Mataayo 7

Ameeghi ighoro e ghotena ekiina

(Maariko 4:24; Ruuka 6:37–38, 6:41–42)

1“Motatenera ekiina abhande, motaacha na niinyu ghoteneru ekiina ne Eryobha, 2gho kubha iryo ndekobhatenera ekiina kurëngʼaana na kebhuno moghotenera ekiina abhande. Wiiki ekirëngërë kino mokurëngëra abhande, nikyo kiyo kiyo na niinyu Eryobha rekobharëngëra.

3“Ngwake okumööhërëri aghasaara kano kaanyi mo‑riiso re mughëndi waacho, amare tookorighi eghisaara kino keenyi mo‑riiso reecho? 4Wiiki, nibhu oghotora komobhoorera omughëndi waacho kubha, ‘Tigha nekaruusi aghasaara kano kaanyi mo‑riiso reecho,’ eriibhagha iye mwene noonyi ne eghisaara mo‑riiso reecho? 5Mobhe onyi iye! Oruusi singa eghisaara kino keenyi mo‑riiso reecho, niho oghotora korighi bhoheene koruusi aghasaara kano kaanyi mo‑riiso re mughëndi waacho!

6“Motaha chaseese ebheghiro ebhitööbhiyu, hande kurëkërëra chambeechi ebheghiro bhe riighori ikoro. Aribha moraköra hangʼu, nchekobhetiitacha cheramara nchekobhiigharurani na kobharööna.

Ameeghi ighoro e ghusabha Eryobha

(Ruuka 11:9–13)

7“Musabhe Eryobha na niinyu mokuhaabhu. Mutabhare na niinyu mokubhöna, moraköngʼööta eghisëku moghwighoreru, 8gho kubha omooto wowoose uno aghusabha, Eryobha ndekomuha, wowoose uno aghutabhara, Eryobha ndekomuha. Wiiki, wowoose uno aghuköngʼööta eghisëku, Eryobha ndekomwighorera orwighe.

9“Kana, n‑niwe ghate yaanyu uno omoona waache aramusabha omughaate, nakomuha eriibhohe? 10Hamu aramusabha asu, nakomuha anchöka? 11Nangabha moonyi bha masari, mweche kobhaha abhaana bhaanyu ebheghiro ebhichömu. Mbe! Taanyi hëënë kubha, Taata waanyu uno anyi Mwishaaro naghuköra ghokera ghayo? Mahëënë nakobhaha ebhichömu bhoose bhano bhakomusabha!

12“Mbe, mobhakörërë abhaato abhande kinya bhuure mokwënda bhabhakörërë inyu. Kiyo nikyo egheteemoro ke meghiro ghe Musa na ameeghi gha bharööti.

Ghusöha mo‑bhutëmi bho Ryobha

(Ruuka 13:24)

13“Musöhë gho kohetera mo‑kehita egheghute, gho kubha ekehita eghighare ngekwërëkëra mo‑ghosireekerera, na anchëra e kwërëkëra iyo n‑ingare chwee. Wiiki, abhaato bhano bhakohetera‑mu, m‑bhaaru. 14Amare ekehita kino ghekwërëkëra mo‑bhuhöru n‑gheghute, na anchëra e kwërëkëra iyo n‑inkërëghësö, n‑abhaato bharëngʼaaneru hangʼu bhano bhaghotora koyimënya anchëra iyo.

Abharööti bha bhuröngö mbakumënyëkana kwo makorobhese ghaabho

(Ruuka 6:43–44)

15“Mubhe miisho na abharööti bha bhuröngö. Ibho hano bhakobhatambana, mbaghwiköri kubha kinya changʼöndu. Amare mo‑metema gheebho n‑chasuuche ihaari. 16Bhayo mokobhamënya kwo makorobhese ghaabho, gho kubha abhaato bhataaghotu chaseeke mo‑mote o sagharame. Wiiki, bhataaghotu amakorobhese gha chasabhiibhu mo‑mete ghe michongoma. 17Mbe, omote omuchömu nohaasönga amakorobhese amachömu, amare omote omobhe nohaasönga amakorobhese amabhe. 18Toonyi‑ho mote omuchömu uno oghusönga amakorobhese amabhe. Wiiki, toonyi‑ho omote omobhe uno oghusönga amakorobhese amachömu. 19Mbe, omote woose uno otaaghusönga amakorobhese amachömu, nokonungu na kurëkëru mo‑mororo. 20Mbe, abharööti bha bhuröngö bhayo mokobhamënya kwo makorobhese ghaabho.

Abhaato bhano bhaghusöha mo‑bhutëmi bho Ryobha

(Ruuka 13:25–27)

21“Taanyi omooto woose uno akomboorera, ‘Oo Omutëmi, oo Omutëmi,’ uno aghusöha mo‑bhutëmi bho Mwishaaro. Amare omooto uno aghuköra amiigha gha Taata waane uno anyi Mwishaaro, uyo, niwe aghusöha. 22Mo‑rosiko ro ghoteneru ekiina runo rokuucha, abhaato bhaaru mbakomboorera bharabhugha, ‘Oo Omutëmi, oo Omutëmi! Kana, teenyi kwo riina reecho ꞉ntooruusiri obhurööti, na kuhëëbha emisambu na ghuköra ebheroghooro bhyaru?’ 23Niho nekobhabhoorera haheero kubha, ‘Ntebheeche inyu koru orosiko rumu! Moru hano, inyu abhaköri bha mabhe!’

Kwabhëka mwitare hamu mo‑mwishekeenya

(Ruuka 6:47–49)

24“Mbe, omooto wowoose uno akooghu amangʼana ghaane na ghoghaköra, natuubhiine no omooto uno anyi na amangʼiini uno abhëkiri anyumba yaache mwitare. 25Eriibhagha re twigho, orooche roghiichora roghataara, obhukama bhuhaari bhokahuuta na anyumba yiire eghatughutu. Koru hangʼu anyumba yiire teghwire gho kubha obhoroso bhooche mbwabhëkuru mwitare. 26Amare omooto wowoose uno akooghu amangʼana ghaane, ange ghoghatereera, uyo, natubhiine kinya omooto omuraghaanu uno abhëkiri anyumba yaache mo‑mwishekeenya. 27Eriibhagha re twigho, orooche roghiichora roghataara, obhukama bhuhaari bhokahuuta na anyumba yiire eghatughutu, hayo hayo eghagho gho kerighiti ghekoro ‘Tii!’”

28Hano Yesu amariri ghosiikëra amangʼana ghayo, obhoyo bhuure bho bhaato bhokaroghoora chwee kwo meeghi ghaache. 29꞉Ngaaroghooriri gho kubha ameeghi ghaache ghataare kinya gha bheeghi bhaabho bha meghiro, amare ꞉neeghiri kinya omooto uno anyi no obhotoro.

Sélection en cours:

Mataayo 7: ntk

Surbrillance

Copier