Matyo 3
3
Tûm ə Jɔn wù fuu u mmuu n Kəzə̀
(Mak 1.18; Luk 3.1-18; Jɔn 1.19-28)
1N nəŋə zey Yeso â muunə n Nazaled, Jɔn Wù fuu u mmuu n Kəzə̀ mə n kaʼ tsu ni naʼa tûm Kəzə̀ n mbvən ə ntsaŋ n mboʼ ə Judeya. 2Tə n naʼlə bə nə̀, “Kwey nuu bə na fə̀ŋ tə ghaa tə n ghəə a bəbə ghə, n təŋkey, fɔ̀ɔ wə idəŋ wə n shɔd.” 3Jɔn wən loʼ wù wey wù tûm ə Kəzə̀ Ayzaya â dza naŋanə ghəə ghə bòʼ wi nə̀,
“Wù buʼu kəbɔŋ n mbvənə ntsaŋ nə̀,
‘Faalə naŋa tsu na jii tə̀ Mûkəbii,
Ghaa naalə jii wi nə zə i loʼ tsətsəghə.’”
4Jɔn â dzəŋə keeli təndzə̂ nə ghə faalə n gow nyam i loʼ zə ghə tɔŋŋənə nə̀ a loʼ kamel, tə n kow keeli kwɔɔ fə gow nyam nə isad. Fəzəə u wi wə n loʼ təbii nsə zow tə. 5Ghə̂ a Judeya adzəm, ghə̂ a Yerosalem, nsə ghə̂ a nàʼa mən n loʼnə n nguŋ ə dzuu Jodan n nyəŋə bəghə n səə wi. 6Ghə n dza ndòw bəb i ghə tə̀ Jɔn, Jɔn n fuu ghə n mmuu n Kəzə̀ mə n dzuu Jodan.
7Ambə Jɔn koʼ tsunə ndəmə ghə̂ a tə Falasi nsə ghə̂ a tə Sadusi a bəghə soʼonə ni bə ney mmuu n Kəzə̀, tə n dza tə̀ ghə nə̀, “Ghaa loʼ tə̀ a loʼ zuu tə̀ bəbə tə! À ghaa mbɔŋ tsə̀ ndee nə̀ ghaa tyi ngoʼo Kəzə̀ zən i bəghənə ə? 8I ghəŋŋə ndòw na ghəə ghey a loʼnə tsətsəghə ni dii nə̀ ghaa n màʼa ghəə a bəbə a ghaa ghə. 9I kə̂ ghaa nə moʼlənə nə̀ ghaa loʼ ni zə̂ kətow nghee ghaa dzanə nə̀, ‘Ghey loʼ waa waa ghə Abraham’ n təŋkey, Zə̀ kə loʼ ni ney kɔʼ tay ghən, tə ghəŋə nə̀ a doʼo waa ghə Abraham. 10Fôw i loʼ tən n key ghə nkaʼ, abə kàʼ fə məə way tam u dzuŋu wə, ghə i fùŋ maʼa, ghə ney maʼa ndòw nə uvəllə. 11N fa fuu ghaa n mmuu n Kəzə̀ mə nə mmuu, ni dii tsu nə̀ ghaa n fə̀ŋ tə ghaa tə kwey, wù wey tə bəghənə n baa mə̀, n tsəghəshi mə. N ka bùʼ kɔʼ kpii dzə ni boʼo gow tə wi. Tə i sow ghaa n daʼa kə Zay kə Zow kə nsə nə uvəllə. 12Tə khə tən neeli kə wi n wɔɔ ni fəəbə təndzoʼ tii. Tə i fəəbə naŋa ndòw ndzoʼ tə dzuŋu tə nə utaa, tə kàŋ kpəghə maʼa ndòw ghow u tii wə n vəllə wey u nəmmə koʼo tsə way.”
Yeso ney mmuu n Kəzə̀
(Mak 1.9-11; Luk 3.21-22)
13Nghee Jɔn â fuunə ghə̂ ghə n mmuu n Kəzə̀ mə, Yeso n nuu tsu n Galili bə ni bə ney mmuu n Kəzə̀ n wɔ Jɔn n dzuu Jodan. 14Jɔn n dza i tuu, bəb tə̀ wi nə̀, “Wə̀ sə̀ kəm loʼ ngee ni bə n səə mə nə̀ n fuu wɔ n mmuu n Kəzə̀ mə, loʼ sey nə̀ à khə wɔ̀ ni fuu mə n mmuu n Kəzə̀ mə ə?” 15Yeso n fəd dza ndòw tə̀ wi nə̀, “Maŋ ghəŋə ndow kənu, n təŋkey, à loʼ ghəə zey i kpiinə ni ghəŋə n sə̂ K-a-zə̀.” Jɔn sey bəghəm kɔʼnu ni fuu wi n mmuu n Kəzə̀ mə.
16Nghee tə Yeso ney kɔʼnə mmuu n Kəzə̀ mə, shiə kɔʼɔ bə n dzuu, bikighow kə n nuu chi i tsu, tə n kòʼ Zay K-a-zə̀ kə tsuu bənə n wû u kəfə̀, tsu mwaa tsu n kow wi. 17Ghə n zow dzə̂ i loʼ zə i ghɔɔmə shiə tsu bənə n bikighow dza, “À wən loʼ waa wuŋ u tsuʼu wə, à loʼ wi tə i ghəŋŋənə nə̀ mə i ngii duʼlə.”
Sélection en cours:
Matyo 3: WEH
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2022 CABTAL
