Lukas 19

Zakiə wù kwɔɔ u màʼlə kə tsow kə

1Yeso n nyi bə n Jeriko nə tə tsəghə daŋŋənu. 2Wù kwɔɔ u kəmàʼlə u nii u loʼ wə n loʼ fu ghə â tɔŋŋənə, nə a loʼ Zakiə. Tə n loʼ wù kûm wə. 3Tə n ləghə ni koʼ Yeso, ji n way təŋkey tə â ngii kəbətəbə nu, nɔɔ kə aghə̂ kə n bəghəm soʼo way nə tə koʼ wi. 4Sey, tə n nyəŋ nuu ndow isə, n ji zey Yeso khə ni tsəghə tii, ndow kɔʼ doʼo kɔʼ n kaʼ fə loʼ fə ghə tɔŋŋə nə̀ à loʼ sikamɔ nə i koʼ Yeso. 5Ambə Yeso bə kùm tsu nə fu, tə n laalə kɔʼ ndow idəŋ, koʼ kɔʼ ndow Zakiə, dza tə wi nə̀, “Zakiə, zaŋŋə shi tsu bə, n təŋkey, mə i na loʼ n ndaw zə.” 6Sey Zakiə n lumə tsu bə, kpii ney kɔʼ wi nə iduʼlə. 7Nghee tə ghə̂ a koʼ tsu nə sey, ghə n kaʼ ni nyuŋŋə ghɔɔmə dza nə̀, “Yeso bweyyə ndow n ndaw ndzoʼo wù wey nə̀ tə loʼ wù bəbə.” 8Zakiə n fəd nu təmi i kɔʼ dza tə Mûkəbii nə̀, “Mûkəbii, mə i fuu ndow kəm kə ufə kuŋ tə ghə̂ a laa ghə, abə mâ tsi kə nə wù loʼ, mə i tsə dzəŋŋə ndow, n tsə kuulə ndow tənəŋŋə təkaykə n taŋ a fə wey mə â tsinə wi tii.” 9Yeso n dza tə wi nə̀, “Zə̀ kə n bəghəshi ndaw zən na, n təŋkey, wù wən loʼ soʼonu waa sali ndaw zə Abraham. 10Kùum nə Waa wù sɔŋtsuʼ bə ni bə kəŋ koʼ nsə ni bəghəshi ghə̂ ghey ghə nay doʼo nə.”

Zəzəə fə fənkəfən kùum khəə u ngɔʼ mə itsaa ighəm

(Mat 25.14-30)

11Nghee tə ghə̂ ghən zəllə ghəə ghən, Yeso n ndow n sə kə ni dza ghə n zəzəə fə fənkəfən fə. Ambə Yeso kuʼlə may ndownə n Yerosalem, ghə̂ ghey n kee moʼlə kə nə fɔɔ u Kəzə̀ u nya loʼ ni bə. 12Tə n dza nə̀, “Wu nii u loʼ wə a bwey nay ndow n naʼ i loʼ zə, nə ghə tsuʼ wi fu tə a loʼ kədəŋ, tə i kəm dzəŋŋə bə. 13Ambə tə dza i nu, tə n tɔŋŋə naŋa tsu ghə̂ a kəfwaʼ a wi ighəm, fu ndow kay wù n khəə wə nə ghə loʼ ni tsə wù kəfwaʼ tii nə təndzɔŋɔ tətəghə dza, ‘Ghəŋə ndow na bikiwən kə, n bəghənu.’ 14A n loʼ sey, nə ghə̂ ghə inaʼ a wi a ləghə way wi. Sey ghə n tûm ndow aghə̂ nə ghə ndow dza nə̀ ghə ləghə way nə tə doʼo də̀ŋ kə ghə. 15Ambə ghə tsuʼ tsu wi tə a loʼ kədəŋ, tə n dzəŋŋə bə n naʼ i wi, daŋŋə tûm tɔŋɔ tsu ghə̂ a kəfwaʼ a wi ghey tə â fu nə ghə n khəə wə, ni kəŋ keeli kɔʼ fə key ghə keeli kuulə nə n bikiwən key ghə a ghəŋŋənə. 16Wù sə isə wey n dza, ‘Mûkəbii, mə n keeli kuulə khəə wə tənəŋə ighəm n khəə wey wə a funə.’ 17Tə n beeli ndow wi dza, ‘Wə loʼ wù kəfwaʼ u dzuŋu wə, n təŋkey, wə n laalə dzɔb nyanyi fə ufə fey mə â fu naŋa tə wɔ, sey, mə i naŋŋə wɔ tə a loʼ tsoʼ, wə i laalə kɔli tə ighəm.’ 18Wu u loʼ wey n bə dza, ‘Mûkəbii, mə n kəŋ kuulə khəə wə tənəŋə tətaa n khəə wey wə a fu nə.’ 19Tə dza ndow tə wi nə̀, ‘mə i naŋŋə wɔ tə a loʼ tsoʼ nə tə kɔli tətaa.’ 20Wu kəfwaʼ u loʼ wey n dza, ‘Mûkəbii, khəə wə u wən ə, mə â sa nyoʼlə kow naŋa kə nə təndzə, nyì naŋa i ndow. 21Mə a tsəŋə wɔ, n təŋkey, wə tawnu n wɔɔ ghə, wə ləghə ni ney nə̀ a ka wɔ naŋa, kpey nə usum, nə wə ka zəghə.’ 22Dəŋ key n dza, ‘Wə loʼ wù kəfwaʼ u bəbə wə, mə i saʼa kə wɔ n ghɔmə zey i shi bə n dzuu zə. Wə a khənu nə n loʼ wù taw n wɔɔ ghə, ney ufə nə a ka mə naŋa, kpey soʼo nə n ka zəghə 23Â shi kee wə a ka sə ney khəə wùŋ, wə kuu naŋa n ndaw ukhəə ə? Mə bə ney nə̀ khəə u tii wə n ji kpiʼi.’ 24Tə n dza ndow tə ghə̂ ghey ghə teynə fu nə̀, ‘Ney nuu kɔʼ na khəə wey n wɔ wi, ghaa fu ndow tə wù wey tə â keeli kuulə nə khəə wə tənəŋə ighəm.’ 25Ghə n dza ndow tə wi nə̀, ‘Mûkəbii tə lɔʼlə khə kuulə ukhəə tənəŋə ighəm.’ 26Sey, mûkəbii wey n dza ndow tə ghə nə̀, ‘Keeli tsu na nə wù wey tə khə fə kə, ghə i fu kuulə wi n ndəmə ufə, abə wù wey tə khə way fə kə, ghə i ney nuu daŋŋə nyanyi fey tə khə. 27Abə ghə̂ a təngəmmə ghuŋ ghey ghə â ləghə way nə n doʼo kədəŋ, ney bə na ghə n səə mə, ghaa wey tsu mə i koʼo.’”

Ghə kpiney Yeso n Yerosalem tə a loʼ kədəŋ

(Mat 21.1-11; Mak 11.1-11; Jɔn 12.12-19)

28Ambə Yeso ghɔɔmə may tsu, tə n ndow isə nə u kɔʼɔ wə n Yerosalem. 29Nghee tə kuʼlə ndownə n naʼ i Betfaj nsə Betani n kaʼ u Olif, tə n tûm ndow tsətəndəghə tə wi təbəghə isə, dza ndow tə ghə nə̀, 30“Ndow na n naʼ zey isə, tə ghaa nyiə ndow nə̀, ghaa i koʼ fənjakas ghə faŋa naŋa nə̀, nə wù ka kam kɔʼ koʼ tsə a tii, ghaa zìi bə n ghii kə fa. 31Bə wù loʼ bəbnə nə̀, ‘Ghaa Njakas fey zii nə a loʼ kee?’ Ghaa i dza ndow nə̀, ‘Mûkəbii khə kəfwaʼ tii.’” 32Sey ghə n nu ndow isə̂, bɔɔmə ndow koʼ tsu Njakas fey ghə faŋa naŋanə tə̀ tə mə dzanə. 33Ambə ghə zii nə Njakas fey, ghə muu a tii ghə n bəb tsu nə̀, “Ghaa Njakas fey zii nə a loʼ kee?” 34Ghə n beeli ndow wi dza, “Mûkəbii khə kəfwaʼ tii.” 35Sey ghə n ney bə Njakas fey n səə Yeso, zey kɔʼ ndow ndzə tə ghə tii, ney doʼlə naŋa kɔʼ Yeso tii nə fənjakas. 36Nghee tə ghə ndow nə̀, ghə n zey ndow ndzə tə ghə n jii. 37Ambə tə kuʼlə ndownə n Yerosalem, n luʼu key jii ndownə n kaʼ u Olif, nɔɔ kə dzûmə tə wi kə n kaʼ ndow ni duʼlə, fuu ukali tə̀ Zə̀ kə, n dzə tə taw tə, bòʼ faalə mey ghə koʼnə dza nə̀,

38“Zə̀ kə buulə də̀ŋ key kə bənə n zəd i Mûkəbii!

Ibuulə nsə kɔʼlə mə i loʼ tə Zə̀ kə idəŋ!”

39Ghə̂ a tə Falasi a loʼ ghə n fəŋŋə kə a nɔɔ key n dza ndow tə Yeso nə̀, “Kii naŋa tsu dzûmə tə tə̀ nə ghə doʼo tsu mɔŋ.” 40Yeso n beeli ndow ghə nə̀, “N kùm dza bə tə ghaa nə̀, abə ghə doʼo kə nə mɔŋ, tay ghə i kaʼ ni buʼlə nbɔŋ.”

Yeso dey bòʼ Yerosalem

41Ambə tə kuʼlə may ndownə n Yerosalem, koʼ ndow naʼ i tii zə, tə n dey dza, 42“Abə ghaa ghən ghaa loʼnə nya fa ghi mə, ghaa mə khə jìi zey i ney bə nə buulə zə, n tsuʼ fə na fən! À fa loʼ kə nə ghə n nyi naŋa ghəə a tii ghə n wɔ ghaa nə kə ghaa nə koʼo keeli! 43Nəŋə zə i bəghənu, ghə̂ a təngəmə a ghaa ghə i bəghə dzəŋ tsəghə kɔʼ ghaa nə təmbàa, ghə baʼlə naŋa kɔʼ ghaa badla tədzəm. 44Ghə nə ləŋi may tsu ghaa adzəm nsə waa a ghaa ghə, ghə saʼ maʼa naʼ i ghaa kasə̀ kədzədzəə, kə nə buʼ way kùumnə ghaa â ka koʼ keeli nəŋə zey Zə̀ kə a bənə ni bə bəghəshi ghaa.”

Yeso dzum aghə̂ n Ndaw Kəzə̀ i nii zə n Yerosalem

(Mat 21.12-17; Mak 11.15-19; Jɔn 2.13-22)

45Sey tə n nyi ndow n bii kə Ndaw Kəzə̀ i nii zə n Yerosalem kaʼ ndow ni dzum shi ghə̂ ghey ghə â fillə fu 46dza tə ghə nə̀, “I tɔ̀ɔ doʼo n màʼlə K-a-zə̀ nə̀,

‘Ndaw zuŋ i bə doʼlə ndaw i gɔŋŋə zə’,

Ghaa a fəd ney naŋa kɔʼnə, nə̀ a loʼ ndaw ghə̂ a tsɔŋɔ ghə.”

47Yeso â nyiə dii tsə n Ndaw Kəzə̀ i nii zə n Yerosalem tsuʼu ndzəm. Ghə fɔɔngili a nii ghə, ghə̂ a dii ghə ulaŋ ghə nsə ghə̂ ghey ghə â loʼ towwə fu n kəŋŋə jii ni wey wi. 48Jìi n kee way, n təŋkey, ghə̂ adzəm ghə a zəllə kə tə wi, ləghə way ni guŋə ghə i loʼ zə.

Sélection en cours:

Lukas 19: WEH

Surbrillance

Copier