KEJADIAN 4

Kainen Habel watfag ane

1Welatfareg hun Adam ino uhe Hawa ino men nohibagma hiyap ino malik ahummu atfagma malik ap angge indag tibag. Indag tibareg Ninikni Allahn let naptuk lit malik ap angge an nubam embehek ulug unuk Kain suwalfag.#Kain: Ibrani enele fam unuk Kain ino nubam embehekon uruk. 2Kain indag tibareg ot Habel eke indag tibag. Indag tibagma malik itano su atfareg Habel ino wam endetukon weregma Kain inowen yabuk wituk latfag. 3Welatfareg Kain inowen Ninikni Allah fahet hubu lahapmin ulug yabukmu yatfag angge winon wibareg indokma yalfag. 4#Ibr 11:4Yalfagma Habel inowen oho ambohom domba arimano sehelimuwon umalik wandabon eke wibareg kong toho senggele fibareg sei fano roho werehon Ninikni Allah fahet yale fibag. Yale fibagma Ninikni Allahn Habelen yalehekon amben fano ulug Habel fahet ahiyeg hibag angge famen 5Kainen yalehekon amben siyag ulug Kain fahet nirim pibag. Nirim pibagma Kain olok anggolo hibareg ayeg kilit matfag. 6Ayeg kilit matukmu Ninikni Allahn Kain fam hiyag utuk lit, ”Nungge fahet hat holok hehenteg hayeg kilit matuk lahen? 7Haren fano ane telenteg horohole seleg toho welalen. Haren nolok ane timin peruk lahen halug siyahon hat hundama kik oho lit wereg. Siyahon inowen an ninggikmu welamag ulug kahal hasug angge re siyag ane wenggeltuk lahenon ari apmayap timihin,” ibag.

8 # Mat 23:35; Luk 11:51; 1Yoh 3:12 Ari ibagma Kain inowen ot Habel fam yabukmu lul ulug hiyag itfareg ambiyeg libag. Libag ambeg inowen Kain ino in atfareg ot Habel ino pinggi ware fisibag.

9Ware fisibagma Ninikni Allahn Kain kapal haruk lit, ”Hot Habel kema wereg?” ibagma Kainen, ”Anden not foroho lahi angge? An te napeleg,” ibag.

10 # Ibr 12:24 Ari ibagma Ninikni Allahn ele uruk lit, ”Nungge fahet haren alem ari tehen? Hot amep kinangma wambehekon inowen ap ele hag toho ayeg wat nitmihin ulug ele hi roho nubam uruk. 11Hot amep kinangma wambehek angge re haren kinang fam yabuk wit taruk laruhun fug ulug huluwap haptuk lahi. 12Haren yabuk wituk laruhun halug oho nungge-nungge wilip aruhu fug. Ari fahet yuwag toho welam fug angge o eke la eke wam turuk laruhun,” ibag.

13Ari ibagma Kain inowen Ninikni Allah fam hiyag utuk lit, ”Alem nubam embehenon ari anggin anggolowen anden ha ruk fug teg lahi. 14An nolohotma welaruhu rohon ulug Haren an kinang fanowon tu famen yanggal nabehenma yuwag toho welam fug angge o eke la eke wam turuk lit welaruhukmu aben niyahupteg nuwabuhup,” ibag.

15Ibagma Ninikni inowen te, ”Ari ehenma Anden nele uruk lit aben hat huwabuhupmu ayeg waroho ap sabiren unusuhup uruk lahi,” ibag. Ari ibareg aben kema hahupteg wabuhup tohon ulug enehangge Kain fam imbibag. 16Imbibagma Kain ino Ninikni Allah olohotman wilip atug Eden kinang ambol fil embeselug yali fil libareg kinang unuk Nod#Nod: Nit nenele roho ”La Wam Turuk Ambeg” uruk. suwalehon ino fam welatfag.

Kainen ondohowonen ondohowon fahet imbibag ane

17Kain ino uhe men nohibagma hiyap ino malik ahummu atfagma malik ap angge indag tibareg unuk Henokh suwalfag. Welatfareg Kain inowen o pumbuk suwon eke witfareg amloho unuk hikit toho o Henokh suwalfag. 18Henokh amloho Irad, Irad amloho Mehuyael, Mehuyael amloho Metusael, Metusael amloho Lamekh indag enepfag. 19Lamekh inowen uhesi piren hilibahon ununuk Ada men Zila men hilibag. 20Ada inowen Yabal indag tibag. Yabalen ondohowonen ondohowon arimanowen wam anggolo foroho lit o eke witil eke halog til laruk. 21Yabal ot unuk Yubal inowen ondohowonen ondohowon arimano waruk men pinggong men watuk ane inindi anggat teg inap wereg. 22Zila inowen amloho Tubal-Kain indag tibagma at inowen o yabuk wituk angge eke hag eke hag posiyemanggen tembaga besi fam laltuk latfag. Hun Tubal-Kain ot hiyap angge unuk Naama welatfag.

23Lamekh inowen uhesi piren unubam ele uruk lit,

”Ada men Zila menen

nele iminon tu holeg lamek!

Ap ekeyen tor angge nuwatisi angge famen

anden ayeg waroho

ap ino pinggi ware feserikik.

Yowilangge toron fahet

ap kabiniyon eke ware feserikik.

24Allahn Kain wabuhup halug

ayeg waroho ap sabiren unusuhup ibag angge famen

An nuwabuhup halug

ayeg waroho ap teng hinahan 70 unusuhup,” ibag.

Set men Enos men fahet imbibag ane

25Adam men uhe Hawa menen malik ap angge eke indag tibag. Indag tibareg Hawa inowen Kainen ot Habel ware feserisiyon ubalma Allahn malik eke og nerehek ulug unuk Set suwalfag.#Set: Ibrani enele fam Set urukon ari og nerehekon uruk. 26Set inowen malik ap angge indag tibareg unuk Enos suwalfag. Enos welatfag li itano Ninikni Allah unuk urukon ak tibag.

Sélection en cours:

KEJADIAN 4: YLI

Surbrillance

Copier