KELUARAN 24

Allahn Israel inap unubam sali imbibahon ino mondabiyap tibag ane

1Welatfagma Ninikni Allahn Musa fam ele uruk lit, ”Harun men Nadab men Abihu men Israel inap onowesi teng hinahan 70 men ambiyeg An nambeg lahik watlihipteg henebe yatma wereg lit henelenggen fam hur atlihipteg kinangma ying atuk lit An hi naplihip. 2Hi naplihipteg we hat hamu eneg An horogma watmihinmu it winon horogma wamusa fug. Honotsi inibam welamuson tom tu fam lahik wamusa fug,” ibag.

3Ibagma Musa ino Israel inap enembeg libareg Ninikni Allahn, ” ’Hit An nolohotma wereg lit ari-ari turuk lamuhup,’ ulug hiyag isamihin,” ibag ane hiyag isibagma it obog tohowen enele misihon fam, ”Ninikni Allahn irisi ane obog toho turuk lamuhuk,” ibag. 4Ibareg Ninikni Allahn, ”Ari-ari turuk lamuhup,” ulug hiyag itfag ane Musan suwesingga fam hahatfag. Hahare fibareg likiyamon hubet Musa inowen Allah fahet hubu lahaptuk ambeg ulug tom ino alma helep iya ribareg Israel inap ununggul unuk nisanggowen wirim toho helep nisanggowen wibareg enehangge yaho fibag. 5Yaho fibareg Musa inowen ap kabiniyon winon unubam hiyag isaruk lit, ”Ninikni Allah let neneptukon wel tulen wam sapi piren hinahan waroho yaltuk lit winon Allah olohotma nul ulug eserik lalihip,” ulug hiyag isibag ane hikit toho tik libag. 6Libareg wam sapi watfahon itano enemep winon Musan kubag fam hinanggoho imbibareg winon Allah fahet hubu lahaptuk ambeg witfahon ino fene hilil isibag. 7Hilil isibareg Ninikni Allahn, ”An numalikisi roho wereg lit tu men tu men turuk lamuhup,” ulug hiyag itfagma haharoho imbibahon ino wibareg Israel inap hiyag isibagma iren te, ”Ninikni Allah ele holtuk lit hiyag nisarisi ane hikit toho turuk lamuhuk,” ibag.

8 # Mat 26:28; Mrk 14:24; Luk 22:20; 1Kor 11:25; Ibr 9:19-20, 10:29 Ibagma Musa inowen kubag mep hinanggoho imbibahon arimano wibareg Israel inap enebene war enebil laruk lit, ”Ninikni Allahn, ’Hit An nolohotma wereg lit hunubabut fano roho welamuhup,’ ulug sali emberisiyon ino mep aru fam mondabiyap turuk,” ibag.

9Ibareg Musa, Harun, Nadab, Abihu men Israel inap onowesi teng hinahan itano men tom fam lahibareg 10yet harukmen helep sim pohol umbagpag turukon hahon tuwalegma Israel inap Inikni Allah palimu unduhukmu yet hibag. 11Iren yet hibagman Allahn unusibag fugmu suburu men ik men naruk latfag.

Musa tom Sinai fam amusun toho welatfag ane

12Welatfareg Ninikni Allahn Musa hiyag utuk lit, ”An nambeg tom fam lahik watmihin. Lahik watmihinmu helep piren Anden, ’Alem tu men tu men turuk lamuhup,’ ulug hahare ferikikon itano og hitminmu haren Israel inap milal eneptuk laruhun,” ibag. 13Ibagma Musa men at let turukon Yosua men Allah wereg ambeg tom fam lahuk oho lit 14Musa inowen Israel inap onowesi hiyag isaruk lit, ”Nit tom fam lahulteg suhuloho wambik wamuhuken hit tuma yet nenesug lit welamuhup. Harun men Hur men hit nim tuma wereg lit ap sa alem ubam wereg halug iren haloho emberuk lamuhup,” ibag.

15Ibareg Musa ino tom Sinai fam lahibagma tom ino hinan hililip tibag. 16-17Hililip tegma Ninikni Allah umbagpag seheli ke tom atelma wambik waharukmu Israel inaben yet harukmu indok ambulpul hag angge tom atelma weregma yet hibag. Hinan tom ino hililip tegman eneg falfalikenam atfagma o sabir angge Ninikni Allahn hina sehelimuwen Musa wol tibag. 18#Ul 9:9Wol tibagma Musa tom atel fil laharuk lit hina elma kibareg hup hunduhuk unukoho hunduhuk teng misig nubam hilag nuwalenam 40 welatfag.

Sélection en cours:

KELUARAN 24: YLI

Surbrillance

Copier