KELUARAN 17
17
Musan helep famen ik wilipfag ane
(Bil 20:1-13)
1 #
Bil 20:2-13
Welatfareg Israel inap obog toho arimano o Sin lekma ino embeselug Ninikni Allahn hiyag isaruk ane hikit toho o ekema witil ekema witil laruk latfag. Laruk lit o misihim sambil o Rafidim o sabo wirik libag ambeg ino ik narukon eleg latfag. 2Ik narukon elehen Israel inap arimanowen Musa fam, ”Ik nulon og nisimin!” ulug enele siyag toho uruk latfagma Musa inowen, ”Nungge fahet hiren an nubam henele siyahon uruk lit Ninikni Allah wal haruk lahep?” ulug hiyag isibag.
3Ari ulug hiyag isibag angge famen ap arimano ik obok anggolowen Musa fam enele siyag toho uruk waruk lit, ”Nungge fahet haren o Mesiren hondog neneplug wilip atikin? Nit nunumalikisi men nenembohomet angge ik na fug angge wereg lit war amag ulug hondoko nunumbahik waharikin?” ibag.
4Ibagma Musa inowen Ninikni Allah fam ele hi roho uruk lit, ”Ap aruman helep fam nuwabuk oho turuken anden it fahet nungge ane timin?” ibag.
5Ibagma Ninikni Allahn Musa fam ele uruk lit, ”Israel inap onowesi winon wol enepmihinteg wanggun haren ik Nil ahum watikinon ino seneko hit tam atlihipmu Israel inap fobik amusa. 6Fobik larukmu An hat haluke fil tom Sinai alma helep humon eke fam unduhuk latmin. Helep ino iraham lamihinteg ware femihinmu ik wilip atmisiyon ino it nalusa,” ibag ane hikit toho Israel inap onowesi wol enepfahon arimano iniline Musan tibag.
7Musan ari tibagma Israel inaben, ”Ninikni Allah nit sehelimu wereg ano eleg ano?” ulug wal hibag ambeg ino unuk Masa#Masa: Nit nenele roho Wal hibag Ambeg uruk. suwalfag. O inowen Israel inaben enele siyahon eneg uruk latfahon fahet unuk eke Meriba#Meriba: Nit nenele roho Enele Siyag toho Ibag Ambeg uruk. suwalfag.
Amalek inap men Israel inap men tog apfag ane
8Israel inap o Rafidim weregma Amalek inaben unusul ulug waharukmu 9Musan Yosua fam ele uruk lit, ”Sono Amalek inap men tog abik lahuben ap enembong se roho turuk inap eneko palu enepmihin! An sono Allahn wanggun tu wamihin ulug hiyag nitisiyon ino seneko walug punumu lahakukteg unduhuk laruhuk,” ibag. 10Musan ibag ane hikit toho Yosua ino Amalek inap men tog abik larukmu Musa men Harun men Hur men punu ino fene lahibareg 11Musa inowen inggik leho lit weregma Israel inap inine anggolo reg latfag angge famen inggik imbik wamburukmu Amalek inap inine atuk latfag. 12Ari turukmen eneg Musa inggik eleyen imbik wambibagma Harun men Hur menen Musa hur atukon ulug helep eke wak libareg it piren pikit fil eke hare fil eke unduhuk lit Musa inggik leho lamag ulug senegman eneg mo ubuk ibag. 13Musa inggik lehoman eneg Yosuan Amalek inap mulangge unusibag.
14 #
Ul 25:17-19; 1Sam 15:2-9 Unusibagma Ninikni Allahn Musa fam ele uruk lit, ”Ap fobik welamuhubonen enepeleg aruhu rohon Amalek inap unusehep ane fahet suwesingga fam hahare femihin. Hahare femihinteg Yosua fam hiyag utuk lit, ’Allahn Amalek inap mondabi elehap enebuhumu ap misihen oho Amalek inap fahet oluk teg laruhu fug,’ ulug hiyag itmihin,” ibag. 15Ibagma Musa inowen Allah fahet hubu lahaptuk ambeg ulug helep iya ribareg, ”Nit tog abuk oho larukmu nombolim lawag ulug enehangge walug larukon ino Ninikni Allah eneg wereg,” ulug unuk suwalfag. 16Suwalfareg Musa inowen, ”Ninikni Allah nonolohotma larukmu ombolim laruk lamek! Ninikni Allahn Amalek inap men tog aptukmen eneg welamuhup,” ibag.
Sélection en cours:
KELUARAN 17: YLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
@ LAI 2018
