Luka 4

Shetan ma masa Yeso

(Mat 4.1-11; Mar 1.12-13)

1Yeso ma kuri asuru orawa owo Joda abinja neng uRuhu Usansang. URuhu oma ngamem me ayimi rreja, 2ara geme se Shetan ma masa me, ayimi tumuru iturru naze. Doguna amurramen esharra. A bimaso be ocha ogomme, nze ekomo eme me baka se ma da madawa wucu eyabo ne.

3Nze Shetan gom me, “Inga ngo Vana Ogomo Asharri zi, gunan rrezuwa rregina ayi kuri yeborode.”

4Yeso garre ma gom me, “Ama dare a beleng be Ogomo Asharri ago, ‘Dan neng emuwucu ze base ono ya sopo ne.’ ”

5Nze Shetan ngamem me aye ariya akantan dede, nze ma wonko me zal togomo to masano sakama omalma bura. 6Nze ma gom me, “Ya nyakai a gata a tara masano magina neng epegeme se eya yimmi zal, baka se zal ama nyan eme. A bate miya nya zal ono geme se mina barsa in nya me. 7Zal tuya chǝkǝnǝ tatui se inga ngo girwǝnǝn a nyanga.”

8Yeso ma gunan me, “Ama darse ago, ‘Ono ya girwǝnǝ Ogomo Asharri ze bas anyanga, maze base ngoya girwǝnǝ a me.’ ”

9Nze Shetan yeteme angame a Urshalima, nze ma ngamem me ara kantarran Atitǝu Awo Ogomo Asharri, ma gom me, “Inga ngo Vana Ogomo Asharri zi ochanko asuru ayina a ngame a nyanga. 10Baka ama dara a beleng bo Ogomo Asharri ago,

“ ‘Maya nya uwǝrri atoma awo Ogomo Asharri,

a nga wankǝli a ngo.

11Nga kure nga kwakai neng tare tonye

doguna tego ngo tere ubuna a yizuwa ne.’ ”

12Nze Yeso ma garre ma go, “Ai, ama ago, ‘Tego ono masa Ogomo Asharri okonye.’ ”

13Ni se Shetan ma jamu masa Yeso a koyo oruna, nze ma warna nan me ocha batikeke.

Yeso ma bura etume keme a Galili

(Mat 4.12-17; Mar 1.14-15)

14Yeso ma kuri a Galili, neng a gata uRuhu owo Ogomo Asharri oze nan me, baka beleng nga bome baka denye kowaba anyangam me. 15Nze ma wuza yemasanga aro togura to beroromo, kavi ma tunnga rrame.

Ama nya me ne Yeso a Nazarat

(Mat 13.53-58; Mar 6.1-6)

16Nze Yeso rai ape Nazarat, ara geme se ma bare anu. Ema pete ogora beroromo a dara ovonke okonye, nane se mana mina anu, nze ma wera abarre ewerre geme. 17Nze awǝtǝmi otakarda se ama darase beleng be annabi Ishaya bizanu. Nze ma buzi ma morra ara geme se ama darsa ago,

18“URuhu owo Ogomo Asharri oya pana kan,

baka ma zakan

embi beleng be lo ano tuyan.

Ma tumang in gon ano ageme se nga zen utǝsǝ a ya buza ka nye,

a ru nga ya morra unǝrǝ ara,

neng ana geme se ama nokonye nga ya morra chope.

19In gunan kavi ocha ogome se Ogomo Asharri ma go maya buza ano ana kame.”

20Nze ma gwini otakarda me ma wǝtǝ ono wankǝli ogora beroromo, nze ma chǝkǝnǝ. Zal ano ageme se nga ze ogora beroromo beme nze nga jorte me a ji. 21Nze ma gon nye, “Beleng be Ogomo Asharri bigime se nyi na kuna segina bina binja kane.”

22Zalle okonye se nga ze arame nga kuna malowa ma me. Nga na nǝrǝ emodama ara neng beleng be lo bigeme se biya susu a me anu, nga ya dako o sanngarra nga ya gusa, “Koi, vana ogina dan o Yusufu ne?”

23Nze Yeso gon nye, “Minru, nyi ya beze akan otakara beleng begeme, ‘Onotuka, mala apana a kai.’ Eya kuri egummi, ‘Ngona wuza tukwakwa togome se woro na kuna ngona wuza a Kafarnahum, wuza ape kai ara geme se ama yoye gaze.’ ”

24“Dekan beze nyi magangan, nane ze, miya gusa nan nyi, oye annabi ze ma nu se a ya kawa me ape kame ne. 25Kuna ne miya gusa nannyi, ocha o ono bezeze taye to Ogomo Asharri Iliya, Ogomo Asharri mata ngona bura bigatine asuwai se taro neng tubarmǝ tase ne, bakanane akuri a wuza ekomo eganka a kowaba an nyangam me. Awai ama zen anu chebete a Isaraila se anarrome akanye ngamana wiju. 26Ogomo Asharri, mata Toma ono bezeze taye to Ogomo Asharri Iliya angame ono vento ayima akanyene. Ama tumame a oye owai ogome se onorrome ome ma wi ape Zarafat ayimi nyanga ma Sidon. 27Ocha annabi Elisha gaze akoto maze ano, anyanga ma Isaraila chebete, Ogomo Asharri mata ngona ko ono vento a ngamo ne ayima ka nye ne, se Naman ono nyanga ma Suriya ze base ama wome a ngamo.”

28Se ana geme se nga ze ayimi ogora beroromo nga kuna beleng beme, nze biruwa bi sharro nye zal. 29Nze nga wera nga zuzu Yeso amarra ape, nze nga vati mi a ji angame a kerro owoo ageme se nga se ape akanye anu. A narra tipame ama rizi egǝzungǝzun. 30Nze mawa tinǝ ayima ka nye ma wuza tano tome.

Yeso ma zuzu woi uruhu obo

(Mar 1.21-28)

31Yeso ma wera matu angame ape a Kafarnahum, an nyanga ma Galili. Agemme ma pete ogora guruna tuYahudi a daro vonke okonye, maya bizeze akanye togogorro. 32Nze nga nǝrǝ emo damara ayemasanga rrome, baka se ma bi belen beme neng gata.

33Ayimi ogora beroromo woi mazanu se ma zen uruhu obo, neng tualjarna. Nze ma nyiza emelo dede ma go, 34“Dorra ageme, ya manyi mai neng woro, Yeso ono Nazarat? Ne ngona rawa wuza akado ne? Min ruyi avizi ngo, ngo ze vana Ogomo Asharri.”

35Yeso ma bokara ulajarna me ma gom me, “Guna wete, suru ayimi rrepung yo ono gina.” Nze ulajarna me ma zǝkǝ ono me ma sheta anyanga a ji akanye, nze a bate ma suri, ma dekeme ma dan pelko me ariya ne.

36Nze anagemese nga ze arame zal ngame tonu nga ya sanngarra topana tonye, “Yaze pegina se? Maya bokara atu aljarna tobo maya gusa nye susuni apun ano nga dorra nga suri.” 37Emegena se Yeso ma ngona neng, ema we beleng nga bome bi sezarro a kowaba a nyangam me.

Yeso ma we ano chebete a ngamo

(Mat 8.14-17; Mar 1.29-34)

38Yeso madike ogora beroromo adarame, nze ma ngame atitǝu Siman. Ayun owai Siman maya ton neng yepung, nze ngagun Yeso kusu mala me. 39Nze ma tangǝnǝ voto neng me, nze ma gon utun yepung yeme chope me, nze odorra ochopeme. Nze mawa wera ma me tuwai.

40Nze neng ogati odara, ano ran ano tokwene a Yeso tome keken keken, nze ma tara kavi oware ma ngona nye a ngamo. 41Tulajarna tome tasusu ayimi apun ano chebete nga ya bikoko nga ya gusa, “Ngo Vana Ogomo Asharri ze.”

Nze Yeso bokara a nye, ma tuna nye bi beleng, baka nga ru se maze Kiristi.

Yeso ma ngame a bi Beleng Be lo

(Mar 1.35-39)

42Se ara ma sane nze Yeso deke ape me ma ngame ara geme se woi ze ma nu ni. Nze ano ngame agǝngǝrrǝ me a kowaba, nze nga morra me. Nze nga gom me kusu tego dekedo ne. 43Yeso gon nye, “Ogomo Asharri ma tumang in ngamem beleng be lo be togomo to Ogomo Asharri an nyanga ma me atu pepe gaze.”

44Nze ma nga na ma bi beleng be Ogomo Asharri ayimi togura to beroromo zal a nyanga ma Yahudiya.

Sélection en cours:

Luka 4: JER

Surbrillance

Copier