KELUARAN 19

Allah tom Sinai fam wambik watfag ane

1-2Libagma Israel inap o Rafidim embeselug larukmen o Mesiren wilip atfahon pikalem hinahanehon ket inam atfag sambil o Sinai lekma libareg tom Sinai alma o sabo wiroho welatfag. 3Wereg lit Musa ino Allah men ambi amul ulug tom fam lahibagma Ninikni Allahn tom ino famen Musa fam ele uruk lit, ”Yakub umalikisi Israel inap unubam hiyag isamihin ane tu, 4’Mesir inap Anden siyahap eneptikikteg suwe kundiken umalik ag fam ililoho og eneplug laruk hag toho An welahi ambeg tuma og heneplug waharikik ane obog toho yet harikip. 5#Ul 4:20, 7:6, 14:2, 26:18; Tit 2:14; 1Ptr 2:9; Why 1:6, 5:10Ketiya hiren An nele holtuk lit An numalikisi fano roho welamuhup ulug sali emberikik ane hinine roho senetuk lamuhup halug o pumbuk obog toho enesehelimuwon we hit eneg An numalikisi nindi pulmuwon welamuhup ulug mumal henebuhuk. Kinang obog toho Anden ngi reg lahi angge famen 6we hit henemu eneg An nalukema namingmingangge roho imam hag toho wereg lit hinindimuwen tik-tem toho An nubam eneg wenggel niyaruk lamuhuben An nolohotma hunumbahakuk,” ibag.

7Ari ibagma Musa ino tom famen wamburuk lit Israel inap onowesi wol enepfareg Ninikni Allahn hiyag itfag ane obog toho it hiyag isibag. 8-9Hiyag isibagma Israel inap obog tohowen enele misihon eneg uruk lit, ”Ninikni Allahn ehek ane hikit toho turuk lamuhuk,” ibag ane ari Musa inowen Ninikni Allah hiyag itfag. Hiyag itfagma Ninikni Allahn Musa fam hebeloho hiyag utuk lit, ”An hina anggulog hahon undama hambeg watminteg nele hat hubam urukmu Israel inaben hol halusareg o yoho famen tulug fobik oho hat hele eneg holtuk lamuhup. 10Ketiya ap arimano enembeg lamihinteg hiyag isaruk lit, ’Allah men ambi amuhuken yoho men sono men hunubabut haloho henesum ik umaho fat talug welatlihip. 11O ha ap obog toho iniline An tom Sinai fam wambik waruhuken hunubabut haloho wereg lit yet teg lamuhup,’ ulug hiyag isamihin. 12#Ibr 12:18-20Hiyag isamihinteg tom aru walinggoho siye reberuk lit, ’Siye aru suhan tulug tom aru fam lahuk fug! Tom alma oho la fug,’ ulug hiyag isamihin,” ibareg, ”Ap san siye ino pisan isalug lahu halug ap ino ware fusuhup. 13Ap ino ininggiken senebuk fug angge helep fam ano tog fam ano ware fusuhup. Ap oho wam oho siyengge pisan toho lahubon arimano obog toho ware feseruk lamuhup. Waruk ele hum toho tung tuhu halug eneg ap arimano tom fam lahakup,” ulug Musa hiyag itfag.

14-15Hiyag itfagma Musa tom famen wambibareg Israel inap unubam ele hiyag isaruk lit, ”O ha Allah men ambi amuhuken hunubabut haloho wereg lit hunuhesi men nohuk fug angge welatlihip,” ibagma ap arimanowen enesum ik umaho fat taruk lit unubabut haloho wereg latfag.

16 # Why 4:5 # Ul 4:11-12 Weregman o hinahaneg angge lebeglu ruruk lit ululu sup turukmu hina anggulog hahon tom ino het tirikim waruk ele hum anggolo roho tung turukmu ap o saboma welatfahon arimanowen hol hibareg enekolen unuwag elek turuk latfag. 17Ari turukmu itano Musan Allah men ambi amul ulug ap arimano welatfag ambeg inowen hondog eneplug wilip atfareg tom ino horogma in arik libag. 18Libareg weregma Ninikni Allah indok sehelimu tom Sinai fam wambik watfagma tom ino hubuwen obog toho hililip tibag. Hubu ino indok humon yaltukmu hubu laharuk hag toho laharukmu tom obog toho yuk elek turuk latfag. 19Elek turukmu itano waruk ele hum-ham toho tung turuk latfagma Musa inowen Allah fam ele irikim Allahn hebeloho ululu ele hag toho hiyag utuk latfag. 20Hiyag utuk lit Ninikni Allah tom Sinai atelma wambik watfareg Musa ino lahik ma ulug wol tibagma lahibag. 21Lahibagma Ninikni Allah at ubam ele uruk lit, ”Nin suhuloho wambimihinteg ap irahammuwen An yet nuyul ulug siyengge pisan toho wamuhup tohon hiyag isamihin. Iren siyengge pisan toho wamusa halug enesehelimuwon anggolo war amuhup tohon. 22An namingmingangge imam arimanowen oho Allah horogma lul pelusareg unubabut fano roho haleg eleg angge wamusa halug unusimin,” ibag.

23Ibagma Musa inowen Ninikni Allah fam ele uruk lit, ”Haren, ’Tom aru usa fulu antom werehen walinggoho siye ruhup,’ ulug hiyag nisarikin angge re ap irahandima lahik wam fug teg,” ibag.

24Ibagma Ninikni Allahn, ”Hat wambimihinteg nin Harun men ambiyeg lahik watlihip! An namingmingangge imam men onotsi winon men siyengge ino pisan isalug An nambeg wamusa fug. Iren pisan isalug wamusa halug unusimin,” ibag. 25Ibagma Musa ino Israel inap enembeg wambibareg Ninikni Allahn hiyag isamihin ibag ane hiyag isibag.

Sélection en cours:

KELUARAN 19: YLI

Surbrillance

Copier