KEJADIAN 43
43
Yusuf ori nin o Mesir libag ane
1O Kanaan inap arimano suburu obok toho weregman eneg asengseng toho welatfag. 2Wereg lit roti anggen Yakub umalikisiyen o Mesiren walug watfahon arimano obog toho nibagma Yakub inowen umalikisi unubam ele uruk lit, ”Nin suhuloho o Mesir lahupteg roti anggen ayeg waroho walug wamuhup,” ulug hiyag isibag. 3Hiyag isibagma Yehuda inowen hiyag utuk lit, ”Mesir ahun inowen ele olok toho hiyag nisaruk lit, ’Hit honot men ambiyeg wamuhup fug halug an norohole yet niyahup fug,’ irisi. 4Ari irisi ane hikit toho Benyamin men ambiyeg lahup imihin halug eneg niren hat fahet roti anggen onggo palik lahuken o Mesir lahuk. 5Ambiyeg lahup imihin fug halug nit lahuk fug. Mesir ahun inowen irisi ane suhan isalug nit Benyamin olma embeselug lahuk halug ap ino olohotma la fug teg lamuhuk,” ulug hiyag itfag. 6Hiyag itfagma Yakuben ele uruk lit, ”Hiren nungge fahet ap ino fam, ’Nonot eke wereg,’ ulug hiyag utuk lit an siyahap naptikip?” ibag. 7Ibagma iren hebeloho hiyag utuk lit, ”Ap inowen nit nonori men nunubahet fuki roho kapal nisaruk lit, ’Hit hinikni oluk wereg ano? Hit honot eke wereg ano?’ ulug umung nisarisimu niren we tem ane hiyag utukuk. Hiyag utukukon fahet aren hebeloho, ’Honot an nambeg hondoholug wamuhup,’ ulug hiyag nisamisi ulug nenepeleg teg lit we tem ane eneg hiyag utukuk,” ibag. 8Ari ibagma Yehuda inowen Yakub fam ele uruk lit, ”Hat men nit men nunumalikisi men suburu oboken war amuhuk tohon ulug haren malik ino an ninggikmu embemihinmu nit we pikit toho lul. 9Lulteg anden malik ino foroho laruhuk. Forohoman nungge-nungge at ubam aruhu halug haren alem ino an nubam umbuhun. Anden malik ino hondoholug lahukteg suhuloho waharuk lit at ebe fano angge hat holohotma umbuhuk fug halug an noluk wereg li alem angginon ari an nubam eneg welaruhu. 10Nit folo-folo wilip atla angge famen ninindi nonghong uruk lit pok atukuk. Nit atam we pikit toho lila halug ketiya oho pirenam suhuloho watla,” ibag. 11Ari ibagma inikni Yakub inowen ele uruk lit, ”Ari ehen halug lalihipteg fano-fano angge nit nenengginang famen wilip atukon e ahaluwe amben fanowon men ap hihir eneptukon men kin ahaluwe men hilak men wiramna men tor angge oko Mesir ahun ino og umuhuben henesum fam fani roho walug lalihip. 12Walug laruk lit roti anggen onggo palik lahubon fahet uang oho walug lalihip. Nin sebe roho uang atam hebeloho henesum fam fani ruruson oho enepelehen fani rurusa lit tehen suhuloho og isahuk ulug walug lalihip. 13Lalihiben we pikit toho in atug honot hinim lalihip. 14O Mesir lahupmu Mesir ahun inowen hit indi henesug lit Benyamin men Simeon men hit hinim lalihip ulug hiyag hisahuwen Allah mondabi ineyon inowen ap ino indi anggarap tuhu ulug anden sembahyang uruk lahi angge famen an numalikisi longgo uhup halug fano longgo uhup,” ibag.
15Ari ibagma Yakub umalikisi arimanowen fano-fano angge men uang roti anggen onggo palik lahuk pibahon men tam hebeloho og isibahon men walug laruk lit Benyamin men o Mesir wirig atfareg Yusuf ambeg libag. 16Owesi Benyamin men waharukmu yet isibareg Yusuf inowen at ibam foroho ahun ubam ele uruk lit, ”Ap wahason aruma an nibam hondog eneplug watmihinteg wam eke waroho esetmihin. Esetmihinon ino mo anum pulmu welatmisimu anden it men ambiyeg nul,” ulug hiyag itfag. 17Hiyag itfag ane hikit toho ap inowen Yakub umalikisi arimano Yusuf ibam hondog eneplug watfag. 18Waharukmu yet isibareg Yakub umalikisiyen nungge fahet Yusuf ibam hondog neneplug wahasa ulug enekol hibareg enele uruk lit, ”Uang tam hebeloho nenesum fam fani ruruson arimano fahet alem nunubam umbul ulug nit tuma hondog neneplug wahasa. Wahasareg nenemingmingangge amuhup ulug sen nenesug lit nenembohom keledai oho hilalusa,” ibag. 19Ari ibareg Yakub umalikisi arimano Yusuf ibam foroho ahun sok elma unduhukmu libareg at ubam enele uruk lit, 20”Ninikni, nenele ulon hol himin! Atam niren roti anggen palik lahuk ulug tuma waharukuk. 21Waharukukteg suhuloho laruk lit nohoruk ambehen nenesum husuruk lit kim harukmen uang niren hit og hisarukukon obog toho nenesum wal taneg elma roti anggen emberimu weregma kim harukuk. Uang arimano nin suhuloho og husul ulug walug wahe. 22Ari walug waharuk lit niren nin eke roti anggen onggo palik lul ulug uang winon oho walug wahe. Uang tam og hisarukukon arimano ap san hebeloho nenesum fam fani ririsi ulug nit nenepeleg,” ulug hiyag itfag. 23Hiyag itfagma ap inowen hebeloho hiyag isaruk lit, ”Henekol ha fug angge hinindi yuwag toho welamek! Uang hiren tohon an og nisarikip. Og nisarikipmu Hinikni Allah hit hinikniyen oho wel turukon inowen fano-fano angge amuwon henesum fam fani ririsi,” ibag. Ibareg Simeon ino hondoko ori enembeg wilibig watfag.
24Watfareg ap inowen Yakub umalikisi arimano Yusuf ibam hondog eneplug kibareg unuyug umabukag ulug ik hinang isa waharuk lit enembohom keledai oho suburu og isibag. 25Og isibagma ap ekeyen hiyag isaruk lit, ”Mo anum pulmu welatmisimu Yusuf men suburu nalihip,” ulug hiyag isibagma Yakub umalikisi arimanowen Yusuf watmisi halug og umul ulug fano-fano angge walug watfahon arimano wep toho imbibag. 26Imbibagma Yusuf ino ibam watfag. Watfagma fano-fano angge arimano og irik libareg hi rul ulug onorohole han kinangma sahung atfag. 27Sahung atfagma Yusuf inowen fano welahep ano ulug kapal isibareg nin ele uruk lit, ”Hit hinikni tam hiren hiyag nitikip ahun ino ebe fano angge oluk wereg ano?” ulug umung isibag. 28Umung isibagma iren hiyag utuk lit, ”Nit ninikni hat hamingmingangge ino ebe fano angge oluk wereg,” ibareg enelenggen fam hur atlug onorohole han kinangma sahung atuk lit at hi ribag. 29Hi rurukmu Yusuf inowen kim isarukmen ot Benyamin at inggareg isingan indag tibahon ino oho weregma kim hibareg, ”Hit honot ilabowon hiren hiyag nitikibon ino tu waha ano?” ulug kapal isibareg, ”Namloho, Allahn hat indi hasug laruhu,” ulug Benyamin hi ribag. 30Hi ribareg Yusuf ino ot fahet indi anggin toho wenggel haruk lit namumu uba yarik lamin ulug folo-folo wilip atug hili undama welatfahon fam kibareg uba yatfag. 31Uba yatfareg orohole ik umako wilibig watfareg indimu wenggel hibahon hondo rebeseruk lit, ”Suburu og esemek,” ulug otsi hiyag isibag. 32Hiyag isibagma Mesir inaben Ibrani inap men ambiyeg naruk ane fahet inirim peruken Yusuf men Yakub umalikisi men Mesir inap Yusuf ibam welatfahon men enemu-enemu hur atfag. 33Yakub umalikisi arimano Yusuf olohotma hur amusa ulug monggiyon famen tulug ilabowon fam iraroho hur atuk ambeg wal toho hiyag isibag. Hiyag isibag ane ari fahet Yakub umalikisiyen enekol haruk lit it-it kim-kim atuk latfag. 34Ari turukmu suburu Yusuf olohotma imbibahon arimano minggiroho winon oko walug it onolohotma emberuk lit Benyamin olohotma ap fuwaben naruk ane wirim toho anggolo roho imbibag. Imbibagma inindi enehiyeg toho wereg lit Yusuf min suburu ik men nibag.
Sélection en cours:
KEJADIAN 43: YLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
@ LAI 2018
