Lukas 23

Ghə ney ndow Yeso n səə Pilato

(Mat 27.1-2, 11-14; Mak 15.1-5; Jɔn 18.28-38)

1Sey, ngəd tə inaʼ, ghə fɔɔngili a nii ghə nsə ghə̂ a nii ghey n dzəŋi kə dzûmə tə Klisto n dzəŋi nuu kɔʼ, ney ndòw Yeso n səə Pilato. 2Ghə n kaʼ ni bàŋ dzuu i wi dza, “A kwu wù wən tə tsə̀ə bəəbənə ghə̂ a naʼ i Təjuu ghə nə kə ghə nə̀ tsownə màʼlə kə tə̀ Kaysa, tə tɔŋŋə soʼo wû u wi nə̀ i loʼ wù wən Zə̀ kə â dza naŋa nə̀ i tûm bənu, dii tsu nə tə loʼ Kədə̀ŋ.” 3Sey, Pilato n bəb ndòw tə̀ wi nə̀, “I sey dii nə̀ wə loʼ də̀ŋ kə ghə̂ a Təjuu ə?” Yeso n beeli ndòw wi nə̀, “I loʼ tə̀ wə dzanə.” 4Sey, Pilato n dza ndòw tə̀ ghə fɔɔngili a nii ghey nsə nɔ̀ɔ kə aghə̂ key nə̀, “N ka kòʼ dzə ghə i bəbə i loʼ zə wù wən ghəŋŋə tə n loʼ ni saʼ wi.” 5Ghə n mgbay kənu dza, “Tə dii kaabənə aghəə, ghəə a tii ghə a teyyə naŋa kɔʼ naʼ i Judeya zə idzəm nə ifuu. Tə â kaʼ n Galili, dii sa bə kûm bə fa.”

Pilato tûm ndow Yeso n səə Herɔd

6Nghee tə̀ Pilato zow tsu nə sey, tə n bəb tsu nə̀, “Wù wən loʼ wù Galili ə?” 7Ambə tə Keeli tsunə nə̀ Yeso shi bə n mbùʼ zey Herɔd saʼanə, tə n tûm ndòw wi n səə Helɔd. A n suumə loʼ soʼo nə Helɔd loʼ n Yerosalem 8Helɔd â ngii duʼlənu ni koʼ Yeso təŋkey tə mâ zow ghəə ghey Yeso â ghəŋənə, sey, tə n ləghə ni koʼ wi, moʼlə kə nə̀ Yeso î ghəŋənu faalə n loʼ mə̀. 9Sey, Helɔd n bəb Yeso n ndəmə tə aghəə tə, Yeso n ka beeli dzə wi. 10Ghə fɔɔngili a nii ghə nsə ghə̂ ghə ulaŋ ghə n loʼ fu bàŋa dzuu i Yeso. 11Herɔd nsə sawgoʼ tə wi tə tsɔɔmə kow tsu Yeso, lab tsu wi n saŋ i dzuŋu zə, tûm dzəŋŋə ndow wi n səə Pilato. 12N tsuʼ fə tii fə kə, Helɔd ghi Pilato n doʼo bə afə̂, loʼ sey nə̀ ghə â buʼu baa tsə iwû.

Ghə tsəʼlə saʼ n tow kə Yeso

(Mat 27.15-26; Mak 15.6-15; Jɔn 18.39–19.16)

13Ambə ghə bə dzəŋŋənə, Pilato n tɔŋɔ naŋa bə ghə fɔɔngili a nii ghə, ngəd tə inaʼ, nsə ghə̂ ghə adzəm. 14Tə n dza tə̀ ghə nə̀, “Ghaa ney bə wù wən fa n səə mə̀, dza tə̂ tsə̀ə bəəbə aghə̂ nə inaʼ, nya, mə n ghəə a wi ghə saʼ n sə kə ghaa, mə n koʼ tsunə nə̀ tə̂ kà ghə i loʼ i ghəŋə bəəbə dzə n ghəə ghən ghaa taŋŋə kɔʼ bənə. 15Herɔd kà kòʼ soʼo ghə i bəbə i loʼ zə tə ghəŋə nə̀, a wən loʼ ghə i tii zə tə̂ tûm dzəŋŋə bənə wi. Sey, wù wən kà ghəŋə dzə ghə i bəbə i loʼ zə tə a loʼ ni wey wi. 16Mə i fuu tsu kə wi n fən mə, n zəghə maʼa wi, tə ndòw nuu.” 17[Zə n loʼ tsə nə̀ Pilato khə ni zəghə maʼa shi bə wù ndaw tsaʼ umɔʼ tə ghə̂ ghə Izree n nəŋə i Kəzə̀ i Paska.]#23.17 Maʼlə u loʼ u khə way kəm kə kən. 18Nɔɔ kə aghə̂ key n fəd buʼ shi kɔʼ kəbɔ̂ŋ dza, “Wey na wi ghaa kee fu bə Barabas tə ghey.” 19(Barabas â loʼ wù loʼ ghə â fii naŋanə n ndaw tsaʼ kûm nə tə â khə kəwɔɔ n zùù zey zə â shinə inaʼ, nsə nə tə â wey wù). 20Pilato n kəm ghɔɔmə̀ ndòw tə̀ ghə n təŋkey, tə â ndzəmə ləghənu ni zəghə maʼa Yeso. 21Ghə n fəd buʼu shiə kɔʼɔ nbɔŋ dza, “Baa na wi n zat kə fəkaʼ! Baa na wi n zat kə fəkaʼ!” 22Pilato n kəm ghɔɔmə ndòw tə̀ ghə ni ghəŋə tənəŋə tətəghə dza nə̀, “Ghaa dza nə̀ n wey wi nə à loʼ kee? À loʼ ghə i bəbə i ghaa zə tə ghəŋənə ə? N kà koʼ dzə ghə i bəbə i loʼ zə tə ghəŋənə tə̀ a loʼ ni wey wi. Sey, n chɔdlɔ tsu wi, n zəghə maʼa wi.” 23Ghə n nam buʼu nay shiə kɔʼɔ kə n mbɔŋ dza nə̀ ghə baa wi n zat kə fəkaʼ. Sey ghə n saʼ zə i kɔʼ n mbɔ̀ŋ n ghə mey. 24Pilato n saʼ fu ndòw tə ghə. 25Sey, tə n chi zəghə maʼa tsu wù wey ghə â ləghənə. Tə n zəghə maʼa shi bə Barabas wey ghə a fii naŋanə n ndaw tsaʼ kùm nə tə̂ â khə kəwɔɔ n zuu zey zə â shinə inaʼ nsə nə tə̂ â wey wù. Tə n fuu ndow Yeso tə ghə nə ghə ghəŋə ghə zey ghə ləghənə ni ghəŋə ghi wi.

Ghə baa Yeso n zat kə fəkaʼ

(Mat 27.32-44; Mak 15.21-32; Jɔn 19.17-27)

26Nghee tə̀ ghə ney nuulə ndòw nə Yeso, ghə n kpi tsu ghi Shimun, wû naʼ i Sirin tə nyiə bənə n Yerosalem. Ghə n kwu tsu wi nə̀ tə boʼo zat kə fəkaʼ kə Yeso, tə i ndow n baa wi. 27Nɔɔ kə aghə̂ kə â loʼ n baa wi, gheyzən a loʼ ghə n loʼ tii ghə a mow bə nə deyyə bə bòʼ wi. 28Yeso n khə̀mə dza ndòw tə̀ ghə nə̀, “Zən a Yerosalem ghə, ghaa khə way ni dey bòʼ mə̀, ghaa khə ni dey tə wû i ghaa zə nsə tə waa a ghaa ghə, 29təŋkey, nəŋə i bəghənu ghaa i dza nə̀, ‘Buulə i loʼ tə̀ weyzən wən tə loʼnə kàakə, weyzən wən tə ka bɔŋ koʼ waa nkee weyzən wən tə ka nyɔŋŋə koʼ waa.’ 30A wey loʼ nəŋə zey ghə̂ a nə dza tə̀ kaʼa tə nə̀,

‘Bwù bə n kow ghey’, nsə tə̀ nguʼu wə nə

‘Tsəd naŋa bə ghey.’

31Kuum nə̀ abə ghə̂ a ghəŋŋənə ndzoʼo ghəə ghən nə kaʼ fə zòw nu, ghə i sə̀ jiə ngee abə fə zum tsu nə.”

32Ghə n ney ndòw soʼo ghə̂ a tsɔŋɔ a loʼ ghə abəghə, nə ghə ndòw wey dzəŋi ndòw ghə ghi wi. 33Ambə ghə kɔʼ nyinə n luʼu key ghə â tɔŋŋənə nə̀ a loʼ “Kaŋ k-a-tow”, ghə n baa kɔʼ Yeso fu n zat kə fəkaʼ ghi ghə a tsɔŋɔ ghey abəghə. Umɔʼ n kpii u wi u təmə wə, u loʼ wey n kpii u wi u kwɔɔ wə. 34Yeso n gɔŋŋə dza, “Bày neyzəə ghə̂ ghən təŋkey ghə khə way ghə zey ghə ghəŋənə.” Sawgoʼ tey n təm mboʼ ni keeli nghee tə ghə loʼnə ni dzaw ndzə tə wi tə n wû i ghə.#23.34 Kəm kən way dzə n màʼlə u sə isə u loʼ wə. 35Ghə̂ ghə n tey fu n ndəm, laalə ghəə ghey a tsəghənə. Ngəd tə inaʼ tə n kpaalə daŋŋə wi dza, “Tə â bəghəshiə aghə̂, tə bəghəshi tsu soʼo wû u wi nya bə a loʼ nə tə ndzəm loʼ Klisto, tə wən Zə̀ kə â sày naŋanə.” 36Sawgoʼ tey n tsayyə soʼo wi, bə fu bə wi n tsali kə nlə kə, 37dza, “abə wə̀ loʼnə Də̀ŋ kə ghə̂ a Təjuu ghə, bəghəshi tsu wû wə wə̀.” 38Ghə n tɔ̀ɔ naŋa kɔʼ n zat kə fəkaʼ fə wi nə̀, “À wən loʼ də̀ŋ kə ghə̂ a Təjuu.” 39Wù umɔ̀ʼ n ghə̂ a tsɔŋɔ ghey abəghə n kpaalə wi dza, “Abə wə khənə nə̀ wə̀ loʼ Klisto, bəghəshi tsu wû wə wə̀, wə̀ bəghəshi soʼo ghey.” 40Wù loʼ wey n kpaa ndòw wi dza, “Wə̀ tsəŋə way Zə̀ kə, n dza saa fa dzəŋi fəʼlənu n saʼ zey ghə â tsəʼlənə n kow saa a? 41Sa fəʼlə bòʼ ghəə a saa a bəbə ghə, sey, naamə kə saa kə kpiinu. Abə wù wən, tə ka ghə i bəbə i loʼ i ghəŋə dzə.” 42Tə n dza ndòw tə̀ Yeso nə̀, “Yeso, moʼlə mə, bə wə i loʼnə n fɔɔ wə.” 43Yeso n dza ndòw tə̀ wi nə̀, “N dza bə isəŋə tə̀ wɔ nə tsuʼ fə na fən wə i loʼ ghi mə idəŋ.”

Yeso kpuu n zat kə fəkaʼ

(Mat 27.45-56; Mak 15.33-41; Jɔn 19.28-30)

44Ambə nyi i kɔʼ təmi kɔʼ nə̀, ləm kə n bwùtsu nə inaʼ idzəm kùm ndòw n nəŋə zey nyi i bəŋənə tii. 45Nghee ləm kə bwù tsu nə sey, ndzə tey tə â kəŋ naŋanə luʼu kə zow kə n Ndaw Kəzə̀ i nii zə n Yerosalem n bàalə tsu bə nə ubad ubəghə. 46Yeso n dey shi kɔʼ n dzə̀ i taw zə dza, “Bày, zay kuŋ wɔɔ ghə.” Ambə tə dza tsunə sey, tə n tsəmə i tsu. 47Ambə wù nii ə təsawgoʼ koʼ tsunə ghəə ghən a shinə, tə n fu nkɔʼlə tə̀ Zə̀ kə dza, “Wù wən â kûm loʼ wù dzuŋu wə.” 48Ambə nɔɔ kə aghə̂ key kə â bənə fu ni bə laalə ghəə ghey a neynə bənə kə, koʼ tsu nə sey, ghə n mow, nuu dzəŋŋə ndòw n ndaw tə ghə. 49Fə̂ a Yeso nsə gheyzən ghey ghə â nuu bənə n Galili dzûmə bə wi n kee tey nə kədaa fwɔdlɔ bə ghəə ghey a neynə bənə kə.

Ghə tsəllə Yeso

(Mat 27.57-61; Mak 15.42-47; Jɔn 19.38-42)

50Wù loʼ â loʼnu ghə â tɔŋŋənə wi nə a loʼ Yosef, tə â shi n Alimatia n naʼ i Judeya. Tə â loʼ wù u dzuŋu wə, loʼ tsətsəghə n muu i wi, tə â loʼ soʼo n ndaw tsə a Təjuu 51tə â kee khə way wɔɔ kə n tsəm zey ghə̂ a Təjuu ghə â sətnə kûm Yeso, tə n ləmmə fɔɔ u Kəzə̀. 52Tə n ndòw kòʼ ndòw Pilato nə̀ i ney vən i Yeso. 53Pilato n bəghəm kɔʼ nə̀ tə ney, sey tə n ney tsu bə vən i Yeso, bàŋ kɔʼ nə ukə̂ŋ, naŋa nyi ndòw wi nə isay ghə â dzə nyi ndòwnə nə̀ kənaa. Say i tii zə n loʼ nə ghə ka kam tsəllə koʼ tsə wù tii. 54Â loʼ n tsuʼu kpəghə ghə â bayyənə ghəə ghə kûm tsuʼ inaʼ.

55Gheyzən ghey ghə â nuu bənə n Galili dzûmə bə Yeso n ndòw ghi Yosef, ndòw koʼ naŋa tsu luʼu key ghə tsəllə vən i Yeso zə nsə nghee ghə â bayyə naŋanə vən i wi zə tii 56Ghə n nuu dzəŋŋə ndòw n ndaw, ndòw bayyə naŋa tsu mmvə n ləmmə mən ghə tsoʼlə vən zə tii. Ambə n tsuʼ inaʼ, ghə n doʼo zayyə tsu tə̀ laŋ kə inaʼ kə â diinə.

Sélection en cours:

Lukas 23: WEH

Surbrillance

Copier