KELUARAN 10

Heren pambot monde fibag ane

1Lalihip ulug hiyag isibag fugmu Ninikni Allahn Musa fam ele uruk lit, ”Mesir inap onowe ambeg lamihin. Anden at men otsi men onolohotma enehangge turuk laruhuk ulug inindi harowap tirikik. 2’Allahn enehangge eke hag eke hag turuk lit Mesir inap enele ying eneptuk latisi,’ ulug humbusagsi hiyag isaruk laruhunen ari roho turuk lahi. Ari roho turuk lahiyon fahet hiren An nubahet Ninikni Allah wereg ulug honoluk aruhu,” ibag.

3Ibag ane ari hikit toho Musa men Harun men Mesir inap onowe ambeg libareg hiyag utuk lit, ”Ibrani ninap Ninikni Allahn ele urukon tu holeg lamin, ’Noenam welaruhunteg An nolohotma kunuk toho hur atug apmayap tahun? Numalikisiyen An nubam sembahyang ik lahuben hiyag isamihin. 4Lahup imihin fug halug sono Anden heren pambot hit henengginang fam monde fik waruhuk. 5Monde fik waruhukmu heren arimanowen kinang obog toho hondo rurukmu kolo reg ambeg eleg laruhu. Yabukmu wilip atuk angge men e inggila men osit helep hahonen siyahap tirisireg tot werehon arimano heren pamboren obog toho naruk lamuhup. 6Hat hibam oho, hotsi inibam oho, humalikisi Mesir inap inibam obog toho ele ke heren arimano keleg uhup. Alem aru hunumbasiyen oho hibag fuhon hunubam aruhu,’ irisi,” ulug Musan ap suwon ino hiyag itfareg ambol yig utug wilip atfag.

7Wilip atfagma ap suwon otsi arimanowen inikni fam enele uruk lit, ”Hun ariyen yebangge kilaptug nunusurukmen eneg nosambil eleg aruhu? O Mesir siyag atukon, ninikni, haren yet haruk lahen fug? Israel inap arima Inikni Allah ubam sembahyang ik lahuben hiyag isimin!” ulug hiyag itfag.

8Hiyag itfagma Musa men Harun men nin suhuloho ap suwon ambeg maniyek ulug wol enepfagma watfagma ap suwon inowen te, ”Hinikni Allah ubam sembahyang ik lahup,” il laruk lit, ”Hit hinim honori sa-sa lahup?” ulug kapal isibagma 9Musa inowen te, ”Nit ap he sabalonet kabiniyonet obog toho lahuk. Ninikni Allah fahet nenehiyeg toho yungguluhuken nunumalikisi men nenembohom sapi, domba, kambing obog toho arimanowet hohuk toho wilip amuhuk,” ibag.

10Ari ibagma ap suwon inowen indimu amu roho wenggel haruk anggeyen ele fam, ”Hinikni Allahn let heneptukmu lahup,” il laruk lit, ”Hit hinindimuwen siyag ane wenggel haruk lit nele ying naptuk lahep ane noluk ahama abet hiyabet maliket henebe obog toho wilip amuhup ulug hiyag hisa fug teg lahi. 11Hiren heng naptuk lahep ane hikit toho we hit ap eneg Hinikni Allah ubam sembahyang ik lahup,” ulug hiyag isaruk lit yanggal enepfag.

12Yanggal enepfagma Ninikni Allahn Musa fam ele uruk lit, ”Hat hinggik Mesir kinang palimu leg hamihinmu heren pambot wamusareg kinangman wilip atuk angge osit helep hahonen siyahap tirisireg tot werehon arimano obog toho nalusa,” ibag. 13Ibagma Musa inowen wanggun ino leg harukmu Ninikni Allahn yali filen homhomo monde fibagma unukohowet hubanggowet turukmen eneg hubet homhomowen heren pambot anggolo roho walug watfagma 14#Why 9:2-3Mesir kinang obog toho hondo ribag. Atam oho hibag fuhon fobik oho hahup fuhon we ari sambil eneg heren anggolo arimano inam atfag.

15Heren arimanowen Mesir kinang hondo rehen hik teg latfag. Mun angge man angge osiren siyahap tibareg imbisibahon arimano nibagma e anggen men inggila men kinangman wilip atuk angge obog toho Mesir kinang atogman atogma eleg latfag.

16Eleg latfagma Mesir inap onowe inowen, ”Folo maniyek!” ulug Musa men Harun men wol enepfareg ele uruk lit, ”Anden hit men Allah Hinikni men fam siyag ane tirikik. 17Ari fahet Allah Hinikni inowen nuwaruhuk peruk ane ino ambolma umbusuhuwen hiren o yoho eneg sembahyang uruk lit siyag ane tirikikon ari elehap tilihip,” ulug heng enepfag. 18Heng enepfagma Musa ino ap suwon embeselug libareg Ninikni Allah fam sembahyang uruk latfag. 19Uruk latfagma Ninikni Allahn homhomo tam yali filen watfahon ino su atuk lit hubula filen hebeloho yali fil lawag ulug monde fibagma heren arimano siyelu suwon inowen fu roho walug ik unuk Longgop yenggelehon fam hik isa libagma misig oho Mesir kinang fam welatfag fug. 20Ari roho teko libag angge famen Ninikni Allahn, ”Mesir inap onowe indi imbik wambukag,” pibagma ”Israel hinap lahup,” ulug hiyag isibag fug.

O hik monde fibag ane

21Lahup ulug hiyag isibag fugmu Ninikni Allahn Musa fam ele uruk lit, ”Hat hinggik pohol fil leg hamihinmu o Mesir hik kuruwag atmisi,” ibagma 22#Mzm 105:28; Why 16:10Musa inowen inggik leg hibagma o Mesir kinang fam hup hinahanam hik kuruwag tegman eneg welatfag.

23O hiken Mesir inap winonen winon yet isa fug angge wereg lit selma la fug angge olma eneg weregma Israel inap welatfag ambeg eneg seleg teg latfag.

24Seleg teg latfagma Mesir inap onowe inowen Musa wol tibareg ele uruk lit, ”Hinikni Allah fam sembahyang uhuben fano lahup. Hit hunuhesi malik men lahup angge famen henembohom sapi, domba, kambing eneg walug lahup fug,” ibag.

25Ibagma Musan, ”Haren henembohom welamag imihin halug wam Ninikni Allah fahet yaltukon men esetukon men haren og nisahun ano? 26Lahuk ambeg ariman eneg Ninikni Allah fahet wam esebulon tu umbulon tu ulug enebuhuken nit nenembohom misig oho umbusuk fug angge obog toho walug lahuk,” ulug hiyag itfag.

27Ari ulug hiyag itfag angge famen Ninikni Allahn, ”Ap suwon ino indi imbik wambukag,” pibagma, ”Israel hinap lahup,” ulug hiyag isibag fug. 28Hiyag isibag fureg ap suwon inowen Musa fam, ”An nolohotma aruman lag! Anden horohole yet hiyahukteg huwarihi ha nowen misihim oho an nambeg wam fug!” ibagma 29Musan, ”Haren ehenon hag toho eke sul oho an norohole yet niyahun fug,” ulug hiyag itfag.

Sélection en cours:

KELUARAN 10: YLI

Surbrillance

Copier