Luka 10

Ɗǝn Maa Sum Warkǝ Tarɓa Nyar Mɓaa

1Dǝbarin kaɓana, Mulok Yesu varshii asum warkǝ tarɓa nyar mɓaa, kǝshii maa angaa byaa mee ya, pang tok yen mɓaa mɓaa, ka kaa nak kǝshii nzup maa ndar, ɗaa raa mang kǝng ruɗa naaki ta. 2Pang ɓan yen ka, “ˈYoɓan maa awuu ɗǝn ng pyak, pang angaa ˈyoɓaki a ɗǝng nak, tung kaɓan kǝ yin kwarshii Vitorng ˈyoɓan ɗǝn ki, kǝ ton angaa shaaki. 3Naan! Kǝ yin yokghai kaa, ng tok yin ni kan kee acak ri, kǝshii maa pooni nyaa 4Kǝ yin wur zaring pyar rak, ɗǝ zari, ɗǝ awukuɓol, kǝ yin nak shaa waryaa ɗaa sum ta gwarshaa rak.

5“Nzup lokng kǝ yin ni lǝr ta, kǝ yin shee ka, ‘Ɗaang wusungaa kǝ lǝr ta lok ryaa.’ 6Ng asum kaa ɗaaki ta kǝshii lok kyaa, ng ayen ni angaa ruɗa ɗaang wusungaa ni, shee kǝ waryaang ɗaang wusungaa yin kǝ ɗaa ɗǝ yen. Ng pang ayen ni ta rak, shee kǝ ɗaang wusungaa yin kǝ por ta yinaa. 7Shambalan taa lok kyaa, kǝ yin rii ɗǝ swaan nzup maa wura ryaan kǝ a na yin, tung ka angaa ɗǝn kun kaa pǝr yen, kǝ yin sǝri lokghaa lokghaa rak.

8“Ng yin ni lǝri ta, nzup maa ndar kyaa ndarng kǝ ayen ni yal yin, kǝ yin rii nzup maa wung kǝ a na yin. 9Kǝ yin bar ɗaa angaa ndus kwana taa ndar kyaa, kǝ yin shee ka, ‘Tǝruun Vitor taa yaa pyet ɗǝ yin.’ 10Nzup ndarng kǝ yin ni lǝr ta pang a yal yin nak, byaan naa gwarshii ta kǝshii ndar kyaa, kǝ yin shee ka, 11‘Nzup ɗǝ ngututung ndar yin, kǝ mok war ta kuɓol waraa, wo pupos fur yin maa, kǝ yin yok ka tǝruun Vitor taa yaa pyet ɗǝ yin.’ 12Ng ɓanaa yin, naskǝng nanzwa maa par a ɓyakghaa yirang shorng Sodom kǝ ɓyak mang ndar pan.

Andar kǝ A Yal Vitora rak

(Mat 11.20-24)

13“Awuu visa sokghaa yin, yinaa angaa Korazin, awuu visa sokghaa yin, yinaa angaa Betsaida, tung ka awun shiisan ndus kaa shii kǝshii maa ndar yinaa, ng ayen ni wushii bang kǝshii Taya ɗǝ Sidon ni, a wuu shiiɓǝl aɗoo yen kaa kala shaan maa ram yena yongaa yongaa. A wuu ryaksa akǝrɓǝtng tǝku kaa fur nduri taa ndus yena. 14Viin nanzwa maa par a ɓyakghaa yiran shorng Taya ɗǝ Sidon kǝ ɓyak yin. 15Yinaa angaa Kafarnahum! Yin ta ɓyaa kyaa kan kee makghaa yin wura naa yin toora nyaa? Ko njot! A fwaa ku ni ara maa angaa kuusa.

16“Nzup mung kǝ meni yir yin, mani pang yir mi. Nzup mung kǝ van yin mani pang van mi. Nzup mung kǝ van mi van mung kǝ tok mi ni.”

17Asum warkǝ tarɓa nyar mɓaa ki, por, ɗǝ katla maa ɗoo. A shee ka, “Mulok, ayiɓi maa a yir war ng war ni ɓan yen nung kǝshiin tǝsak mwaa!”

18Yesu pal yen ta ka, “Ng, ɓee Shetan war toora piri, kan kee nyandala ri. 19Yiran tǝɓii! Ng na yin ɓyakghaa min kǝ yin tapshii awuvi ɗaa nee, kǝ yin ɓyak shadna mu vana yin, awuu visa sokghaa yin nak. 20Tung, kaɓan kǝ yin shii katla maa ɗoo ka ayiɓi yir yin nak, shaan katla maa ɗoo ka a warang tǝsak yinaa kǝshii toora.”

Yesu Shi Katla Maa Ɗoo

(Mat 11.25-27; 13.16-17)

21Pang tǝ tang Awurkin zar ryak Yesu shiil ɗǝ katlan maa ɗoo, pang shee ka, “Ng katli aɗoo ɗǝ wok dǝ min Vitor, wokghai mu toor ɗǝ ndar tung ka a ɓuɓii awu mari ta angaan kaa ɗǝ yokgha, ɗaa angaa sakghaɗa, pang a zhak angaan kaa yok awen nak, ng kaɓan ni dǝ war, tung ka mee ni awung kǝ kun ku ma.

22“Dǝ min ɓwak nam mi nzup maa awen naa, muɗakghai yok mi makghai fan ki rak shee dǝ min en. Mu ɗakghai yok dǝ min rak, shee makghai fan ki ɗǝ mung kǝ fan ki tee ma ka kǝ zhak ma.”

23Pang Yesu shiiɓǝl ta angaa byaa myaa, pang ryak yen nung kutwaa, yin ni kǝ, “Yin ɓee awung kǝ yin ɓyaaki ri, Vitor fur myak zar mee yaa ta shii yinaa. 24Tung kaɓan ng ɓana yin ka angaa fwan nung Vitor pyak ɗaa ruu ruɗaki kaa ɓee awung kǝ yin ɓee, pang a ɓee rak, awung kǝ yin yiri pang a yiri rak.”

Agarang Sum zar Mu Samariya

25Vii yena ta, kǝ Yesu ta maksa asum maa, mu yokghan shiiring Musa nanzu tung kǝ kam Yesu. Shee ka, “Viikuta, yeni pang ng shaak kǝng sokghaa fedna mang ɓetki ɓetki paa?”

26Yesu pal ma ta ka, “Yani pang shiiring Musa ki shee paa? A kori a yiri kacee?”

27Sum ki palta ka, “Kaa rud Mulok Vitor mu nzup ɗǝ sura mu, ɗǝ aɗoo mu, ɗǝ shadna mu, ɗǝ sakghaɗa mu, ‘Kaa rud sum mu pyet ɗǝ wok kan kee shii muri.’ ”

28Pang Yesu shee ka, “Kaɓan ni, a shee ta giri kyaa. Shi kaɓan a sokghaa fedna mang ɓetki ɓetki.”

29Sum ki ruɗaki kǝ bonji shiimee, shee yiɓǝn Yesu ka, “Nani sum min paa?”

30Yesu palta ka, “Sum yen sǝra cir ma kala Urushalimaa jira naaki Jeriko, akoos kom ma. A ɓwakshii nzup awung kǝng ɗǝ mee, a ruushii ma, a kala ma nung kwaa yaa. 31Sungwarin Vitor#10.31 Asungwarin Vitor: Ayen ni angaan kaa shaa ɗǝng napɓan kwak lokng Vitora. (Ɓasak dak nung.) sǝra cir ma ta shii kyaa, mee kǝ ɓee ma shee kom nggǝra. 32Mu Lawuya#10.32 Lawuya: Ayen ni angaan balkam Lawi, ng kaa ɓwakghaa Asungwarin Vitor shaan ɗǝn lokng Vitora. yen, sǝra cir ma ta shii kyaa ket mee maa kom nggǝra. 33Shee mu Samariya#10.33 mu Samariya: Asum ni mang kǝ angaa Yahudu vana yen. (Ɓasak dak nung.) kǝ sǝra cir ma. 34Mee kǝ taa ɓee sum ki pang ɓee shoor mee. Taa cir ma bonjin maa akulur ɗǝ min nggam turshii maa noo pang shiirshiing maa. Cir ma foo shiin zung lok myaa, pang wunak ma lok maa shenyaa ˈyii yis mee. 35Kǝ ara tashii, na mu lok maa sheeni ki dinari mɓaa, shee ɓan ma ka, ‘Ɓasang maa sum ni, mani por nzup awung kǝ woni wun meni ɓyak kan ng pǝra ku.’ ”

36Yesu yiɓǝn ma ka, “Ta kǝshii maa sum taat ryaa nani sum mee paa?”

37Shee mu yokghan shiiring Musa palta ka, “Mung kǝ ɓee shorng sum pan, mee ni sum mee.”

Shee Yesu ɓan ma ka, “Nakghai kaa ɗǝ kǝ shaa kaɓan.”

Yesu Lok maa Marta ɗǝ Maryamu

38Yesu ɗaa angaa byaa mee a kap shii naaki Urushalima a ta gang ta fan ndar yena, ta ndar kyaa yii yen ta tang kaa tokghaa ma ka Marta, shee yel yen ˈyii lok mee ya. 39Ng ɗǝ azǝ mee kǝ tǝsak mee ka Maryamu, Maryamu taa ɗa ta nggǝrng kuɓol Mulok Yeswaa kǝng yira awung kǝ Yesu maksaki. 40Pang Marta lǝr ɓora gyer ta shiing azǝ mee Maryamwaa, ɗǝ shaa maa awura ryaang kǝng ta ɗǝsa kyaa, shee nak ta Yeswaa, pang shee ka, “Mulok, a ɓyaa bungaan kǝng ta kǝshii kyaa rakghaa? A kala azǝ min kǝng ɗaaki ta nggǝr mwaa, ɓan ma ka kǝ taa ɓwak mi ta.”

41Pang Mulok Yesu pal ma ta ka, “Marta, Marta, a yarsa karkǝɗoo mu shii maa awuu pyakghaa. 42Awuu gaat ni pang a yaraki. Azǝ mu Maryamu ɓwak tee awuu zaraa, mang kǝ a sham kaa yel ta kwak myaa rak.”

Sélection en cours:

Luka 10: (Boi) Tiyaa

Surbrillance

Copier