Jenesis Nuarin-tas alupas 9.
Nuarin-tas alupas 9.
1 Et asan tas acis yi alwai Noa a Atua. 4 Et ika a Atua eri jim atgei atmas, um jim caig inja irai itai. 8 Intas etipup u Atua, 13 nitai asjaaicnaig vaig inhuterau. 18 Era ahes ehele Noa a nup urai iji pece. 20 Et ahwaig vaine uman a Noa, 21 et ahnag aien, et asan tas auyat vai yin a Ham, 25 et asan tas ahlaijaig vai Kenan a Noa, 26 um asan tas acis yi alwai Sem, 27 um alaigaheni vai Jefed, 29 et mas aien.
1Is acis yi alwai Noa im ehtaij halav atamaig o un a Atua, um ika ehele ra, Akumu asvalav aijaua eri ahinag, erumu terimterim ara an nobohtan.
2Erupu imtitaig caua um ecen vai caua niji itai eklim edo irai pece asega an nobohtan, im niji man asega an nauanohatag, im niji itai atahas asega an nobohtan, im niji mu asega an jap; ek mun alupai caua nitai iji igki ainyak.
3Inyi itai hegaig incamia niji itai umumoh asega; ek mun alupai caua niji itai asega ainyak, et idivaig kis alupai caua inceslum asega ainyak.
4Jam jim caig nohu itai aijaua et amen inja iran, nitai umoh iran nigki.
5El et atgei atmas tah, ekpu idim aru ainyak; ekpu aru ainyak irai itai eklim edo irai pece asega, im lep ira atimi; el et atgei etwan tah natimi, ekpu aru ainyak.
6Aien et atgei atmas aien, erumu lep atgei yin natimi: is ago natimi a Atua an nalmun.
7Akumu asvalav aijaua eri ahinag; erumu terimterim ara an nobohtan, um apaahni iran.
8Is tas ehele Noa im ehtaij halav atamaig o un a Atua, um ika,
9Ek idim ati intas etipup unyak ainyak ehelemia, im ilpu mapomia;
10im niji itai umumoh asega ehelemia, niji man, im niji itai eklim edo irai pece auata upene, im niji itai eklim edo irai pece aleg asega an nobohtan; niji itai umumoh asega eris ahes an nelcau ara, im lep niji itai eklim edo irai pece asega.
11Ekpu ati intas etipup unyak ehelum ainyak; inyi eti lep ahgarero nobohtan, um auahas niji itai umumoh asega; inyi idim eti lep ahgarero nobohtan um has.
12Is ika a Atua, Et itai asjaaicnaig nigki vai intas etipup unyak ek mun asaig ehelemia ainyak, im lep ehele niji itai umumoh asega ehelemia, inyi amen irai iji messe:
13ek mun ati inhuterau unyak ainyak an napat, inyi itai asjaaicnaig nigki vai intas etipup unyak va nobohtan.
14Eku wit ati napat an nohatag ainyak, uhpu ecetai inhuterau an napat:
15ekpu imiehva intas etipup unyak ainyak vai caua, im niji itai umumoh asega; inyi eti lep ahgarero nobohtan, um auahas niji itai umumoh asega.
16Etpu eteuc inhuterau an napat an nohatag; ekpu almoi ainyak, um imiehva intas etipup aktit kis asaig ainyak va niji itai umumoh asega an nobohtan.
17Is ika a Atua ehele Noa, Et itai asjaaicnaig nigki vai intas etipup unyak, kis asaig ainyak va niji itai umumoh asega an nobohtan.
18Ehtaij halav atamaig u Noa ahtaij raigki, ehtijis ahes an nelcau ahtaij, nan, Sem, im Ham, im Jefed: is etmai Kenan a Ham.
19Ehtijis halav atamaig u Noa ahtaij raigki: eris lep ahes irai ehtaij natimi asega an nobohtan.
20Is atupun a Noa um ahapol, is ahwaig vaine uman aien:
21is umnyi waina an nahapol o un aien, um ahnag vaig; is ti napelumai iran anliin neom o un.
22Is almoi intup asjeuc u etman a Ham, etmai Kenan, um asaig ehele ohwat etwan ijo.
23Erus leh napelumai a Sem, im Jefed, um atijai irai euhlirau, um atga an nidjirau, um adahpoi intup asjeuc u etmarau; erus easpagki an nesganimtarau arau, erus eti almoi intup asjeuc u etmarau arau.
24Is aijilahlah vai waina iran a Noa, um ato nedo o inhal o un inharei vai yin.
25Is ika aien, Uhmu ahlaijaig Ham irai Kenan inhal o un; etpu aheca u ilpu aheca u ilpu etwan a Kenan.
26Is ika aien, Naaurinig vai Ihova Atua u Sem; etpu aheca o un a Kenan.
27Etpu ika a Atua eri ahinag a ilpu mapoi Jefed, erupu amen ara irai imnim u Sem; etpu aheca ura a Kenan.
28Is ti pan itac nopan nahgarero vaig nobohtan, ja is par umoh a Noa irai mesese is dri huntret im fifte (350).
29Is umoh a Noa irai mesese is nain huntret im fifte (950), ja pah mas.
Sélection en cours:
Jenesis Nuarin-tas alupas 9.: ABO
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)