यूहन्ना 2

यीशु मसीह कने अनौखे चमत्कार

गलील प्रदेश रे काना बिच यीशु रा पैल्ला चमत्कार

1फिरी तिसरे दिन गलील प्रदेश रे काना ग्रां बिच कुसकी रा ब्याह थिया कने यीशु री अम्मा भी तित्ते ही थी 2यीशु कने तिसेरे चेल्‍ले भी तिस ब्याह बिच सद्दे रे थिये 3जिस बेल्ले अंगूर रा रस्स नी बचेया तां यीशु री मां, मरियम ने तिसजो बोल्लेया, तिन्हा का दाखरस मुकी गेया। 4यीशु ने तिसजो बोल्लेया, मां, ए सब किच्‍छ मेरे जो किजो दस्सेया करदी हिन? हल्ले मसीह रे रुप बिच जाहिर होणे रा मेरा समय नी है आए रा। 5तिसेरी मां ने नौक्करां जो बोल्लेया, जे किच्‍छ से तुसा जो बोलदा, तिय्यां ही करेयो। 6तित्ते यहूदियां री रसम अनुसार बट्टेयां रे छे घढे़ रख्खे रे थिये जिस बिच लगभग अस्सी रा सौ लीटर पाणी भरी जान्दा थिया। 7यीशु ने नौक्करां जो बोल्लेया, “घढ़ेयां जो पाणी कने भरी दो।” तिन्हा ने तिसजो पूरा उप्पर तिकर भरी दिता। 8तां यीशु ने तिन्हा नौक्करां जो बोल्लेया, अवे इस बिच थोड़ा पाणी कड्डी करी धाम रे प्रधान का लेई जाओ, ते नौक्कर लेई गे। 9जिस बेल्ले धाम रे प्रधान ने से पाणी चख्खेया, तां से पाणी अंगूर रा रस्स बणी गे रा थिया, ते नी जाणदा थिया कि से दाखरस कुते का आया, तां धाम रे प्रधान ने लाड़े जो सदी करी तिसजो बोल्लेया, 10सारे जणे पैल्ले बदिया वाला अंगूर रा रस्स दिंदे ते जिस बेल्ले मणू पी करी रजी जान्दे तां तिसका हल्का दाखरस दिंदे पर तू बदिया वाली दाखरस अब्बे तक रख्खी छड्डे रा है। 11यीशु ने गलील प्रदेश रे काना बिच अपणाए पैल्ला चमत्कार दिखाई करी अपणी महिमा दिखाई, इसेरी वजह कने तिन्हेरे चेल्‍लेयां ने तिन्हा पर विश्वास कित्ता। 12इसेरे बाद से कने तिसेरी मां कने तिन्हेरे भ्याल कने तिसेरे चेल्‍ले कफरनहूम कस्बे जो गे कने तित्ते किच्‍छ दिन रे। 13यहूदियां रा फसह रा त्याहार नजदीक थिया कने यीशु यरुशलेम सहर जो गे।

मन्दिर बिच का दुकानदारां रा कड्डेया जाणा

14यीशु मन्दिर बिच बैल, भेड़ कने कबूतर रे बेचनेवाले कने सौदेबाजा जो बैठे रे दिख्खेया। 15तां तिसने रस्सी जो कट्टी करी सारे भेड़ ते दांदा जो मन्दिर का कड्डी दिता कने व्यापार करणे वालेयां रे पैसे खलारी दित्ते कने फट्टियां जो पलटाई दित्ता। 16कने कबूतर बेचणे वालेयां जो बोल्लेया इन्हा जो इत्ते का लेई जाओ मेरे बाबे रे घर जो डाकुआं रा अड्डा बणाई दित्ते रा है। 17तां तिसेरे चेल्‍लेयां जो चेत्ता आया कि पवित्रशास्त्र बिच लिख्खे रा है,

“तेरे मन्दिर तांइ मेरा जुनून आग्ग सांई भखेया करदा है।”

18इस पर यहूदी लोक्कां रे अगुवे लोक्कां ने तिसजो बोल्लेया, तू जे ए करदा तां हमारे जो कुण वाला चमत्कार दसदा? 19यीशु ने तिन्हा जो जवाब दित्ता इस मन्दिर जो ढाई देयो ते मैं इसजो तीन्न दिना बिच खड़ा करी दिंगा। 20यहूदी लोक्कां रे अगुवे लोक्कां ने बोल्लेया, इस मन्दिर जो बणाणे तिकर छताली साल लगे रे हिन, तां कै तू तिसजो तीन्न दिना बिच खड़ा करी सकदा? 21पर मन्दिर बोलणे तिन्हेरा मतलब सरीर थिया। 22इधेरे तांइ जां यीशु मुर्देयां बिच का जिन्दे होई गे, तां तिन्हेरे चेल्‍लेयां जो इस गल्ल रा दुबारा तां चेत्ता आया। तां तिन्हा ने पवित्रशास्त्र री तिस गल्ल रा विश्वास कित्तेया, जे मसीह रे फिरी जिन्दे होणे रे बारे बिच बोलदी, ते यीशु ने भी बोल्ली थी।

यीशु इन्सान रे मन जो जाणदे

23“जिस बेल्ले से यरुशलेम सहर बिच फसह रे त्याहार बिच थिया, तां मतेयां ने तिन्हेरे चमत्कार,

जे से दसदा थिया, से दिख्खी करी तिस पर विश्वास कित्ता।”

24पर यीशु ने अप्पु जो तिन्हेरे भरोस्से पर नी छड्डेया किजोकी से सबणी जो जाणदा थिया। 25कने तिसजो कोई जरुरत नी थी कि से मणूआं रे बारे बिच कोई गवाई दे किजोकी से अप्पु ही जाणदा थिया कि मणूआं रे मना बिच कै है।

Sélection en cours:

यूहन्ना 2: CDHNT

Surbrillance

Copier