युहन्ना 16

1 “ईंयां गल्ला बोली मंऐं तम्हां लै एते तैणीं कि तम्हैं मुंह दी विश्वास करनअ नां छ़ाडे। 2तिन्नां काढणैं तम्हैं परमेशरे आराधना कोठी का बागै। एतरअ ता हुअ पर आजू एछणअ इहअ बगत बी कि ज़ुंण बी तम्हां मारी पाए तेऊ सोठणअ आपणैं आप इहअ कि हुंह आसा लागअ द परमेशरे सेऊआ करदअ।

3 “इहअ करनअ तिन्नां तै कि तिन्नैं नां ता बाप्पू परमेशर आथी बछ़ैणअ द और नां ता तिंयां मुंह बछ़ैणदै। 4पर ईंयां गल्ला खोज़ी मंऐं तै कि ज़ेभै इहअ बगत एछे, तेभै लोल़ी तम्हां आद फिरी कि मंऐं हेरअ त तम्हां का पैहलै ई खोज़ी।

पबित्र आत्में काम

“शुरू दी निं मंऐं तम्हां का ईंयां गल्ला एते तैणीं खोज़ी कि हुंह त आप्पै तम्हां संघै। 5ऐबै च़ाल्लअ हुंह तेऊ सेटा लै बापस डेऊई ज़ुंणी हुंह संसारा लै आसा छ़ाडअ द। तम्हां मांझ़ै निं कोहै मुंह पुछ़दअ कि तूह किधा लै च़ाल्लअ? 6ज़ुंण मंऐं ईंयां गल्ला तम्हां का खोज़ी एता करै भर्हुअ थारअ मन दुख शोगा करै।

7 “तैबी खोज़ा हुंह तम्हां का सत्त आसा इहअ कि मेरअ डेऊणअ आसा तम्हां लै भलअ। ज़ै हुंह नांईं डेऊं, तै निं सह मज़त करनै आल़अ तम्हां सेटा लै एछणअ। पर ज़ांऊं हुंह डेऊणअ, तेखअ छ़ाडणअ मुंह सह तम्हां सेटा लै। 8तेऊ लाणअ संसारे लोगा लै दोश कि तिन्नैं किअ पाप। तिन्नां का रहैऊंणअ तेऊ कि तिन्नैं निं परमेशरे साबै धर्म किअ और इहअ बी कि परमेशरा करनअ एकी धैल़ी एसा गल्लो न्याय किल्हैकि तिन्नैं निं तिहअ किअ ज़ुंण परमेशरै तिन्नां लै बोलअ त।

9 “पापे बारै न्याय करनअ तेऊ तै कि तिंयां निं मुंह दी विश्वास करदै। 10धर्में बारै करनअ तै कि हुंह डेऊणअ बाप्पू सेटा लै और तम्हैं निं मुंह भी भाल़ी सकदै। 11न्याय हणें बारै करनअ तै कि एऊ संसारे राज़ै लै आसा हेरअ द दोश लाई। (युहन्ना 12:31)

12 “मुंह बोल़णीं ती तम्हां लै होर बी गल्ला, पर तम्हैं निं एभै तिन्नां ज़िरी सकदै। 13पर ज़ेभै सत्तो आत्मां एछणअ, तेऊ खोज़णीं तम्हां का सत्ते सह बात। किल्हैकि तेऊ निं आपणीं बाखा किछ़ै गल्ल खोज़णीं। पर ज़ुंण तेऊ परमेशरा का शुणनी, तेऊ खोज़णीं तिंयां ई गल्ला और आजू हणैं आल़ी सारी गल्ला खोज़णीं तेऊ तम्हां का। 14पबित्र आत्मां आणनअ मेरअ प्रतप। किल्हैकि तेऊ खोज़णीं तम्हां का मेरी ई गल्ला। 15ज़ुंण बी मेरै बाप्पूओ आसा, सह आसा सोभ मेरअ। तैहीता मंऐं तम्हां का बोलअ, ‘तेऊ खोज़णीं तम्हां का मेरी ई गल्ला का।’

दुख बदल़णअ सुखा दी

16 “थोल़ी घल़ी निं हुंह तम्हां का शुझणअ आथी और थोल़ी घल़ी बाद शुझणअ हुंह तम्हां का भी, किल्हैकि हुंह डेऊणअ बाप्पू सेटा लै।”

17तेखअ लागै कई च़ेल्लै आप्पू मांझ़ै गल्ला करदै, “अह इहअ कै बोला कि ‘थोल़ी घल़ी निं हुंह शुझणअ और थोल़ी घल़ी बाद शुझणअ? तै कि हुंह डेऊणअ बाप्पू सेटा लै?’” 18तेखअ बोलअ तिन्नैं, “अह ज़ुंण थोल़ी घल़ी बोला, अह किज़ै गल्ल आसा? हाम्हां का निस्सअ थोघ लागी किज़ै बोला?”

19ईशू हेरअ ज़ाणीं कि तिंयां च़ाहा मुखा पुछ़णअ, तेखअ बोलअ तेऊ तिन्नां लै इहअ, “आप्पू मांझ़ै तम्हैं मेरी एसा गल्ला पुछ़-ज़ाच़ करदै आसा लागै दै कि अह किज़ै बोलअ, थोल़ी घल़ी निं हुंह तम्हां का शुझणअ और थोल़ी घल़ी बाद शुझणअ तम्हां का हुंह भी? 20हुंह खोज़ा तम्हां का सत्त आसा अह कि तम्हैं लेरनै हीक पटाकी और तम्हां जैंदरी पल़णअ शोग, पर एऊ संसारा मनाऊंणी खुशी। पर थारअ शोग बदल़णअ खुशी दी। 21ज़ांऊं बेटल़ी सूंणें दाह लागा, तेभै पल़ा तेसा लै दुख-सांगट, किल्हैकि तेभै हआ तेसा लै दुखा तकलिफे घल़ी आई दी। पर ज़ांऊं सह बच्च़ै लै ज़ल्म दैई हेरा, एसा गल्ले खुशी कि एकी मणछ लअ संसारा दी ज़ल्म, तेसा दुखा सांगटे घल़ी निं सह आद करदी। (याशायाह 26:17; मीका 4:9)

22 “तम्हां बी आसा एभै शोग, पर हुंह एछणअ तम्हां सेटा लै भी और तम्हैं हणैं तेभै खुश और तेसा खुशी निं तम्हां का कोहै छ़ड़ैऊई सकदअ। 23तेसा धैल़ी निं तम्हां मुखा किछ़ै पुछ़णअ। हुंह खोज़ा तम्हां का सत्त कि, ज़ै तम्हैं बाप्पू परमेशरा का किज़ै मांगे, मेरै नांओंए दैणअ तेऊ तम्हां लै। 24अज़ी बी निं तम्हैं मेरै नांओंऐं किछ़ै मांगअ आथी, ज़ै तम्हैं मांगे, तै जाणीं तम्हां सह गल्ल भेटी ज़ेता तम्हैं मांगा ताकि थारी खुशी पूरी होए।

संसारा प्रैंदै ज़ीत

25 “मंऐं बोली ईंयां गल्ला तम्हां का कथ्या खोज़ी, पर आजू एछणअ इहअ बगत कि मुंह निं तम्हां का कथ्या खोज़ी करै गल्ला खोज़णीं, पर बाप्पूए बारै खोज़णअ मुंह तम्हां का खुल्ही करै। 26तेसा धैल़ी मांगणअ तम्हां मेरै नांओंआं दी और तेभै निं मुंह इहअ बोल़णीं कि हुंह करूं बाप्पू का तम्हां लै अरज़।

27 “किल्हैकि मेरै बाप्पू परमेशरा आसा आप्पू बी थारी बडी भारी झ़ूरी कि तम्हैं आसा डाही दी मुंह संघै झ़ूरी और एसा गल्लो विश्वास बी किअ कि हुंह आसा परमेशरा बाखा आअ द। 28हुंह आसा बाप्पू का निखल़ी करै संसारा दी आअ द, और बाप्पू ई सेटा डेऊणअ मुंह बापस।”

29तेऊए च़ेल्लै बोलअ तेऊ लै, “भाल़ ऐबै लागअ तूह खुल्ही करै बोलदअ, ऐबै निं तूह कोहै कथ्या खोज़ी बोलदअ, 30ऐबै गई हाम्हां पाक्कै दी ठीक समझ़ एछी कि तूह ज़ाणा सोभै गल्ला, और ताह निं किछ़ै ज़रुरत आथी कि कोई मणछ ताखा पुछ़े, एसा गल्ला करै करा हाम्हैं भरोस्सअ कि तूह आसा परमेशरा का निखल़अ द।”

31इहअ शूणीं बोलअ ईशू तिन्नां लै, “तम्हां कै एभै हुअ भरोस्सअ? 32हेरा, सह घल़ी एछणी, इधी तैणीं कि सह गई एछी कि तम्हैं छिंघणैं आपणीं-आपणीं बाता, और हुंह डाहणअ तम्हां कल्ही शोटी, तैबी निं हुंह कल्ही आथी, किल्हैकि बाप्पू आसा मुंह संघा। (युहन्ना 8:29)

33 “ईंयां गल्ला बोली मंऐं तम्हां का तै कि तम्हां मुंह दी शांती भेटे, संसारा दी हआ तम्हां भारी कष्ट, पर हैअ डाहै, मंऐं हेरअ संसार ज़िती।”

Sélection en cours:

युहन्ना 16: OSJNT

Surbrillance

Copier