uMataayi 8

UYeesu akumuzelufwa uwa mambombo

(uMaaliko 1:40-45; uLuuka 5:12-16)

1Lwe uYeesu aamala kusambiilizya, ahiiha mwi igamba liila. Lwe ayiiha, ivhungaana ipiti ilya vhantu lihamulandata. 2Pe umuntu wumo uwa mambombo ahinza nu kusugamila pilongolela ilya Yeesu, ahamuvhuuzya ahati, “We Mwene, imanyile kuuti uli na maha aga kunzelufwa. Inga ukwanza, nkulaavha unzelufwe.” 3UYeesu ahagolosya inyoovhe yaakwe nu kumupalamansya,#8:3 Kumupalamansya: Ku Vhayuuda yáali mwiho kumupalamansya we ali na mambombo. Inga umuntu amupalamansya, yáali mwiho kumupuuta uMulungu. ahati, “Nkwanza, uzelupe!” Ahavhaliilizyo hanaaho ahazelupa uvhuvhinu uvhwa mambombo. 4Pe uYeesu ahamuhaana umuntu uyo ahati, “Utahamuvhuuzye umuntu wonti inongwa izi! Ileelo usogole uyilolesye kwa mupuuti nu kufumwa impuutile izya kuzelupa kwaho inza vwe uMoose#8:4 UMoose: Vhaazya mu Ntantiho izya Mazwi aMajeni. álajiziizye, inga avhantu vhonti vhazilole zye uMulungu akuvhombela.”#8:4 Umuntu wonti we aapona amambombo, ahasogolaga kuyilolesya ku vhapuuti, kuuti aponile, inga vhamwitishile havhili kusangaana na vhantu avhanji. Vhaazya aVhalaawi 13:45-46; 14:1-31.

Ulwitiho ulwa mupiti uwa vhasikaali

(uLuuka 7:1-10; uYoohani 4:43-54)

5Lwe uYeesu ayinjila mu nkaaya iya Kapelanawuumu, umupiti wumo uwa vhasikaali avha Shiluumi ahinza ku kwakwe. Ahamulambiilizya 6ahati, “We Mwene, umuvhomvi waane akaasite kuhaaya ahataliiye, akuyimvilwa nkaani.” 7UYeesu ahamwamula ahati, “Nkwinza kumuponia.” 8Ileelo umupiti uyo ahamuvhuuzya ahati, “Ndaali we Mwene! Ine ntahondeeye kuuti iwe uyinjile mu nyumba yaane. Yanga lye lizwi vhweleele, umuvhomvi waane kwe apone. 9Nkuyanga vhwevhulo, mwe pe niine vhweleele indi pansi pa vhapiti vhaane, havhili indi na vhasikaali vhe vhali pansi yaane. Inga namuvhuuzya wumo nati, ‘Usogole ukutunga!’ Naluvhiilo akusogola. Inga namuvhuuzya uwamwavho nati, ‘Luvhiilo!’ Woope akwinza. Woope umuzya waane inga namuvhuuzya nati, ‘Vhomba uti,’ akuvhomba vhwevhulo.”

10Lwe uYeesu ayiivwa izyo, ahasukumila nkaani. Ahavhavhuuzya vhe vhahamulandataga ahati, “Nalyoli nkuvhavhuuzya kuuti, mu Vhaisilayeeli vhonti, ntamuvhwenyi umuntu we ali nu lwitiho ulupiti inza ulu! 11Nkuvhavhuuzya kuuti, avhantu avhinji kufuma imbazu zyonti izya nsi, vhaliyinza nu kulya umulyo pooka nu Aabulahamu nu Yisaaka nu Yaakobu mu vhumwene uvhwa Mulungu. 12Ileelo aVhayuuda vhe vhahanzilwaga vhavhe mu vhumwene uvhwo, vhalisumbwa kunzi ku shiisi. Ukwo vhalikuutaga nu kuyimba nkaani.”

13Pe uYeesu ahamuvhuuzya umupiti uyo ahati, “Sogolaaga! Yivhe inza vwe ulwitiho lwaho luli.” Pe umuvhomvi waakwe ahapona ahavhaliilizyo hehaala.

UYeesu akuvhaponia avhavhinu avhinji

(uMaaliko 1:29-34; uLuuka 4:38-41)

14Lwe uYeesu ayinjila mu nyumba iya Peeteli, ahaaga unyinavwala uwa Peeteli akaasite pa shitala, ali ni nzegema. 15Pe uYeesu ahamulema inyoovhe yaakwe, inzegema yihapona. Woope ahavhuuha, ahataliha kumuvhombela.

16Lwe haafiha hamazuuvha, vhahamuleetela uYeesu avhantu avhinji vhe vhálemwilwe ni mpepo inkandamanu. Pe ahazyefwa impepo izyo kwi izwi lyakwe. Havhili ahavhaponia avhavhinu vhonti. 17Izyo zyávhombesile, inga lilunjishe izwi lye umukuvhwi uYisaayi áyanzile átili, “Ányatuuye uvhuyeyevhazu na mavhinu giitu.”#8:17 uYisaayi 53:4

Vhe vhakwanzilwa kuvha vhasundikwa avha Yeesu

(uLuuka 9:57-62)

18Lwe uYeesu aalola kuuti ivhungaana likumuzyunguula, ahavhalajizya avhasundikwa vhaakwe ahati, “Tulambe kwi isyila ilya sumbi.” 19Pe umusambiilizi wumo uwa ndajizyo izya Moose ahasogola kwa Yeesu, ahamuvhuuzya ahati, “We Musambiilizi, kuuti nkulandate kwonti kwe ukusogola.” 20Ileelo uYeesu ahamwamula ahati, “Avhahavhila vhali na mashembo, zyope inyunyi zili ni visanza, ileelo ne Mwana wa Aadamu#8:20 UMwana wa Aadamu: Vhaazya mu Ntantiho izya Mazwi aMajeni. ntali na pa kukaasya uluvhazu lwane!”

21Pe umusundikwa uwamwavho ahamuvhuuzya uYeesu ahati, “We Mwene, unitishile suuti insogole imusyile utaata waane.” 22UYeesu ahamwamula ahati, “Iwe ndandataga! Vhaleshe avhafwe#8:22 Avhafwe: Ipa uYeesu akuvhayanga avhantu vhe vhafuuye mu mupepo, te vhufwe uvhwa muvhili. Vhaazya uLuuka 15:24, 32; aVhahefeeso 2:1. vhavhasyile avhafwe vhaavho.”

UYeesu akupilila inkungu na mavhilingwa

(uMaaliko 4:35-41; uLuuka 8:22-25)

23Pe uYeesu ahinjila mwi ivhooti, vhoope avhasundikwa vhaakwe vhahamulandata mwemuula, vhahanda kusogola. 24Pe lwe vhali mwa sumbi, naluvhiilo inkungu impiti nkaani yihinza. Amavhilingwa gahanda kunyamfushila mwi ivhooti. Ileelo ahavhaliilizyo iho uYeesu ákaasite. 25Pe avhasundikwa vhaakwe vhahasogola kumudaamusya, vhahati, “We Mwene! Tuposhe! Tukufwa!”

26UYeesu ahavhaamula ahati, “Shooni she mukwogopa, imwe mwe vha lwitiho ulunsi?” Pe ahimiilila, ahayipilila inkungu nu sumbi, vihapuuma mwaa. 27Avhasundikwa vhaakwe vhahasukumila nkaani, vhahati, “Muntu vhuli uno we ni nkungu nu sumbi vikumushindiha?”

UYeesu akuvhaponia avhantu vhavhili vhe vhali ni mpepo inkandamanu

(uMaaliko 5:1-20; uLuuka 8:26-39)

28Pe uYeesu ahalamba usumbi, ahafiha mu nsi iya Vhagadaleeni. Ukwo ahahomaana na vhantu vhavhili vhe vháali ni mpepo inkandamanu, vhe vháfumile ku mbiipa. Avhantu ivho vháali vhahali nkaani, atáliipo umuntu we ahalingaga kutuuha kwenekwo.

29Pe vhahahoola nkaani, vhahati, “Shooni she ukutwinjiilila iwe we Mwana wa Mulungu? Vhuli, uyinzile kutulovwa she ahavhaliilizyo hashiili?” 30Apatali hansi na pe vháali, páamile impuga impiti iya nguluvhe zye vhahazidiimaga. 31Pe impepo inkandamanu izyo zihamulambiilizya uYeesu zihati, “Inga ukutufumwa, utwitishile twinjile mu mpuga iya nguluvhe yiila.”

32Woope ahati, “Sogooli!” Pe zihafuma mu vhantu vhaala, zihasogola nu kwinjila mu nguluvhe ziila. Inguluvhe ziila zyonti zihashimbiilila ku lwiha lwe lwásuliime nkaani, zihagwila mwa sumbi nu kufwa mu minzi.

33Avhadiimi avha nguluvhe lwe vhaalola izyo, vhahashimbila uluvhilo kusogola mu nkaaya. Vhahayanga zyonti zye zyávhombesile, na zye zyáfumiiye ku vha mpepo vhaala. 34Avhantu vhonti avha mu nkaaya iyo vhahafuma, vhahasogola kwa Yeesu. Lwe vhamulola, vhahamulambiilizya, kuuti ayeepe mu nsi yaavho.

Sélection en cours:

uMataayi 8: nih

Surbrillance

Copier