Mhakechüko 5
5
Anania mu Safira
1Derei Anania ücüu, puo kimiapfü Safira ze kepfhesi di lie puo zelie, 2mu puo kimia ze kenourhe di puoma huo pie zhüwa, sidi kekreiko se vor apostelko phi nu shü. 3Pitor sie, “Anania, no kiüdi Satan bu n nou tshupfü di lie ma huo pie bawa di Kemesa Ruopfü seya ga? 4Süu zekewa mhodzü n vie mo üme? Tsiu süu zelieketa sie rei puomau n vie zo mo me? No kiüdi mha hikecü chüketuo medoya ga? No hieko#5:4 Gk Themiako ki. monyü Kepenuopfü sewate,” sita. 5Anania die hau silie mumetha tetsu di siata mu süu dze kesi khe michie phita. 6Sitse khriesako sier puo mo-u kezilie di puo toupie vo khruwa.
7Siro bavüdo se mese sie, puo kimia kedipuo chüte shikecü dze puorei si mo di vor. 8Sitse Pitor sie, “A ki pushücie, n nupfu nnie lieu zekelie ma hai zo me?” Sitse hapfü sie, “U, cüde zo.” 9Sitse Pitor sie puo ki, “Kiüdi nnie Niepuu Ruopfü kedoketuo kenourhe haita ga? Harie, n nupfu khrukewako tsie vor kicieki thate, mu süko bu n sa pie vo khruwatuo!” 10Sishü mumetha hapfü vapuochü tetsu puo phi nu siazhüta, süsie khriesako tuo ler tse puo siazhüketa ngulie, süla uko puo toupie prata mu pie vo puo nupfu khieki nu khruwa. 11Süla kehouu mu kekreimiako pete rei thedze hau kesiko michie phita.
Apostelko Mia Kekra Chü Keshürhokeshü
12Siro apostelkoe themiako donunu, zasiko mu u ngoko kekra chüshü. Siro uko pete vo Solomon Kifükhro nu kengulie. 13Ru kekreimiako le uko sa michieta, sirei themiako uko le pevi phita. 14Siro thepfumia rei thenumia rei kepelemia kekra Niepuu kitsa vor miemieta. 15Siro Pitor tuo kevor ki, puo khrü bu zorei huomia morei huomia vakeshü le di kechükenyüko toupie chaüko nu thezhüko mu zoprieko gei pie zhüzhütaya. 16Süki themia krodidicü Jerusalem khieümhou rünako nunu kechükenyümia tsiu mesa kemo ruopfü bu u kebi zetuoketako ze vor, mu süko pete chü keshürhoshü.
Apostelko Kepechü
17Süki zievokezhatho-u mhatho chü sieta; puo mu puo ze ketuo pete (süko Sadukiko kro-u zo) u ro se sie di 18apostelko tepie kedieki nu khawa. 19Derei theva Niepuu dieliemia puo vor kedieki careu khrüshü di uko ze par, di sie, 20“Rüsuoki nu vo thalie di themia peteko ki kerheiprü dielie hako pete pushülie.” 21Uko hau sita tse, teisotie tuo rüsuoki nu le di mia petha bata.
Zievokezhatho-u mu puo zakroko vorlie tse uko mechükehouu mu Israel pehümia pete kieshü, sidi mia ketsepie kedieki nu shü di uko ze vornushü. 22Derei rüsuoki nu thenako sünu vo tse, kedieki nunu uko ngulie mota; süla uko la vor di pukecü, 23“Hie vo kediekiu khatsapie ba di ngulie mu kedieki kepfheko pete rei careko pfhe tha zo, derei hieko kikha khrü le ru miapuorei kinu bacü ngulie mo,” sita. 24Zievokezhako mu rüsuoki kepfheko mhokezhau thedze hau silie tse uko gei kedipuo chütie shicü lelie mo bata. 25Süki mia puo vor di sie, “Harie, nieko kedieki nu khapie kebako vo rüsuokiu nunu mia petha thate,” sita. 26Süla kezhau rüsuoki thenako zelie di uko pechüwa mo di ze vor, ukoe mia bu ketsie pie uko vakecü preiketa la.
27Siro uko ze vor kehouu mhodzünu thalie tse zievokezhatho-u uko ketso, 28di sie, “Hie nieko bu theza hau se petha hienu di nieko kha beishü, derei nieko kepetha dieu pie Jerusalem nu tshuwate mu themia hau zie pie hie gei shütuoü medo bate,” sishü. 29Derei Pitor mu apostelkoe uko die kela di sie, “Hie themia kekuo kehoupuo#5:29 Gk Themia ki rei. ki rei Ukepenuopfü die ze morosuokuo. 30U puonuoko Kepenuopfüe nie sei geinu puo goukewau Jisu chü perheiliete. 31Ukepenuopfüe puo chü pezhapie puo zatsashülie di puo bu Krütau mu u Kelakelieu chüliete, sidi thenoukedikelie mu kephoumako vakelie pie Israel tsüketuo la. 32Tsiu hie süko zhapuko zo, süsü tuoi Ukepenuopfüe puo die zekelieko tsükeshü Kemesa Ruopfüu rei zo,” sishü.
33Uko hau silie tse, uko nou rüpepie uko dukhriwa nyü sieta. 34Derei mechükehou nu Farisimia, Gamaliel ükecü thezhokepethamia puo, themia pete mhodzü therhu pfüyakezhau, sie thalie di doyopuo la themiako ze chazou pratanuta. 35Süsie puo uko ki, “Harie Israelmiako#5:35 Gk Themiako., nieko themia hako gei kedipuo chütuoü ba shi, menuoliecie. 36Kekreilamonyü thiedzü Theuda, puo thuo puo üse mia puo üdi sier, mia krie dia mese puo siemedziketa dze rükra batuo; derei puo dukhriwa, mu puo siedziko pete rei whuo kecürewa di jüte. 37Puo sie nuolhou phrükecü teiu nu Juda Galil-u la sier; mia bu puo siemedzilie, puorei siata mu puo siedziko pete rei ta u ketuora si mote. 38Süla a nieko ki pushütuo, hau nyie nu rei themia hako gei nie ketheliecie, uko khashüwalie; kekreilamonyü mhatho hau morei chükezhü hau themia kinu zo liro thalie lhotatuo; 39derei Ukepenuopfü kinu vor üro nieko süko penyülie kenjü, nie thuo Ukepenuopfü ze keperhie ketha zotatuo.”
Sitse ukoe puo die rünyülie, 40sidi ukoe apostelko kie la ze vorlie tse uko vüwa, mu uko bu Jisu za se pu sa hienuwa di uko bu tuota. 41Uko mechükehou nunu tuota tse uko nei siei vota, uko bu theza süu la kemezhie di zhasepfü süü uko phrülieketa la. 42Siro uko teisonhie rüsuoki nu mu huoniehuo ki nu rei Jisue Khristau zo ükecü se mia petha mu pu mia kie ba zota.
Sélection en cours:
Mhakechüko 5: ANBRBSI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible Society of India
© 2023, Used by permission. All rights reserved. More
