KEJADIAN 41
41
Mesir inap inikniyen nei og hibag ane fahet Yusufen hiyag itfag ane
1Mo ilig am wirig am turukmu piren atfagma Mesir inap inikni inowen nei og harukmen at inggareg ik Nil ayegma unduhuk lit weregman 2wam sapi sabiren enebe fano reg lit sei anggolowon ik ahummuwen wilip atfareg hoholangge ik ayegma werehon narukmu yet isibag. 3Weregman nin sapi sabiren eke mondabi siyag teg lit unuwag eneg angge ik ahummuwen wilip atfareg it fanowon iniraham in arik libareg 4it siyahon itanowen sapi fanowon itano sali heheg narukmu nei og hibareg lagmag il ili atfag. 5Ap suwon ino il ili atfareg nin nohoruk lit inggik pirenehon nei og harukmen roti anggen alem misig famen inggik sabiren wilibigmu anggen fano roho yihik latfag. 6Yihik latfagma roti anggen winon eke wilip atukmu inggik sabiren teg latfag angge famen siyeluwen han wiratuken anggen siyahon eneg yihik fuk teg latfag. 7Ari reg lit siyag toho wilip atfahon itanowen anggen fano roho yihik latfahon itano lol heheg narukmu nei og hibareg ap suwon ino lagmag in atuk lit nei waruk lahi ulug oluk atfag. 8Likiya indi anggin toho wenggel haruk lit, ”Inindi anggat teg inap men fulu roho warukon hiyag isaruk inap men o Mesir werehon obog toho hondog enebik lalihip,” ulug otsi mon enepfag. Ap arimano hondog eneplug watfagma ap suwon inowen nei wibag ane hiyag isibag angge famen alem tu fahet warikin ulug ap misihen oho hiyag um fug teg latfag.
9Hiyag um fug teg latfagma ap suwon ik hinang utuk latfag ahun inowen ikni hiyag utuk lit, ”Nikni, anden siyag ane tirikikon fahet ketiya fag toho hiyag hitmin: 10Indam an nare roti wirag hutuk latisi ahun menen turukuk ane fahet hat holok harikinteg nininggik hele waroho hat hebe fet hasug inap sehen senehon onowe ibam kilap neneptikinmu wereg lit 11hup misihim sambil nit pirenen nei warukukteg nungge fahet wehe ulug nenebe wal tanehen wenggel haruk latukuk. 12Ibrani umalik kabiniyon misig hat fet hasug inap onowe amingmingangge roho werehon ino nit men ambiyeg weregma niren nei warukuk ane fahet hiyag utukukmu alem tu fahet wehep ulug hiyag nisarisi. 13Aren fuki roho hiyag nisarisi ane hikit toho teko larisiyon tu: Haren an nubam hiyag nutuk lit, ’Hiyabuk wituk latikin ambeg suhuloho watmihin,’ ulug hiyag nitikinteg nare ino ware feserikin,” ulug hiyag itfag.
14Hiyag itfagma Yusuf ino hondohik aliyek ulug otsi hiyag isibagma Yusuf ino folo-folo penjara famen wili fibareg oruk paloho sum keron wan tibibagma ap suwon ambeg hondoholug watfag. 15Watfagma ap suwon inowen hiyag utuk lit, ”Anden nei warikikon alem tu fahet warikin ulug ap misihen oho seleg toho hiyag nutusa fug. Hiyag nutusa fugmu anden hol harukmen hat eneg aben nei waruk ane fahet hol halug pikit toho hiyag isaruk urukon holtikik,” ulug hiyag itfag.
16Hiyag itfagma Yusuf inowen ele uruk lit, ”Nikni, anden hiyag hum fug teg lahi. We Allahn eneg fano ane seleg toho hiyag hitmisi,” ibag.
17Ibagma ap suwon inowen hiyag utuk lit, ”Anden nei og harukmen an ninggareg ik Nil ayegma unduhuk lit weregma 18wam sapi sabiren enebe fano reg lit sei anggolowon ik ahummuwen wilip atusareg hoholangge ik ayegma werehon naruk latusa. 19Naruk lit weregma nin sapi sabiren eke mondabi siyag teg lit unuwag eneg angge o Mesir aru walinggoho ari hahon eke harikik fuhon ik ahummuwen wilip atusareg 20sapi fanowon itano sali heheg naruk latusa. 21Obog toho narusa angge famen enehum su am fug angge tam welatusa hag toho unuwag eneg angge weregma yet isarikikteg lagmag nil ili atikik. 22Nil ili atikikteg nin nohoruk lit ninggik pirenehon nei og harukmen roti anggen alem misig fam inggik sabiren wilibigmu anggen fano roho yihik latisi. 23Yihik latisimu roti anggen winon eke wilip atukmu inggik sabiren teg latisi angge famen siyeluwen han wiratuken anggen siyahon eneg yihik fuk teg latisi. 24Ari reg lit siyag toho wilip atuson itanowen anggen fano roho yihik latuson itano lol heheg narukmu nei og harikik. Ninggik pirenam nei warikik ane fahet fulu roho hiyag isaruk inap unubam hiyag isarikik angge famen ap misihen oho alem tu fahet warikin ulug seleg toho hiyag nutusa fug,” ibag.
25Ibagma Yusuf inowen ap suwon hiyag utuk lit, ”Nikni, alem misig ane fahet nei piren warikin. Allahn tuhuk peruk ane nei fam hiyag hitisiyon tu hiyag hitmin: 26Wam sabiren sei werehon men roti anggen sabiren fano roho yihik latisiyon men yet harikin ane ari mo ilig am wirig am turukmen sabiren aruhuwon fahet yet harikin. 27Wam sapi siyahon sabiren fobik wilip atuson itano men roti anggen siyahon siyeluwen han wiratukon itano men yet harikin ane suburu obok li lahakumu weregman eneg mo sabiren ilig am wirig am tuhuwon fahet yet harikin. 28Anden ihiyon hikit toho Allahn tuhuk peruk ane nei fam hiyag hitisi. 29O Mesir pumbuk obog toho suburu sig aruhumu narukmen eneg mo sabiren ilig am wirig am turuk laruhu. 30-31Ari roho welamuhukteg suburu obok humon lahakumu weregman eneg nin mo sabiren eke ilig am wirig am turuk laruhumu o aru mondabi siyag aruhu. Suburu oboken ap he simbuk pising uruk lit suburu sig weregma hum toho naruk latukuk ane nenepeleg atisi uruk lamuhup. 32Ihiyon ari hag toho Allahn we tik-tem toho folo-folo tuhuk ulug kong toho emberisi angge re alem we misihon fahet eneg nei pirenam warikin.
33Alem ari fahet nikni, haren ap misig indi anggat teg lit mun ane man ane tuk tehon yami ruhunteg Mesir inap obog toho hal eneptuk laruhun ulug unduhuk fuhun. 34-35Unduhuk fuhunteg hotsi winon hiyag isaruk lit mo sabiren fam suburu sig naruk li ap o pumbuk wal tanehen roti anggen paltuk lamuhubon arimano minggiroho palu fuwaben heheg emberuk lit palu misig henembeg walug waharuk lamuhupmu o pumbuk wal taneg andog toho foroho lamuhuben in enebuhun. 36Mo sabiren fam suburu obok welaruhu li ap suburu oboken war amuhup tohon roti anggen andog toho emberuk lamuhubon arimano naruk lamuhup,” ulug hiyag itfag.
Mesir inap inikni inowen Yusuf ap suwon lahapfag ane
37Yusufen hiyag itfag ane fahet Mesir inap inikni men otsi menen fano ehek pibareg 38ap suwon inowen ele uruk lit, ”Notsi, Allah ahime fanowon hun aru fam werehen ap winon at hahon eke haruk lahi fug,” ulug hiyag isibag. 39Hiyag isibareg Yusuf fam ele uruk lit, ”Alem ari obog toho Allahn hiyag hitisimu hat hindi anggat teg hag toho ap winon eke wereg eleg. 40#Kis 7:10Ari fahet Mesir inap obog toho hat hapma wereg lit hele holtuk lamuhuben lahap hapmin. We an namu eneg hat palimu welaruhuk,” ulug hiyag itfag. 41-42Hiyag itfareg sehene enehangge ap suwonen wan turukon inggareg inggikmuwen ho roho Yusuf inggikmu kila feruk lit, ”Haren Mesir inap obog toho fet enesug laruhunen lahap haptuk lahi,” ulug hiyag itfareg sum fanowon ap suwonen wan turuk asum wan tibibareg aliliyangge emas fam wirihon anggolopma pug tibibag. 43-44Ari tibibareg kereta wam kudan lisoho walug laruk angge ap suwon inowen tohon pirenehon og itfareg otsi winon hiyag isaruk lit, ”Yusuf ino kereta fam lahalug larukmu hit olohotma laruk lit ap funggalma werehon unubam iming amek uruk lamuhup,” ulug hiyag isibag. Hiyag isibareg Yusuf fam ele uruk lit, ”An ap suwon raja mondabi palimu rehon weregma hat an niraham wereg lit Mesir inap obog toho fet enesug laruhun. Haren hiyag isa fugmu ap misig amuwen inggik men uyug men lebe ruhu fug,” ulug hiyag itfag. 45-46Hiyag itfareg Yusuf ino unuk keron Mesir inap enele roho Zafnat-Paaneah suwalfareg uhe Mesir inap unumbasi fahet hubu lahaptuk ahun Potifera o Heliopolis welatfahon ino ahaloho Asnat og itfag.
Yusuf indag tibag sali mo ilig am wirig am turukmu teng misig nubam hilag hinahan 30 atfagma Mesir inap inikni let turuk ane yabuk ak tibag. Ak turuk lit ap suwon ibamen wilip atfareg o Mesir walinggoho pen isil laruk latfag. 47Ari tibagma suburu sig atukmu narukmen eneg mo sabiren ilig am wirig am turuk latfag. 48Suburu sig atfagma naruk li itano Yusuf inowen roti anggen o pumbuk obog toho walinggoho paloho emberukon arimano o pumbuk wal-wal palu roho foroho latfag. 49Roti anggen palu ruruk latfahon arimano ik yinggi saho ahik ayegma werehon mondeg hag atfagma Yusuf inowen winag haruk ane imbisibag.
50Suburu obok uwan lahuk fugmu Yusuf uhe Asnat inowen malik ap angge piren indag enepfag. 51Indag enepfagma Yusufen ele uruk lit, ”Allahn let naptukmen eneg nikni umalikisi men, asengseng haruk latikik ane men napeleg atisi,” ulug amloho wandabon ino unuk Manasye#Manasye: Nit nenele roho napelehap naptisiyon uruk. suwalfag. 52Nin eke ele uruk lit, ”An o aru siyag toho weregman Allahn numalikisi og nitisi,” ulug malik pirenehon ino Efraim#Efraim: Nit nenele roho numalikisi og nitisiyon uruk. suwalfag.
53Mo sabiren fam Mesir inaben suburu sig naruk latfahon eleg atfagma 54#Kis 7:11Yusufen tam ibag ane hikit toho suburu obok humon lahibagma weregman eneg mo sabiren ilig am wirig am turuk latfag. O pumbuk obog toho kinangma werehon suburu obok toho weregma we o Mesir pumbuk walinggoho welatfahonen eneg roti anggen palu roho imbibahon arimano foroho latfag. 55Mesir inap arimano suburu oboken inikni ap suwon fam suburu og nisimin ulug heng turukmu ap suwon inowen hiyag isaruk lit, ”Yusuf ambeg lalihipteg aren hiyag hisamisi ane hikit toho tilihip,” ulug hiyag isaruk latfag. 56Suburu obok ino hum anggolo atuk lit Mesir pumbuk obog toho hondo ribagma Yusuf inowen roti anggen o wal taneg kilapfag ibam arimano sok husibagma Mesir inaben onggo palik kuruk latfag. 57Suburu obok ino kinang atogman atogma sahe ribagma ap kema-kema werehon arimanowen roti anggen onggo palik lul ulug Yusuf ambeg o Mesir waharuk latfag.
Sélection en cours:
KEJADIAN 41: YLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
@ LAI 2018
