लूका 22
22
यीशु बै ढौकणै री तरकीब
1यहूदी रा अखमीरी रोटी रा त्यौहार ज़ुणिबै फसह बोला सी सौ नेड़ ती। 2तेई बौगतै मुख्यपुरोहिता होर शास्त्रियै यीशु बै ढौकणै होर मारनै री सलाह केरदै लागैदै ती पर ते लोका न डौरा ती।
यहूदा रा विश्वासघात
3तैबै यहूदा इस्करियोती ज़ो कि यीशु रा एक च़ेला ती तेई आँध्रै न शैतानी विच़ार ज़ागै। 4यहूदा इस्करियोती मुख्यपुरोहिते होर पौहरैदारै रै प्रधाना सैंघै मिलु होर बोलू हांऊँ तुसाबै दसा कि तुसै यीशु बै कैण्ढै ढौकी सका सी। 5यहूदै री मज़ती पाईआ ते बोहू खुश हुऐ होर तेइबै ईनाम देणै रा वायदा केरू। 6यहूदै तिन्हरी गैल मैनी होर सौ मौकै तोपदा लागा कि कैबै भीड़ै रै लोका कम होलै होर प्रभु यीशु बै ढौकणै द्याला।
यीशु रा च़ेले सैंघै आखरी भोज
7तैबै अखमीरी रोटी री साज़ै रा ध्याड़ा आऊ, होर तेई ध्याड़ै न एकी छ़ेलू री बलि ज़रूरी देणी पौड़ा ती। 8यीशुऐ पतरस होर यूहन्ना बै बोलू, “आगै जाईया आसरी तैंईंयैं फसह री रोटी खाँणै री तैंईंयैं त्यारी केरा कि आसै सैंघै बैशिया भोज खालै।” 9च़ेले यीशु न पुछ़ू, “तुसै आसाबै तेसा ज़ैगा दैसात् ज़ौखै आसै भोज त्यार केरी सका सी।” 10यीशुऐ च़ेले बै बोलू, “हेरा, ज़ैबै तुसै यरूश्लेम शैहरा न पूज़लै, ता तौखै तुसाबै पाणी रै भाण्डै लेइया एक मांहणु मिलणा। ज़ुणी घौरा बै सौ ज़ाला तुसै बी तेई पिछ़ै तेही घौरा बै ज़ाईत्, 11होर तौखै तेई घौरा रै मालका न पुछीत्, ‘गुरू जी ऐ तुसाबै बोलू सा; कि पाहुँणै रा कमरा कुण सा, ज़ौखै हांऊँ आपणै च़ेले सैंघै फसह रै साज़ै रा भोज़ केरनु?’ 12तैबै तेई तुसाबै सज़ा-सज़ाऊदा होर त्यार केरूदा कमरा रिहाणा। तौखै तुसै फसह रा भोज त्यार केरेइत्।” 13तैबै च़ेले तेई शैहरा धिराबै नौठै, होर ज़ैण्ढा प्रभु यीशुऐ बोलू ती, तिन्हां बै सैभ किछ़ तैण्ढा मिलू, तैबै तिन्हैं फसह रा भोज त्यार केरू।
प्रभु रा आखरी भोज
14“ज़ैबै ठीक बौगत आऊ, तैबै प्रभु यीशु आपणै बारा प्रेरिता सैंघै एकी मेज़ा पैंधै फसह रा भोज केरदै बेठै। 15होर यीशुऐ तिन्हां बै बोलू, कि मेरी बड़ी इच्छा ती कि दुःख सौहणै होर मौरनै न पैहलै हांऊँ तुसा सैंघै फसह रा ऐ भोज केरनु। 16किबैकि हांऊँ तुसाबै बोला सा कि ज़ाँ तैंईंयैं परमेश्वरै रै राज्य न फसह रै त्यौहारा रा मकसद पूरा नी होला, ताँ तैंईंयैं मूँ ऐ भोज कैधी नी खाँणा।” 17तैबै यीशुऐ अँगूरै रै रस्सा रा कटोरा च़कू होर परमेश्वरा बै धन्यवाद देइया च़ेले बै धिना होर बोलू, “ऐई कटोरै बै आपु न बोंडा। 18हांऊँ तुसाबै सच़ बोला सा, ज़ाँ तैंईंयैं परमेश्वरा रा राज्य नी ऐला ताँ तैंईंयैं मूँ कैधी बी ऐ अँगूरै रा रस्स नी पीणा।” 19तैबै यीशुऐ रोटी लेई होर परमेश्वरा रा धन्यवाद देइया रोटी चोड़ी होर च़ेले बै देंदी घेरै बोलू, “ऐ मेरी देह सा ज़ो तुसरी तैंईंयैं देणी लाई सा, मेरी यादी न ऐण्ढा केरदै रोईत्।” 20तैबै यीशुऐ अँगूरै रै रसा रा कटोरा हौथा न च़कू होर बोलू, “ऐ कटोरा मेरै लोहू बहाणै रै नऊँई वायदा री निशाणी सा, ज़ुण तुसरी तैंईंयैं बहाईणा।#निर्ग. 24:8; 1 कुरि. 11:25; मत्ती 26:28; जक. 9:11. 21पर हेरा, मुँभै धोखा दैणु आल़ा बी मूँ सैंघै फसह रा भोज केरदा लागा सा। 22मांहणु रै बेटै रा मौरना ता परमेश्वरै री योजना न पक्का सा, पर हाय सा तेई मांहणु पैंधै ज़ौसरी बजहा न मांहणु रै बेटै ढौकिणा।” 23एसा गैला बै शुणिया च़ेले आपु न स्वाल पुछदै लागै, “आसा मौंझ़ै ऐण्ढा कुण होई सका सा?”
बड़ा कुण सा
24च़ेले आपु न ऐसा गैला पिछ़ै बैहस केरदै लागै कि आसा मौंझ़ै बड़ा कुण सा। 25पर यीशुऐ च़ेले बै बोलू, “एसा दुनियै रै राज़ा होर बड़ै-बड़ै यहूदी नेता लोका पैंधै आपणा अधिकार रखा सी होर बोला सी कि आसै तुसरै सैंघी होर तुसाबै बचाणु आल़ै सी। 26पर तुसै ऐण्ढै नी ऑथि तुसा मौंझ़ै ज़ुण सैभी न बड़ा सा सौ सैभी न होछ़ा बणला होर ज़ुण प्रधान सा सौ सेवका सांही बणला। 27किबैकि बड़ा कुण सा, सौ ज़ुण खाँदा लागा सा या ज़ुण बौण्डदा लागादा सा? बड़ा सौ सा ज़ुण खाँदा लागादा सा पर हांऊँ तुसा मौंझ़ै सेवका सांही सा।
28 “तुसै मेरी हर दुःख तकलीपा न मेरा साथ धिना। 29हांऊँ बी तुसाबै एक राज्य देआ सा ज़ैण्ढा कि मेरै बापू परमेश्वरै मुँभै धिना सा। 30कि तुसै मूँ सैंघै तेई राज्य न मेरी मेज़ा पैंधै खा-पिया होर तुसा सिंहासना पैंधै बैशिया इस्राएली रै बारा गोत्रा रै लोका रा न्याय केरना।”
पतरसै रै नाँह केरनै री भविष्यवाणी
31यीशुऐ शमौन-पतरसा बै बोलू, “शमौन, ओ शमौन, हेर शैतानै तुसा सैभी बै गेहूँ सांही आँगी केरनै री ती तैंईंयैं परमेश्वरा न हुक्म पाऊ सा। 32यीशुऐ बोलू, ओ पतरस, मैं तेरी तैंईंयैं प्रार्थना केरी सा कि तेरा बशाह खत्म नी लोड़ी हुआ होर ज़ैबै तु वापस एला ता आपणै सैंघी भाई बै मज़बूत केरी।” 33पर पतरसै बोलू, “ओ प्रभु जी, हांऊँ तुसा सैंघै ज़ेल ज़ाणै होर तुसा सैंघै मौरनै री तैंईंयैं त्यार सा।” 34यीशुऐ तेइबै बोलू, “पतरस, हांऊँ तौभै बोला सा, कि ज़ैबै तैंईंयैं तू त्रा बार मेरा नाँह नी केरला कि हांऊँ तौभै नी ज़ाणदा, तैबै तैंईंयैं मुर्गै बांग नी देंणी।”
35तैबै यीशुऐ च़ेले न पुछ़ू, “ज़ैबै मैं तुसै बगैर बटुऐ, बैगा बगैर होर बगैर ज़ूतै भेज़ै, कि तैबै तुसाबै कौसी च़ीज़ै री कमी हुई?” तिन्हैं बोलू, “आसाबै कौसी च़ीज़ै री कमी नी हुई।” 36तैबै यीशुऐ बोलू, “पर ऐबै आपु सैंघै झोल़ा होर बटुऐ रैखा। होर अगर कोई हागै तलवार नी ऑथि ता सौ आपणै झिकड़ै बेच़िया आपणी तैंईंयैं तलवार लेला। 37हांऊँ तुसाबै बोला सा, ज़ो पवित्र शास्त्रा न लिखू सा, कि सौ अपराधी सैंघै गिणुआ तेइरा, मूँ न पूरा होंणा ज़रूरी सा। भविष्यवक्तै मेरै बारै न ज़ो लिखुदा सा ते सब गैला सच़िऐ पूरी होंणु आई सी।”
38च़ेले बोलू, “ओ प्रभु जी, हेरा, औखै दुई तलवारी सी।” प्रभु यीशुऐ तिन्हां बै बोलू, “बोहू सी।”
यीशु ज़ैतून नाँ रै ढौगा पैंधै प्रार्थना केरा सी
39यीशु तेई कमरै न बाहरै निकतै होर पैहलै सांही जैतून नाँ रै ढौगा पैंधै नौठै। तिन्हरै च़ेले बी तिन्हां पिछ़ै नौठै। 40तौखै पुजिआ यीशुऐ च़ेले बै बोलू, “प्रार्थना केरदै रौहा, कि तुसै परीक्षा न नी पौऐ लोड़ी।” 41ते च़ेले न थोड़ी दूर नौठै, होर घुटनै टेकिआ प्रार्थना केरदै लागै। 42“हे स्वर्गै रै बापु, अगर तुसै च़ाहा सी ता ऐई प्यालै बै मूँ न दूर केरात्, तैबै भी मेरी नी पर तुसरी इच्छा पूरी लोड़ी हुई।” 43तैबै स्वर्गा न परमेश्वरा रा एक स्वर्गदूत प्रगट हुआ, होर तेइयै यीशु बै शक्ति धिनी। 44यीशु बड़ै व्याकुल होईया प्रार्थना केरदै लागै। तिन्हरी आत्मै री बैदना ऐतरी बैढ़ी कि तिन्हरा पसीना धौरती पैंधै लोहू बैंणिया च़ुड़दा लागा। 45तैबै ते प्रार्थना न उठै होर आपणै च़ेले हागै आऐ तिन्हैं आपणै च़ेले सुतैदै हेरै किबैकि ते थकै दै होर उदास ती। 46यीशुऐ तिन्हां बै बोलू, “तुसै किबै सोंदै लागैदै सी? उठा होर प्रार्थना केरा, कोइँछ़ै ऐण्ढा नी लोड़ी हुआ कि तुसै परीक्षा न पौड़लै।” 47ज़ैबै बौलदै लागै ती, तैबै लोकै री एक बड़ी भीड़ तौखै पुज़ी। तिन्हां बारा च़ेले न एक ज़ुणिरा न यहूदा इस्करियोती ती, सौ भीड़ा न आगै-आगै औंढदा लागा ती। यहूदा प्रभु बै माँकी दैणै री तैंईंयैं तिन्हां भेटी आऊ, ज़ो तेई सैंघै तिन्हां लोका बै इशारा केरदा लागा ती कि ऐई यीशु सा। 48तैबै यीशुऐ तेइबै बोलू, “ओ यहूदा तू कि एक माँकी लेइया मांहणु रै बेटै ढौकणै द्या सा?” 49ज़ैबै तेइरै सैंघियै हेरू कि किछ़ होंदा लागा सा ता तिन्हैं बोलू, “हे प्रभु जी कि आसा इन्हां सैंघै लड़ाई केरनी? आसै आपणी तलवारी सैंघै आंणी सी।” 50तैबै तिन्हां मौंझ़ै न एकियै आपणी तलवार महापुरोहित रै नोकरा पैंधै च़लाई होर तेइरा दैंहीणा कोन काटू। 51पर प्रभु यीशुऐ बोलू, “बस केरा ऐबै” प्रभुऐ तेई मांहणु रा कोन छुँगु होर तेइरा कोन ठीक हुआ। 52तैबै यीशुऐ मन्दिरै रै मुख्यपुरोहिता धर्मगुरू होर स्याणै ज़ुण प्रभु यीशु बै ढौकदै आऐ ती बोलू, “तुसाबै हांऊँ कि कोई डाकू लागा सा, ज़ो तुसै मुँभै तलवारी होर डँडै पाईआ ढौकदै आऐ सी? 53तुसै हांऊँ मन्दिरा न किबै नी ढौकु, तौखै ता हांऊँ रोज़ एज़ा ती होर तुसै भी तौखै होआ ती! पर ऐ बौगत तुसरा सा, बल्कि निहारै रै राज्य रा बौगत सा।”
पतरसा रा नाँह केरना
54तैबै तिन्हैं यीशु ढौकिऐ महापुरोहिता हागै बै नेऐ, पतरस दूर-दूर तिन्हां पिछ़ै औंढदा लागा ती। 55होर ते पौहरैदार खौल़ा न औग पकेईया च़ारै पासै बेठै होर पतरस भी तिन्हां मौंझ़ै बेठा। 56ऐकी दासीऐ औगी रै प्याशै न पतरसा बै हेरिया बोलू, “ऐ मांहणु भी ता यीशु सैंघै ती।” 57पतरसै तेसा बेटड़ी बै बोलू, “हांऊँ ता प्रभु यीशु बै पछ़ियाणदा बी नी ऑथि।” 58थोड़ी देरी बाद कोई होरी मांहणुऐ पतरसा बै हेरिया बोलू, “तु बी ता प्रभु यीशु सैंघै ती!” 59थोड़ी देर बाद होरी मांहणुऐ बोलू, “तु बी पक्का यीशु सैंघै ती, किबैकि तू बी गलीला रा रौहणु आल़ा सा।” 60पर पतरसै बोलू, “ओ मांहणुआ, हांऊँ नी ज़ाणदा कि तू कुणी रै बारै न बोलदा लागा सा।” पतरसै ऐण्ढा बोलूऐ ती कि मुर्गै बाँग धिनी। 61तैबै यीशुऐ मुड़िया पतरसा धिरै हेरू, होर पतरसा बै याद आई कि यीशुऐ बोलू ती, कि “औज़ दोथी मुर्गै रै बाँग देणै न पैहलै, तौ त्रा बार मेरा नाँह केरना कि तू मुँभै नी ज़ाणदा।” 62तैबै पतरस बाहरै नौठा होर ज़ोरै-ज़ोरै रोंदा लागा।
यीशु रा उपहास
63ज़ुणी मांहणुऐ यीशु ढौकै ती ते तिन्हरा ठठा केरदै लागै होर तिन्हां बै मारदै लागै। 64तिन्हैं यीशु री औछ़ी पांधै पट्टी बोनी होर ते मारदै लागै होर तिन्हां न पुछ़ू, “भविष्यवाणी केरनु आल़ै ऐबै दस कि तेरै कुणिऐ बाही।” 65तिन्हैं बोहू सारी होर भी निन्दा री गैला तिन्हरै बारै न बोली।
महासभै रै सामनै यीशु
66ज़ैबै ध्याड़ा आऊ तैबै यहूदी लोकै रै सभै स्याणै होर मुख्यपुरोहिता होर शास्त्री कठा हुऐ, होर यीशु सभा रै सामनै आंणै। 67ते यीशु बै बोलदै लागै, “अगर तू मसीह सा, ता आसाबै बोल!” पर तिन्हैं उतर धिना, “अगर हांऊँ तुसाबै दैसनु ता तुसा बशाह नी केरना। 68होर अगर हांऊँ तुसा न पुछनू, ता तुसरै ज़वाब नी देईणा। 69पर ऐबै न बाद मांहणु रै बेटै सर्वशक्तिमान परमेश्वरा रै दैहिणी धिरै बैशिया रौहणा।” 70ऐसा गैला पैंधै तिन्हैं बोलू, “तू कि आपणै आपा बै परमेश्वरा रा बेटा बोला सा?” यीशुऐ बोलू, “हाँ हांऊँ सा।” 71तैबै तिन्हैं बोलू, “ऐबै आसाबै गुआही दैणु आल़ै री कि ज़रूरत सा, किबैकि आसै आपु ऐईरै मुँहा न शुणू।”
Sélection en cours:
लूका 22: KFX-NT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
This work is licensed under Creative Commons Attribution-ShareAlike 4.0 License.
