre ugunnye, “Kuruni ebeze Yohana epegeme se nyi na kuna, neng epegeme se nyi na nǝrǝ, aro nga na morra unǝrǝ ra, ano tanzǝ neng ana tano, akoto na morra ngamo, aturi nga ya kunaza belen, ano weju na me ower sa, a ya nye za ano dera beleng be lo.#Ish 29.18-19; 35.5-6; 61.1-2. 23Asharri ya nya kavi epegeme se maya barsa me zal, ono geme se mazema mantarra ayimi birrowa beme a tara akan ne.”
24Ni se ana geme se Yohana ma Toma nye. Nze Yeso bura bi belen ano, a tara Yohana, nze ma gon nye, “Nye na ngame a nǝrǝ yaze ayeja? Nyi na ngame a ni tomo togome se tuna baresa ovunu oya zerra tome?” 25Tunǝrǝ toyaze na ngamen nyi? Woi na soke togorro to ngomai ne, ano soi togorro to reu, nga chezǝnǝ ayimi malo, nga ya atitǝu a togomo. 26Nyi tonǝri toyaya toze nyi na ngame ano? O annabi? A, miya biza ka nyi, ma kera ono vati taye to Ogomo Asharri. 27Ono gina ze se ama darsa utade ome ago,
“ ‘In gina se ya Toma otoma okon ama a ji ono gome se,
maya mamarra oruna a ngo a ji kamung ngorai.’ ”#Mal 3.1.
28“Miya biza ka nyi ayima ana geme se awai mayoso nye, woi ze ma nu se ma kera Yohana ne. Ayimi zal neng nane, ono bate ayimi togomo to Ogomo Asharri ma kera me.”
29(Zal ano ogome se nga ya rakara me, neng ano kasa ogandu, nga na garra guna orona Ogomo Asharri oze o ngoma, baka nane ze ama wuza nye obaptisima o Yohana.#Mat 21.32; Luk 3.12. 30Nze, tuFarisi neng ano masano makirri ma Musa nga nya me ne otarse eme geme se Asharri barse guna nga we, nze nga nya me ne ogona Yohana ngona nye obaptisima.)
31Nze Yeso ma wucaji a gosan nye, “To, yaze minnang ngona mambambarru neng ano masano magina? Nga zen ni zi? 32Nga ze sakama abiya se nga ya chǝkǝnǝ ukasuwa, nga tisaza topana tonye,
“ ‘Ana wǝrri unyape,
nyi na nya me ne ogari errina!
Ana bi errina owǝnǝ,
nyi na nya me ne urriwa!’
33“Yohana ono Obaptisima ma ra mata wucu emo wucu ni mata shinǝ manyi ma inabi ni, ‘Nyi ya gusa, ma zen tulajarna!’ 34Vana Ono ma rai, ma wucu, ma shezǝ, nyi go, ‘Ma zen epe apuru, owantano owa ono kasa ogandu neng “ano masharra”!’ 35Zal neng nane ana geme se nga garre neng rremo ye Ogomo Asharri nga ze nga garre beleng ba Asharri gangan ze.”
Yeso atitǝu Siman oFarisi
36Oye oFarisi mana tisa Yeso a wucu emo wucu ama atau, nze Yeso rai ma pete ma chǝkǝnǝ baka a wucu emo wucu. 37Ogweri ogomme oye owai mazanu, se ma wuza epegeme se eta rreze ne. Ni se ma kone Yeso na ra atitǝu oFarisi, nze maran kukutaru ko manenye mo onya olo se ama mamarre neng ezuwa ye ngoma ye aro ecebete.#Mat 26.7; Mar 14.3; Yoh 12.3. 38Nze ma ra ma tore ama marro voto neng atawa akame emaya rrewa, in maji atamo. Nze majimme ma kungkuzu ama atawame nze ma pisi neng sete some nze ma lǝmǝ nze ma cukoma me manenye ma onya olo.
39Nze oFarisi narre epegeme se owai ogome na ngona, nze ma ga ama biruwa, “Atingo ono ginna annabi zi, mata ru se avizi owai ogina se maya dorresa kame! Mata ru se ono masharra ze.”
40Nze Yeso ogomme, “Siman, in zan epegeme se ya bukume a ngo.” Nze ma go, “Buku, Achakura.”
41Nze Yeso go, “Oye ono se ma tarse anka repo oduru, ono vento a tarse me in ru chebete se ono etoma maya morra ma arrewai rrevento, neng odangarra, ono repo me gaze in ru eme edinye a nya anetuma, atumurru turru shibi. 42Ni se nga gamene ukursu mi, nze ma deke nye neng no nye nga repo me, To, Oniyo okoi avizi manen kera a barsa me?”
43Nze Siman garre ogo, “Unǝrǝ okon ono ageme se ana deke me in ru ecebete ze.” Nze Yeso gonnye, nane meze!
“Ngona buku derte.” 44Nze ma wangarro ma ni owai me, nze ma gon Siman, “Ngona ni owai gina? Na pete a ngo atitǝu ngo dan nyan manyi in kweju atawa akan ne, owai ogina mana kweju atau neng maji mamame, nze ma pesi neng sete sapana akame. 45Ngo den kangne se mina pete a ngo atitǝu, tuni opete okon owai ogina ma dan deke ulǝmǝ atawa akan ne. 46Ngo dan cukuman manenye apana kanne ne, me mana cukoma manenye mo onya olo ataw akan. 47Baka nane ze nze in gon ngo, masharra ma geme se ma wuza zal ana viziku mi, baka mana barsan chebete. Ono gome se ama viziki mi bate, tubarsa tome toze bate.”
48Nze ma gon owai me, “Ana viziku masharra mai.”
49Ano ageme se nga ya wucu emo wucu neng me, nga bura gusa a topana tonye, “Avizi ono ogina se ma bare ma gon ono aviziki mi zal?”
50Nze Yeso gon owai me, “O ngona biruwa boi o na buzai, o ka denye shammo.”
Sélection en cours:
Luka 7: JER
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
©️2022 Luke Initiative for Scripture Translation
