ƐSLA 7
7
Ɛsla foonga Jelusalɛmi
1Hindei ji wooma, Aatasasi Paasia mahei mahayei hu, Ɛsla Sɛlaya hindoloi, Asalaya hindoloi, Hilikaya hindoloi, 2Salumi hindoloi, Sadɔki hindoloi, Ahitubi hindoloi, 3Amalaya hindoloi, Asalaya hindoloi, Mɛlaiɔti hindoloi, 4Sɛlahaya hindoloi, Usi hindoloi, Buki hindoloi, 5Abisua hindoloi, Fineasi hindoloi, Ɛlɛasa hindoloi, Elɔn hindoloi, yee saagbuamɔ wai; 6Ɛsla ji i hiyenilɔ i gbua Babilɔn i li. I yɛni a kɔlɔnyɛinmɔ yekpe lɔ tawao i yɛ Mojisi jawei gɔɔlɔ panda, na Ndemɔi Isleɛl Yewɔi i yɛ feni; tawao mahei i lumanilɔ na gbi ma i mɔlini, gbamaile Ndemɔi ngi Yewɔi yɛ ngi wooma.
7Isleɛl nungaa lɛnga ti liilɔ, kɛ saagbuablaa lɛnga, kɛ Livaitisia lɛnga, kɛ ngoleyablaa, kɛ ngɔlɔlamablaa, kɛ Ngewɔ wɛlei bu bɔilopoisia, tia bɛ ti lii lɔ Jelusalɛmi, Mahei Aatasasi mahayei hu fooi yee wɔfilei hu. 8Ti foonilɔ Jelusalɛmi ngalui yee lɔɔlui hu, mahei mahayei yee fooi wɔfilei hu. 9Foloi yee halayei ma ngalui yee halayei hu, gbua va Babilɔn i latoilɔ, kɛ foloi yee halayei ma ngalui yee lɔɔlui hu Ɛsla wanilɔ Jelusalɛmi, ajifa ngi Yewɔi yɛnilɔ ngi wooma. 10Ajifa Ɛsla ngi lii hu gbatɛnilɔ Ndemɔi jawei gaa va, tawao kɔɔ i pie i nungaa gaa a saweisia kɛ ndahiisia Isleɛl.
Kɔlɔ nyɛingɔi na Aatasasi feni Ɛsla wɛ
11Ji mia kɔlɔ nyɛingɔi le na Mahei Aatasasi feni Ɛsla saagbuamɔi wɛ, yee kɔlɔnyɛinmɔi, kɔlɔgɔɔmɔi Ndemɔi jaweisia va, kɛ ngi lahinsia Isleɛl va: 12“Aatasasi, mahangaa ti mahei, Ɛsla saagbuamɔi gama, ngelegohu Yewɔi jawa nyɛinmɔi: Ndiilɛli, kiahuna 13ngi sawa langa kɛ numu gbi Isleɛlbleisia lia, ɔɔ ti jaagbuableisia ɔɔ Livaitisia, nya mahawui hu, numu na ngi longɔ i li Jelusalɛmi a ngi nyɛkɛ, waa tieni wa lilɔ. 14Ajifa mahei kɛ ngi lahiiwablaa wɔfileisia mia ti bi loonga kɔɔ bi gɔfɛgbua wie kɔloongɔ Juda kɛ Jelusalɛmi ma, kɔlooni bi Yewɔi jawei ma na i bi yeya, 15kɛ gbɔma bi li a kanigolei kɛ kanigbɔlui na mahei kɛ ngi lahiiwableisia ti feni a ndiyekpe Isleɛl Yewɔi wɛ, na i heini Jelusalɛmi, 16taa kanigolei kɛ kanigbɔlui gbi na ba tɔɔ Babilɔn gbalatɛi gbi hu, kɛ nungeisia ti liyekpe vehanisia, kɛ saagbuablaa ti ndei, na ta fe a ndiyekpe ti Yewɔi wɛlei va na i Jelusalɛmi. 17Na wooma, ba nika hinangaa, mbala hinangaa, mbala lengaa yeyalɔ a pɔna hu wee a yee navoi ji, kɛ ti mɛhɛɛ kɛ ti gbɔli jaahaniisia, tawao ba ti gbuailɔ a saa wu Yewɔi wɛlɛ jaagbuamei na i Jelusalɛmi. 18Na gbi ba tɔ kpekpengɔ bi va kɛ bi mbaangaa pie va a kanigolei kɛ kanigbɔlui mɔnui ji, wa pie lɔ kia wu Yewɔi a lo la. 19Hakɛi nasia ti feni wu wɛ yenge va la wu Yewɔi wɛlei bu, wa felɔ Jelusalɛmi Yewɔi gulɔ. 20Tawao na gbi mahoungɔ bi Yewɔi wɛlei va, na mahoungɔ bi fe, ba felɔ a gbua mahei haka lamagbatɛmei.
21“Nya, Mahei Aatasasi, ngi sawa langa haka lamagbatɛblaa gbi ma ti kpalatɛisia hu Yufletisi yei wooma ngɛɛ: Na gbi lekee Ɛsla saagbuamɔi ngelegohu Yewɔi jawa gɔlɔ nyɛinmɔi a lo la bi yeya i wie a nɛmahulewe, 22i too kanigole gate hɔndɔ yila ma, kɛ ketii busɛ hɔndɔ naani, kɛ ndɔ bata hɔndɔ yila kɛ ngulɔ bata hɔndɔ yila, kɛ kpolo gboto nahi yee jika ii na. 23Na gbi ngelegohu Yewɔi a nde, wu pie a wu lii gbi Ngelegohu Yewɔi wɛlei va; ɔɔ hinda nyamu a walɔ mahei mahu kɛ ngi lengeisia. 24Mu nda gbɔma wu nɛmahu kɛ ɛɛ wote a pɔnahinda kɔɔ wu kɔnjɔ gbuala gbɔnda saagbuableisia ma, Livaitisia ma, nguleyaableisia ma, nɛtɛla loobleisia ma, Ngewɔ wɛlɛ bu bɔilopoisia, ɔɔ bɔilopoi yee pekeisia ti Ngewɔ wɛlei ji bu.
25“Kɛ bia bi Ɛsla, kɔloongɔ Ngewɔ nɛmahulewe ma i bi yeya, loko loo kitileweblaa ma nasia ta nungei nasia gbi gbɛmbo kpalatɛi hu Yufletisi yei wooma, nasia ti bi Yewɔi jawei gɔɔngɔ; tawao ba nasia gaa lɔ tii kɔɔ. 26Nasia gbi lekee tii luma a bi Yewɔi jawei hou la, kɛ mahei jawei hou la, pie ti ti gbɛmbo vulii, i yɛ bɛ a haa va ɔɔ ti gbɛ va ndɔɔlei hu, ɔɔ ti yeya haka gbua va ti yeya, ɔɔ ti wu va kpindikpindi wɛlei bu.”
Ɛsla Ngewɔ latonga
27Luba i yɛ Ndemɔi ma, mu kɛkɛni ti Yewɔi, na i hindei ji nyikɔ wuni mahei lii hu, mbɛlɛya ve va Ndemɔi wɛlei wɛ Jelusalɛmi, 28tawao na i ndoma gbaukpau gɛnga a nge mahei yama, kɛ ngi lahiiwableisia, kɛ mahei gbakoowawasia gbi gulɔ. I nya lii nɛpɔnilɔ ajifa Ndemɔi nya Yewɔi lokoi yɛnilɔ nya ma, kɛ ngi Isleɛl lookulɔisia lɛngama li va mua tieni.
Sélection en cours:
ƐSLA 7: RMB
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Mende Bible Portions © Bible Society in Sierra Leone and Lutheran Bible Translators, 2020.