KEJADIAN 34
34
He Dina siyahap tibag ane
1Misihim sambil Lea men Yakub men enehaloho unuk Dina ino Kanaan hiyap pen isa lamin ulug enembeg libag. 2Libagma Hewi inap onowe Hemor amloho unuk Sikhem inowen hiyap ino yet hibareg inggik lisoho walug lalug at men nohoruk lit siyahap tibag. 3Siyahap tibareg Sikhem inowen Dina fahet indi ouk toho wenggel haruk lit nindi ulug ele fano roho ubam uruk latfag. 4Ari tibareg ikni Hemor fam ele uruk lit, ”Anden Dina ino hilahuken haren an fahet heng tik lamihin,” ulug hiyag itfag. 5Welatfagma Sikhem inowen Dina siyahap tirisi urukmu at ikni Yakub inowen hol hibag angge famen umalikisi at ambohom foroho lit anggenma weregma Yakub inowen it uwan wam fugmu alem ino fahet ap misig oho fam nele imin fug pibag.
6Ari perukmu Sikhem ikni Hemor ino Yakub fam nele imin ulug ambeg watfag. 7Watfareg Yakub fam ele urukmu Yakub umalikisi arimano anggenman suhuloho inibam watfareg alem tibahon ino fahet hol hibag. Hol hibareg Sikhem inowen Yakub ahaloho siyahap turuk lit nit Israel ninap sehelimu amben siyahon tirisi ulug Yakub umalikisi inindi siyag atuk lit tuk fug teg ane tibahon fahet onolok anggolo hibag. 8Onolok harukmu Hemor inowen it unubam ele uruk lit, ”Namloho Sikhem inowen Dina ino indi reg lit werehen hilawag ulug og umuhup. 9Og umuhupteg fobik oho nit neneholani men hit heneholani men og-og atuk lit nunumbarikisi amuhup. 10Nit men wereg lit nenengginang fam yug toho welamuhup. Aben angge onggo paloho ayeg waroho hilaruk lit kinang oho ayeg waroho hilaruk lamuhup,” ulug hiyag isibag. 11Hiyag isibagma Sikhem inowen Dina ikni men ori men unubam ele uruk lit, ”Anden heng henebihi ane holtihip! Hiren nit og nisamihin ulug hiyag nitlihibon hikit toho og hisamin. 12Hiyap onggo men hiyap inggareg fam og umon men anggolo roho og nisamihin ulug hiyag nitlihip halug hiyap ino og numuhuben anden anggolo roho og hisamin,” ulug hiyag isibag.
13Hiyag isibagma Yakub umalikisiyen ap tuwen nenerek Dina ino siyahap tirisi ulug wenggel haruk lit Sikhem men ikni Hemor men unubam enele si ane hiyag isaruk lit, 14”Nenerek ino ap ambilahap paleg elehon ubam og um fug teg lahe. Og etle halug siyag ane tele. 15We hit hinibam o pumbukmu ap angge welahebon obog toho nit hag toho henembilahap paleg lamuhup halug eneg hiren ehebon hikit toho tuhuk. 16Nit neneholani men hit heneholani men og-og atuk lit hit men mangno roho welamuhuk, o pumbuk suwon misig welamuhuk angge famen 17niren uruk laheyon holuk fug angge nenembilahap paleg eleg angge welamuhuk pelihip halug niren nenerek tu walug lul,” ulug hiyag isibag. 18Hiyag isibag ane ino fahet Hemor men amloho Sikhem menen fano ehesa pibag. 19Ari peruk lit ap kabiniyon inowen Yakub ahaloho fahet nindi reg lahireg iren eheson hikit toho folo-folo tul pibag. Ap ino ori enesehelimu palimu wereg lit ele urukmu it obog tohowen holtuk latfag.
20Ari regma Hemor men amloho Sikhem men elehet inibam pumbuk walinggoho ohowon sok iraham libareg o ino fam welatfag inap unubam enele uruk lit, 21”Ap arimanowen nit men ninindi misig toho welamuhuk ulug wenggel haruk. Ari fahet nit nenengginang fuma-fuma fil hiyaleg tegma it nit niniraham yug toho wereg lit aben angge onggo paloho ayeg waroho hilaruk lamuhuben iyek. Nit men wereg lit nit neneholani men it eneholani men og-og atuk lamuhuk. 22Ari roho turuk lamuhuk ehesa angge famen iren nit hiyag nisaruk lit hit ap angge welahebon obog tohowen nit hag toho henembilahap paleg lamuhup halug eneg nit men hit men mangno roho wereg lit o pumbuk suwon misig welamuhuk ehesa. 23Iren eheson hikit toho turuk lamuhuk halug it nit ninim welamuhupmu it enembohom men enenggengge men obog toho niren tohon aruhu,” ulug hiyag isibag. 24Hiyag isibagma ap elehet o pumbuk walinggoho ohowon sok iraham watfahon obog tohowen fano ehesa pibareg ap angge o pumbukmu welatfahon obog toho enembilahap palfag.
25Palfareg hup pirenam atfagma enembilahap palfag ane fahet ouk warukmu Yakub ahaloho Dina owesi Simeon men Lewi menen karog seneg lit o pumbuk ino siyahap tul ulug libag. Larukmu ap o ino fam welatfahon arimano siyag amul puk fug angge weregman Yakub umalikisi piren itano o ino kibareg ap angge welatfahon obog toho pinggi unusibag. 26Unusuruk lit Hemor amloho Sikhem men unusibareg enerek Dina ino hun Sikhem ibamen hondoholug wilip atfag. 27Wilip atfagma Yakub umalikisi winon arimano o ino libareg Sikhem ori menen nonot siyahap turusama ayeg wabul ulug o pumbukmu kibareg ap tam unusibahon enenggengge men nungge-nungge o ino fam welatfag angge men obog toho huhulangge hilibag. 28Hilaruk lit enembohom kambing domba sapi keledai o ino fam welatfahon men anggenma welatfahon men 29fano-fano angge inibam foroho latfahon obog toho men walug it unuhesi oho unumalikisi oho obog toho ininggik hele waroho hondog eneplug wilip atfag.
30Wilip atfareg watfagma Yakub inowen umalikisi Simeon men Lewi men unubam ele uruk lit, ”Hiren tehebon ari famen an nunuk siyahap nabehep. Siyahap nabehepma Kanaan inap men Feris inap men kinang tu fam werehon arimanowen an fahet ninirim puhup. Ninirimen ap arimano siyahap enebik lul ulug mangno amuhupteg nit nenebe we tor angge welaheyon nunusik waharuk lit an nibam werehon men obog toho elehap nenebuhup,” ulug hiyag isibag. 31Hiyag isibagma iren hebeloho hiyag utuk lit, ”Ap inowen nonot siyahap tirisimu niren ayeg waroho siyahap enebehe,” ibag.
Sélection en cours:
KEJADIAN 34: YLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
@ LAI 2018
