Mataayo 8

Yesu ˆakamuhöri omubhabharu o mbiti

(Maariko 1:40–45; Ruuka 5:12–16)

1Hano Yesu ikiri mo‑gheghoro, erikinda ikoro re bhaato rekamutambana. 2Mööhi! Akaacha omooto umu uno anyi no obhubhabharu bho mbiti, akabhuna ebheru ambërë e Yesu, akamobhoorera akabhugha, “Oo Omutëmi, örëënda, noghotora koomusa.”

3Yesu aghaghöröröki okubhökö akamoturi, akamobhoorera akabhugha, “Nekwënda, omusu!” Hayo hayo, omooto uyo akahöra obhubhabharu bho mbiti. 4Akamara Yesu akamobhoorera akabhugha, “Mööhi, otabhoorera omooto wowoose angʼana ino! Amare, nooghi wiyërëkani mo‑muchaama na koruusi amaruusi kinya emeghiro ghe Musa ghekwërëkërëri,#8:4 Mööhi Abharaawi 14:1–32. kwërëki kubha nuhöriri.”

Obhokumi bho mooto o matöngö

(Ruuka 7:1–10)

5Hano Yesu asöhiri mo‑moghya o Kabherenawumu, omokoro umu o bhaashirikare akaacha ghusabha Yesu amusakeri, 6akabhugha, “Oo Omutëmi, omutamishi waane nakuure eribhaara, nakunyaaka chwee.”

7Yesu akamugharokeri akabhugha, “Nekuucha komuhöri.”

8Amare omokoro uyo akamobhoorera kubha, “Oo Omutëmi, nteekurëngʼaanera usöhë awaane. Amare noobhughe angʼana hangʼu, no omutamishi waane nakuhöra. 9Koru eni woose neenyi haase e bhukangati. Wiiki, neenyi na abhaashirikare bhano bhaanyi haase yaane. Neramobhoorera umu kubha, ‘Nooghi,’ hayo hayo aghi. Wiiki, neramobhoorera owonde kubha, ‘Nuuche,’ hayo hayo acha. No omusësë waane neramobhoorera, ‘Ukörë hangʼu,’ woose nibhu aghuköra.”

10Hano Yesu oghwire amangʼana ghayo, akaroghoora chwee. Akabhabhoorera bhano ꞉bhaare bharamutambana akabhugha, “Mahëënë ˆnekabhabhoorera, ghate e Abhiisiraeri bhoose, ntiimara ndighi omooto wowoose uno anyi no obhokumi bhokoro bhonga bhuno! 11ˆNekabhabhoorera kubha abhaato bhaaru mbaakoru chambaara choose che se na ghusöha mo‑bhutëmi bho Mwishaaro. Mbakuucha kuraaghëra haghirohamu na Abhurahamu na Isaka na Yakobho. 12Amare bhano ꞉bhëëndiiru kubha mo‑bhutëmi bhuyo, mbakurëkëru anche mo‑kengʼuuri. Hayo mbakorera na ghukararaati amiino gho ghiri e bhuhëmbërëra bhuhaari.”

13Mbe, Yesu akamobhoorera omokoro uyo akabhugha, “Nooghi aka! Ibhe kinya obhokumi bhoocho bhoonyi.” Omutamishi waache akahöra kwo riibhagha riyo riyo.

Yesu ˆakabhahöri abhaato bhaaru

(Maariko 1:29–34; Ruuka 4:38–41)

14Hano Yesu asöhiri mo‑nyumba e Bheetero, akamubhöna nyinabhiyaara Bheetero amisiri a‑bhorere, aghööturu ne ekihëënö kihaari chwee. 15Mbe, Yesu akamoturi mo‑kubhökö, hayo hayo akahöra ekihëënö kiire. Niho akabhooka, aghasëëma komuhökëri.

16Eriibhagha re mughörööbha, bhakamurëëtëra Yesu abhaato bhaaru bhano ꞉bhaare bhaghööturu ne emisambu. Nawe aghaghihëëbha emisambu ghiire kwo ngʼana yaache. Wiiki, akabhahöri bhoose bhano ꞉bhaare abhabhabharu. 17Ghayo ꞉ngaaköruru kubha ehikeerane angʼana yiire esiikiiru no omurööti Isaaya kubha,

“Omwene ꞉niimokiri obhutöbhu bhwito,

na ghoghaghëgha amabhabharu ghiito.”#8:17 Mööhi Isaaya 53:4.

Komutambana Yesu n‑ghuköngʼu

(Ruuka 9:57–62)

18Hano Yesu arooche kubha abhaato bhaaru bhakamwinaareri, akahatëka abhaanabheegha bhaache kubha bhatëënyë anyancha bhaghi amwambuko. 19Mbe, omweghi umu o meghiro aghiishuka o‑Yesu, akamobhoorera akabhugha, “Oo Omweghi, hohoose hano oghuye, neghoghutambana.”

20Yesu akamugharokeri akabhugha, “Chaambwe ncheenyi na chakoobho ne ebhinyönyi mbeenyi ne ebhenyumba. Amare eni uno neenyi Omoona o Mooto nteenyi koru na ha ghotoora omutu!”

21Mbe, omoonamwegha owonde akamobhoorera Yesu akabhugha, “Oo Omutëmi, nonyisherereri singa neghi nemoryeke taata waane.”

22Yesu akamugharokeri akabhugha, “Iye nutambane! Abhaato bhano bhataakorekumi Eryobha n‑kinya abhaku.#8:22 Mööhi Ruuka 15:24, 32; Abhaebheeso 2:1. Tigha bharyekane abheene kwo bheene.”

Yesu ˆakahörëëri obhukama bhuhaari

(Maariko 4:35–41; Ruuka 8:22–25)

23Mbe, Yesu aghasöha mo‑bhwato, abhaanabheegha bhaache bhakamutambana‑mu. 24Hano bhahikiri ghateghate e nyancha, haakabha no obhukama bhuhaari chwee ne emekunda gheghasëëma ghokundekeri obhwato. Amare Yesu naare amisiri chandöörö. 25Abhaanabheegha bhaache bhaaghaye komobhooki, bharabhugha, “Oo Omutëmi wiito! Totoori! ˆToghasireekerera!”

26Iwe akabhugha, “Ngwake kana moghotiina, inyu abhaato bhano moonyi no obhokumi bhosuuhu?” Niho akiimeerera, akahiinya obhukama ne emekunda ghe manche, anyancha ekahörëëra. 27Abhaanabheegha bhaache bhakahagha, bhakabhugha, “Uno no omooto o ngabhu koru obhukama bhuhaari ne emekunda ghe nyancha ghekomosooka?”

Yesu ˆakabhahöri abhaato bhabhere bha misambu

(Maariko 5:1–20; Ruuka 8:26–39)

28Hano bhahikiri amwambuko mo‑se e Bhaghatara, abhaato bhabhere bhano ꞉bhaare ne emisambu bhaghatëmëërana na Yesu bhararwera mo‑chambeehera. Abhaato bhayo ꞉bhaare ne emisambu, m‑bhahaari chwee ꞉bhaare, na taanyi‑ho omooto uno asakiri kohetera mo‑nchëra iyo.

29Mbe, ghaghaköra eriireghe gharabhugha, “Oo Omoona o Ryobha, neke okwënda ghokwito? Kana, wichiri hano ghotunyaaki eriibhagha riito rekeere?” 30Haghuhe hayo ndeere‑ho erikinda ikoro re chambeechi rerariishi. 31Niho emisambu ghiire ghekamusasaama Yesu gherabhugha, “Aribha oghotuhëëbha, ototome tusöhë mo‑rikinda riire re chambeechi.”

32Yesu akabhabhoorera akabhugha, “Mughëndë!” Mbe, emisambu gheekaru mo‑bhaato bhayo, gheeghaye gheghasöha gho changuru mo‑chambeechi chiire. Hayo hayo erikinda riire ryose rekahiringita rerahe rekiihöngörëra mo‑nyancha, reghakwera‑mu ryose.

33Hano abhariishi bha chambeechi bharooche ghayo, bhakangʼösëra mo‑moghya. Bhaghasëëma kobhabhoorera abhaato ghoose ghano ꞉ghaaköruru na gha bhaato bhaare ꞉bhaare ne emisambu. 34Abhaato bhaaru bha mo‑moghya, bhakamutambana Yesu. Hano bhamorooche, bhakamusasaama chwee kubha aru mo‑se yaabho.

Sélection en cours:

Mataayo 8: ntk

Surbrillance

Copier