ƐSLA 3
3
Ngewɔ vɛlilei latoonga gbɔma
1Ji ngalui yee wɔfilei i hitini, tawao Isleɛlaitibleisia ti yɛ heini ti leisia hu, nungeisia ti gomɛlɔ a lenga, Jelusalɛmi. 2Na wooma Jɛsua Josedaki hindoloi kɛ ngi ndeweingeisia saagbuableisia, kɛ Sɛlubabɛli Sealitiɛli hindoloi taa ngi ndeweingeisia, ti hiyelɔ Isleɛl Yewɔi jaagbuamei loo va, mɔ jaahani gbua va na, kia nyɛingɔ la Mojisi jawei hu, Ngewɔmɔi. 3Ti saagbuamei loilɔ yee falamei ma, gbamaile ti yɛ lɔ a luwa ndɔɔlɔhubleisia ma, kɛ ti mɔ jaahanisia gbuanga Ndemɔi gama a ngenda kɛ a kpɔkɔ. 4Kɛ ti bafa gomei hounga kia nyɛingɔ yɛla, kɛ ti folo gbi mɔ jaahanisia gbuanga a ti jikei, ndalongɔ sawɛi ma, kia mahoungɔ yɛla pie va folo gbi, 5tawao kpelema gbi mɔ jaahanisia gbuangɔi wooma, ngawu nina vehanisia, kɛ Ndemɔi gayema gomeisia gbi kɛ numui gbi vehanisia nasia taa ndiyekpe vehani ve Ndemɔi wɛ. 6I hiye foloi yee halayei ma ngalui yee wɔfilei hu ti tɔtoilɔ a gbuala a mɔ jaahaningaa gbuala Ndemɔi gama. Kɛɛ ti yaa yɛla a Ndemɔi wɛlei valamei lani.
Ngewɔ Wɛlei loolei latoonga gbɔma
7Fale ti navo veilɔ pɛlɛ loobleisia wɛ kɛ kapindeisia, kɛ mɛhɛɛ kɛ kpɔlehani kɛ ngulɔ Saidɔnblaa wɛ kɛ Taliablaa wɛ kɔ ti wa a siida wului nasia ta ti gbua Libanɔn i to gboyei ma Jɔppa kia Sailɔsi Paasia mahei i yɛ lumani ti wɛ.
8Fooi yee feleyei hu, ngalui yee felei hu ji ti wani Ngewɔ wɛlei gama Jelusalɛmi, Sɛlubabɛli Sealitiɛli hindoloi kɛ Jɛsua Josedaki hindoloi, ti hinda latoilɔ, a lenga taa numu wekeisia, saagbuableisia kɛ Livaitisia nasia ta yenge Ngewɔ wɛlei bu, kɛ nasia kpɛlɛɛ ti wanga Jelusalɛmi ta gbua kɔhoui hu. Ti loko loilɔ Livaitisia ma nasia ta yenge Ngewɔ wɛlei bu, i hiye nasia ma ti vooi gungɔ a foo numu gbɔyɔngɔ kɛ mahu ma, loo va Ndemɔi wɛlei yengei mahu. 9Kɛ Jɛsua kɛ ngi hingaa lengeisia kɛ ngi ndewei, kɛ Kadimiɛli kɛ ngi hingaa lengeisia, Binui kɛ Hodavaya taa Hɛnedadi hingaa lengeisia, Livaitisia, ti hingaa lengeisia kɛ ti ndewengeisia, a lenga ti ngengeblaa mahugbeelɔ Ngewɔ wɛlei bu.
10Ji pɛlɛ loobleisia ti Ndemɔi wɛlei valamei lani, saagbuablaa ti loilɔ ti mayilingɔ a ti jaagbua mayili, a bulungaa vɛla, kɛ Livaitisia nasia ta yenge Ngewɔ wɛlei bu Asafi hingaa lengeisia sangbeisia ti ti yeya, Ndemɔi lato va kia Devidi Isleɛl mahei i yɛ ndeni; 11tawao ti ngole yailɔ kakei ji kɛ kakei na ma, ta Ndemɔi lato tawao ta sɛigbua ngi ma tɛ,
“Ajifa ngi gbekpengɔ,
ajifa ngi loma gbaukpaui a yɛlɔ Isleɛl gama kunafɔ va.”
Kɛ nungeisia gbi ti ndenga ngeleya ji ti Ndemɔi latoni, gbamaile Ndemɔi wɛlei yee falamei langɔ yɛla. 12Kɛɛ saagbuablaa gbotoma, kɛ Livaitisia gbotoma, kɛ mbondɛisia ti wɛlɛbublaa ti mahublaa ti gbotoma, numu wovei nasia ti yɛ Ngewɔ wɛlei yee halayei lɔni looni ngi valamei, ji ti pɛlei ji yee falamei lɔni i lani ti yama, ti wɔlɔilɔ a ngɔlɔ wo waa, kia bɛ ti gbotoma ti yele gulailɔ a kohunɛɛ, 13nahi nungaa tɛɛ gu taa kohunɛɛ woi luahu gɛ a nungaa ti wɔlɔ woi, gbamaile nungaa ti wɔlɔilɔ ngeleya a ngo waa, ajifa nungeisia ti yele gulailɔ ngeleya waa nahi ti ti jɔlɛ woi mɛnilɔ polooŋ.
Sélection en cours:
ƐSLA 3: RMB
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Mende Bible Portions © Bible Society in Sierra Leone and Lutheran Bible Translators, 2020.