Mateo 12

1Hʼitungo lyenilo Yesu wavitaga mu migunda ha lusiku lwa sabato, alisi vahemba vakwe vavagi na nzala na vavukizaja kugakolola mangala na kulya. 2Alisi aho Vafarisayo vavonaga, vamuwila, Lolaga, vahemba vako valita yeniyi mwiko kwita ha lusiku lwa sabato. 3Alisi wavawilaga, Mukasomile yeniyo Davidi 4waliwita aho wavagi na nzala na viye? isyo waliwingila mu numba ya Mulungu na wayilyaga mikate ya kolecha, hoyene mwiko kuwakwe kulya na ku viye, sumbwa ku vahozya duhu. 5Ninga mukasomile mu ngʼhama ati, ha lusiku lwa sabato vahozya mwisengelo valigilula mwiko gwa lusiku lwa sabato na vali vuduhu musango? 6Alisi ndimuwila inwe ati, henaha kiliho kihanya kukila isengelo. 7Alisi ulu mbe mwagumanikaja muhayo gwenugu,

Ndikova kigongo, ngʼo kitambo,

8mbe mukavalomelile kavi avo vakavile na musango. Kwisi Mwana wa munhu ali Guku wa sabato.

9Na aho wafumaga kwenuko wafikagamo mu sinagogo yavo. 10Na wavagimo munhu wagwa kukono, na vamuvuzaja, vuhaya, Guli mwiko kupizya ha lusiku lwa sabato? kigele vave na muhayo gwa kumuvulila. 11Alisi wavawilaga, Nani mugati ninwe, ulu ali nayo ngʼholo yimo duhu, nayo yagwila mwikandilo ha lusiku 12lwa sabato, akuleka kuyidima na kuyifumya? Kinahe, munhu akavile na mupango muhanya muno kukila ngʼholo? Kunguno yeniyi gukavile mwiko kuvezya tusoga ha lusiku lwa sabato. 13Haho wamuwilaga munhu, Ugolole kukono kwako; nawe wakugololaga na kwapilaga hangi kitisi kwiye. 14Alisi Vafarisayo vafumaga na valomaga ndaka ya kumuzimangucha.

15Alisi aho Yesu wayimanikaja yeniyi wafumagaho, na vingi vamulondaga na wavapizaja vose. 16Na wavadakilaga valeke kumukumucha, 17kigele yifikile kitisi yayombilwe na mufumbuzi Yesaya, homwene alihaya,

18Lolagi mutumami wane homwene namusogolaga,

Mutoneke wane, moyo gwane gulitogeziwa nawe,

Nkumufulila myuye yane higulya nawe,

Na akuvatanizya vapagani vugololoku.

19Uyu kwiyanilizya ngʼo ninga kububuzya ngʼo ninga munhu kwigwa ngʼo muzwi gwakwe mu nzila.

20Idete lyademivilwe uyu kulivinza ngʼo,

Ninga kavutambi kalizinzila uyu kukazimya ngʼo kusika alileta vugololoku ha vukinde.

21Na vapagani vakulisigizya lina lyakwe.

22Haho waletagwa hawakwe munhu wa migavo homwene wavagi muhofu na kameme; na wamupizaja, na kameme wayombaga na wavonaga. 23Na vanhu vose vakumaja na vayombaga, Kinahe, mwenuyu akavile 24Mwana wamwa Davidi? Alisi aho Vafarisayo vayigagwa yeniyi, vayombaga, Mwenuyu akavile kuyifumya migavo sumbwa mu nguzu zyamwa Beelzebul, muhanya wa migavo. 25Alisi Yesu wagamanikaja miganiko gavo na wavawilaga, Kila vutemi vuligogana muwavo wenekili vukuvi matongo; na kila kaya ninga numba yiligogana muwayo yenekili yikuleka kwima. 26Na ulu Shetani alimupezya Shetani, haho wagoganaga mwenekili, haho vutemi wakwe vukujama na lumehoki? 27Na ulu nene ndiyifumya migavo mu nguzu yamwa Beelzebul, vana vinwe valiyifumya mu nguzu yamwa nani? kunguno yeniyi venavo vakuvi vayanguzi vinwe. 28Alisi ulu ndiyifumya migavo na Roho ya Mulungu, haho vutemi wa Mulungu wafikaga mugati ninwe. 29Ninga lumehoki munhu alikovola kwingila mu numba ya munhu wa nguzu na kusonza fiseme fyakwe? sumbwa amutunge hambele wa nguzu, na haho akuyisonza numba yakwe. 30Homwene akavile hamohene na nene ali mukandi wane; na homwene akavile kukuminga hamohene na nene alisambazya. 31Kunguno yeniyi ndimuwila inwe, vanhu vakutondolwa mavukenaguzi gose na mafusano gose, alisi kuyifusa Roho 32vanhu kutondolwa ngʼo. Na homwene aliyomba muhayo kwigulya na Roho Nsondo, mwenuyu kutondolwa ngʼo mu liwelelo lyenili ninga ngʼo mu lyenilo lilakiza. 33Mukane! muti musoga na fisumo fyago fisoga; ninga mukane! muti muvi na fisumo fyago fivi; kwisi muti gulimanikiwa ku fisumo. 34Inwe vuvyalwa wa nzoka, lumehoki mulikovola kuyomba mihayo misoga kungi muli vavi? Kwisi mulomo guliyomba ku genaya galigokazya moyo. 35Munhu musoga alifumya tusoga ku mbika yakwe nsoga ya moyo; na munhu muvi alifumya tuvi ku mbika yakwe mbi ya moyo. 36Alisi ndimuwila inwe ati vanhu vakuvuziwa ha lusiku lwa kitanga kunguno ya mihayo yose mivi iyo hoyene vayombaga. 37Kwisi ku mihayo yako ukugololwa, na ku mihayo yako ukutemelwa kitanga.

38Haho vamwitavukaga vamanicha fitabu vamo na Vafasarisayo, vuhaya, Muhembeki, tulikova kuvona mugaka kuwako. 39Alisi witavukaga na alivawila, Vuvyalwa vuvi na wa vusihya vulikova mugaka, alisi vukavile kupiwa sumbwa mugaka gwa mufumbuzi Yona. 40Kwisi kitisi Yona wavage mu nda ya nyamugumi nsiku idatu na mavuziku adatu, sisyo na Mwana wa Munhu akuvi mugati na nsi nsiku idatu na mavuziku adatu. 41Vagosya va Ninive vakuvuka ha vuyanguzi hamohene na vuvyalwa wenuvu na vakuvuyangula, kwisi venavo vapilukile moyo ku mhola yamwa Yona; na lolagi, henaha aliho muhanya kukila Yona. 42Mutemi mukima wa Dakama akuvuka ha vuyanguzi hamohene na vuvyalwa wenuvu na akuvuyangula, kwisi wizaga kufuma ku mhelo zya liwelelo, kigele igwe ngelo yamwa Salomo; na lolagi, henaha aliho muhanya kukila Salomo.

43Alisi ulu mugavo gwa zoma gwamufumile munhu, gulivita mu fikalama, gulikova hakwisuhizya, na gukahawine. 44Haho guliyomba, Nkusyoka mu numba yane mwenumo namufumaga; na aho guliza guliyivona 45numba duhu, yapyagulilwe na yavezelezivilwe. Haho gulija na gulileta migavo yingi mpungati hoyene yili mivi kukila gwenekili, yilingila na yilikalamo, na mheleleko ya munhu mwenuyo yikuvi mbi kukila hambele; na sisyo yikuvukwilila vuvyalwa wenuvu vuvi.

46Aho wavagi atali aliyomba na mbuto ya vanhu, nina na vaduguye vimaga hibala valikova kuyomba nawe. 47Alisi umo wamuwilaga, Lolaga, noko na vaduguyo 48valima hanze valikova kuyomba naʼho. Alisi witavukaga na alimuwila mwenuyo wamupozezaja, Nani ali 49mayu, na va nani vali vadugu vane? Na haho wavagololelaga vahemba vakwe kukono kwakwe, uhaya, 50Lolagi, mayu na vadugu vane! Kwisi homwene alikimazya kikowa chamwa Vava wane homwene ali mwilunde, mwenuyu ali mudugu wane na ilumbu lyane na mayu.

Sélection en cours:

Mateo 12: Nym51

Surbrillance

Copier