Markɩ 9

1A Yeezu tɩ cãà na yere kʋ̀rɛ bɛ: «Yel-mɩŋa sɩza, ɩ̃ yere na kʋ̀rɛ nyɩ, a nɩbɛ na be a ka a, bɛ mɩnɛ na nyɛ̃ nɩ a Naaŋmɩn Naalʋ ʋ ta nɩ fãw, ɛ́ bɛ bãw kpi.»

A Yeezu niwn lɩɛbʋ

(Mat 17:1-13, Luk 9:28-36)

2Bibie ayʋɔb pùorí, a Yeezu tɩ tɛr'ɩ Pɩɛr nɩ Zakɩ nɩ Zã do n tã-kpɛ̃ɛ kãw zu bɛ tɛwr zie. Ʋ tɩ lɩɛb'ɩ nɩ-yũo a bɛ niŋé. 3A ʋ bʋ̃-suuri tɩ pɛlɩ na nyɩwrɛ bɛ tɛr tɔ ɩ. A tɩ pɛlɩ nɩ pɛlʋ kãw bʋʋrɛ, fɔbr-pɛwrɛ kãw za a tẽw zu na kʋ̃ tʋ̃ɔ́ ɩ a pɛlɩ a ɩ. 4Eli nɩ Moyiir wa sãá nɩ a bɛ zie ƴɛ̀rɛ nɩ a Yeezu. 5Pɩɛr tɩ yel'ɩ a Yeezu: «Arabi#9:5 Arabi: A ƴɛ̀r-bir ŋa pɛr'ɩ kɛ́: Wul-wul-kara. i, a ɩ n vla kɛ́ tɩ be a ka. Tɩ maalɩ pɛnɛ-sɛwr ata: fʋ so been, Moyiir so been, Eli mɩ̀ so been.» 6Ʋ bɛ tɩ bãw lɛ ʋ na na yel a ɩ, dɛ̃bɩ̃ɛ na tɩ nyɔw ʋlɛ nɩ a ʋ taabɛ ayi bɛl yaga a ƴãw. 7Zũzuwr tɩ yi na, a ɓaarʋ pàw bɛ, ɛ́ kɔkɔr yire a zũzuwr pʋɔ yere: «A ɩ̃ Bi-nɔna za n'ɩ à ŋà, nyɩ bɛrɛ wone a ʋ ƴɛ̀rʋ.» 8Daadaalɛ, bɛ piwr'ɩ a be bɛ lɛb nyɛ̃ nɩr za ɩ, a bɛ ɩ a Yeezu yõ nɩ a bɛl tɛwr ɛ. 9Bɛ na tɩ lɛb yi a tãw zu siwr a, a Yeezu tɩ kpaalɩ bɛ na kɛ́ bɛ taa wa manɛ à á ŋá bɛ na nyɛ̃ a kʋ̀rɛ nɩr za ɩ, ɛ́ gùre a Nɩsaal Bie tɩ lɛb yi a kũuni pʋɔ. 10Bɛ tɩ sàw nɩ a ʋ nʋɔr, ɛ́ sowre taa kɛ́ bʋ̃ʋ n'ɩ a kũu-pʋɔ-lɛb-yibu ʋ na yere a.

11Al pùorí, a ʋ po-tuurbɛ tɩ sowre ʋ na: «Bʋ̃ʋ n'ʋ so a Naaŋmɩn wulu sɛ-sɛbrbɛ yere kɛ́ a ɩ n fɛrʋ kɛ́ a Eli wa baarɩ?» 12Ʋ tɩ sɔw bɛ na: «Yel-mɩŋa n'a, a fɛr'a kɛ́ a Eli de niwn wa, wa maalɩ bom za ƴãw. Ɛcɛ, bʋ̃ʋ ƴãw n'a bɛ sɛb kɛ́ a ɩ n fɛrʋ kɛ́ a Nɩsaal Bie wõ tuo yaga, ɛ́ bɛ ɩ ʋ la? 13Mãa a, ɩ̃ yere na kʋ̀rɛ nyɩ: a Eli wa na, ɛcɛ bɛ ɩ ʋ nɩ a lɛ za bɛ na bɔbr a, mɛ̃ a lɛ bɛ na sɛb a ʋ ƴãw a.»

A Yeezu sanɩ nɩ bie kãw kɔ̃tɔ̃-faa na nyɔw a

(Mat 17:14-21, Luk 9:37-43a)

14Bɛ na tɩ lɛb wa a po-tuurbɛ zie a, bɛ nyɛ̃ nɩ nɩ-yaga bɛ ŋmãa viiri koli bɛ, ɛ́ bɛlɛ nɩ Naaŋmɩn wulu sɛ-sɛbrbɛ ŋmɩɛr nɔkpɛn. 15A nɩbɛ na wa nyɛrɛ a Yeezu wa báarɛ a, a tɩ ùr'ɩ bɛ za bɛ dɩ vuo ɩ, bɛ zɔrɛ cere kɛ́ bɛ tɩ puor'ʋ. 16Ʋ tɩ sowr'ɩ a ʋ po-tuurbɛ: «Bʋ̃ʋ nɔkpɛn n'a nyɩɩm nɩ a bɛl ŋmɩɛr?» 17Nɩr kãw tɩ sɔw nɩ a nɩ-yaga pʋɔ: «Wul-wul-kara a, a ɩ̃ bie n'ʋ kɔ̃tɔ̃-wõw-takpal nyɔw, ɩ̃ tɛr wa n a fʋ zie. 18Ʋ mɩ́ ìr ʋ nɩ zie za, nyɔw ʋ lɔb tẽw, a bie mɩ́ pu mʋta-puuru ɛ́ 'wɔbr nyɩmɛ, ɛ́ dɛ mɩ́ tãà dɩlaa a. Ɩ̃ zɛlɩ nɩ a fʋ po-tuurbɛ kɛ́ bɛ diw a kɔ̃tɔn ŋa bɛr ʋ, ɛcɛ bɛ bɛ tʋ̃ɔ́ ɩ.» 19A Yeezu tɩ de nɩ a ƴɛ̀rʋ yel: «Alɛ! Nyɩɩm dɩ̃a nɩbɛ na bɛ sàw de Naaŋmɩn a! Debor daar'a ɩ̃ na be a nyɩ sɔgɔ tɩ ta? Nyɩ bɔbr'a k'ɩ̃ɩ cãà wone nɩ nyɩ a tuo ɛ́ gù debor? Nyɩ tɛr a bie wa kʋ̀ m!» 20Bɛ tɩ tɛr ʋ na cen nɩ tɩ kʋ̀ ʋ. A kɔ̃tɔn na wa nyɛrɛ a Yeezu wa báarɛ a, ʋ dam'ɩ a bie faa faa, ɩ ʋ lo gã tẽw pu mʋta-puuru bile nɩ. 21A Yeezu tɩ sowr'ɩ a sãà: «Debor daar'a a tĩ ʋ?» Ʋ sɔw: «A ʋ bibile daarɩ́ za n'a. 22Gb'aa yaga za, a kɔ̃tɔn tɩ ɓáw ʋ na lɔb ƴãw vũumí bɩɩ kʋ̃ɔmɩ́ k'ʋʋ kʋ ʋ. Fʋ̃ʋ na na tʋ̃ɔ́ ɩ ɩb kãw a, fʋ̃ʋ zɔ tɩ nɩbaalʋ ɛ́ sõw tɩ!» 23A Yeezu lɛb yel ʋ: «Fʋ̃ʋ na na tʋ̃ɔ́ a yaa? Sob nɛ na tɛr naaŋmɩn-sàw-deb a, bom za mɩ́ tʋ̃ɔ́ nɩ a ʋ zie.» 24Daadaalɛ, a bie sãà ŋmɛ cɛl yel: «Ɩ̃ sàw na de! Ɛcɛ sõw mɛ̃ ɩ̃ na bɛ tʋɔr sàwr dier vla a!»

25A Yeezu na tɩ nyɛ̃ a nɩbɛ bɛ zɔrɛ waar wa gbone taa a, ʋ tanɩ nɩ a kɔ̃tɔn yere nɩ: «Kɔ̃tɔ̃-wõw-takpal i, fʋ̃ʋ n'ʋ ɩ̃ yere: yi zaa a bie ŋa pʋɔ, ɛ́ taa lɛb kpɩɛr a ʋ pʋɔ towtow ɛ!» 26A kɔ̃tɔn tɩ cɩɩr'a, ɛ́ dam a bie yaga ɛ́ yi. A bie tɩ ɩ na mɛ̃ ʋ kpi na a, lɛ n'a a nɩbɛ za tɩ yere: «Ʋ kpi na!» 27Ɛcɛ a Yeezu tɩ nyɔw ʋ nɩ nũú, ɩ k'ʋ ìr àr. 28A Yeezu na tɩ lɛb kul a yir a, a ʋ po-tuurbɛ tɩ sowr'ʋ nɩ bɛ tɛwr zie: «Bʋ̃ʋ n'ʋ so a tɩɩm, tɩ bɛ tʋ̃ɔ́ diw a kɔ̃tɔn ŋa?» 29A Yeezu sɔw bɛ: «Puoru tɛwr'a na tʋ̃ɔ́ ír a kɔ̃tɔn ŋa bʋʋrɛ.»

A Yeezu na yel a gb'a ayi sob ƴãw k'ʋʋ na kpi na ɛ́ lɛb yi a

(Mat 17:22-23, Luk 9:43b-45)

30Bɛ na tɩ yi a be a, bɛ tu na tɔl a Galile tẽw pʋɔ. A Yeezu bɛ tɩ bɔbr k'aa nɩbɛ bãwnɩ a ɩ. 31Bʋ̃ʋ n'ʋ vɛ̃, ʋ tɩ kanɛ nɩ nɩ a ʋ po-tuurbɛ yere: «Bɛ na nyɔw nɩ a Nɩsaal Bie ƴãw a nɩsaalbɛ nuru pʋɔ, a nɩsaalbɛ na kʋ ʋ na, ɛcɛ bibie ata pùorí, ʋ na lɛb'a yi a kũu pʋɔ.» 32Ɛcɛ a ʋ po-tuurbɛ bɛ tɩ bãw a ƴɛ̀rʋ ŋa pɛr ɛ, ɛ́ tɩ zɔrɛ dɛ̃bɩ̃ɛ a ʋ sowru ƴãw.

Ãa n'ʋ ɩ kpɛ̃ɛ zuo a bɛ za?

(Mat 18:1-5, Luk 9:46-48)

33Bɛ tɩ ta n a Kafarnawɔm. Bɛ na wa ta a yir a, a Yeezu sowr'ɩ a ʋ po-tuurbɛ: «Bʋ̃ʋ nɔkpɛn n'a nyɩ tɩ ŋmɩɛr a sɔ́r zu?» 34Ɛcɛ bɛ tɩ ɩ n gbili, bɛ na tɩ ŋmɩɛr a nɔkpɛn a sɔ́r zu kɛ́ bɛ bãw ãa n'ɩ a bɛ za kpɛ̃ɛ a ƴãw. 35A Yeezu tɩ bʋɔl'ɩ a ʋ Nɩ-toni pie nɩ ayi zɩ̃ nɩ ɛ́ yel bɛ: «Nɩr wa bɔbr k'ʋʋ ɩ a niw-diere a, ʋ ɩ a bɛ za po-pàwrɛ nɩ a bɛ za tõ-tone.» 36Ʋ tɩ nyɔw nɩ bi-cãpile ƴãw a bɛ sɔgɔ, nyɔw ʋ weri ɛ́ yel bɛ: 37«Sob nɛ wa de a bibi-cãpile ŋa tɔ sob a ɩ̃ yúor ƴãw a, mãa tɔr za n'ʋ ʋ de, ɛ́ sob nɛ za na de m a, mãa bɛ n'ʋ ʋ de ɩ, a ʋlɩ sob na tõ m a n'ʋ ʋ de.»

Ʋlɩ sob na bɛ ɩ a tɩ dɔ̃ sob a lãw nɩ tɩ na

(Luk 9:49-50)

38Zã tɩ yel'ɩ a Yeezu: «Wul-wul-kara a, tɩ nyɛ̃ nɩ nɩr kãw ʋ pore a fʋ yúor diwr'ɩ kɔ̃tɔmɛ, ɛ̀ tɩ tɩ bɔbr kɛ́ tɩ diw ʋ bɛr, ʋ na bɛ pʋɔ a tɩ pʋɔ tuur fʋ a ƴãw.» 39Ɛcɛ a Yeezu tɩ sɔw na: «Nyɩ ta diwr ʋ bɛrɛ ɩ, nɩr za kʋ̃ tʋ̃ɔ́ maalɩ nɔ-ɓãa-yel a ɩ̃ yúor ƴãw, ɛ́ a pùorí ʋ lɛb sãwnɛ a ɩ̃ yúor a pɛr nɛ pʋɔ ɩ. 40Ʋlɩ sob na bɛ ɩ a tɩ dɔ̃ sob a, lãw nɩ tɩ na. 41Ɛ́ sob nɛ za nãà wa kʋ̀ nyɩ ŋmale pʋɔ kʋ̃ɔ, nyɩ na ɩ kɩrɩta-nɩbɛ a ƴãw a, yel-mɩŋa sɩza, ɩ̃ yere na kʋ̀rɛ nyɩ, ʋ kʋ̃ guu a ʋ sã-ya ɩ.»

Nyɩ gùre nyɩ mɩŋa

(Mat 18:6-9, Luk 17:1-2)

42«Ʋlɩ sob wa ɩ a bibi-cãpili bɛ ŋa kãw, na sàw de a ɩ̃ yele a, ʋ lo a yel-bier pʋɔ a, bɛlɛ de kʋsɛ-kpɛ̃ɛ 'lẽ ƴãw ʋ kɔkɔrɩ́ ɛ́ dáa ʋ lɔb ƴãw kʋ̃ɔ-kpɛ̃ɛ pʋɔ a, alɛ sa. 43A fʋ nũu wa tawr fʋ ƴãwn yel-bier pʋɔ a, ŋmãa ʋ bɛr. Fʋ na na kpɛ a nyɔ-vʋʋrʋ na be kʋralɛ a pʋɔ nɩ a nũ-ŋmãa a, alɛ sa fʋ na na tɛr a fʋ nuru a za ayi cen nɩ a tẽ-faa pʋɔ, a vũu na bɛ kpiire a pʋɔ a. [ 44A be a, a zãzule bɛ tɛr kũu daar ɛ, ɛ́ a vũu bɛ tɛr kpiiru daar ɛ.] 45A fʋ gbɛ́r wa tawr fʋ ƴãwn yel-bier pʋɔ a, ŋmãa ʋ bɛr, fʋ na na kpɛ a nyɔ-vʋʋrʋ na be kʋralɛ a pʋɔ nɩ a gbɛ-gãw a, alɛ sa bɛ na na lɔb fʋ ƴãw a tẽ-faa pʋɔ nɩ a fʋ gbɛɛ a za ayi a. [ 46A be a, a zãzule bɛ tɛr kũu daar ɛ, ɛ́ a vũu bɛ tɛr kpiiru daar ɛ.] 47Ɛ́ a fʋ mimir wa n'ʋ tawr fʋ ƴãwn a yel-bier pʋɔ a, 'lòw ʋ ír bɛr. Fʋ na na kpɛ a Naaŋmɩn Naalʋ pʋɔ nɩ mimi-fɩɔ a, alɛ sa bɛ na na lɔb fʋ ƴãw a tẽ-faa pʋɔ nɩ a fʋ mimie a za ayi a, 48be zãzule na bɛ tɛr kũu daar, ɛ́ vũu mɩ̀ bɛ tɛr kpiiru daar a. 49Bʋ̃ʋ n'ʋ vɛ̃, bɛ na ƴãw nɩ vũu nyaarʋ#9:49 Nyaarʋ: Mɛ̃ a lɛ a nyaarʋ na mɩ́ ɩ a bʋ̃-dɩra nʋmɛ a, a vũu na lɩɛb'ɩ nyaarʋ bɛ ƴãw a nɩsaalbɛ, a pɛ́w a bɛ yel-bebe bɛr, bɛ tʋ̃ɔ́ vɩɛl a tẽ-vla ƴãw. nɩsaal za ƴãw.

50A nyaarʋ ɩ n bʋ̃-nʋ̃ɔ̀, ɛcɛ a nyaarʋ nʋ̃ɔ̀ wa yi a, bʋ̃ʋ n'a nyɩ na ƴãw a lɛb nʋmɛ? Nyɩ tɛr nyaarʋ a nyɩ pʋ̃ɔmɩ, ɛ́ ɩrɛ ƴã-ɓaarʋ ɩb kʋ̀rɛ taa.»

Sélection en cours:

Markɩ 9: DBDC

Surbrillance

Copier