LITANGA 17
17
Kelolero Chi Lilagana lia Nyasaye ku Aburahamu
1Lwa Aburamu yaali ni mihiga 99, Yahova yaloleka kuye kandi navoora, “Inzi mbeeye Nyasaye Wuvunyali. Utie inzi kandi okole agaveeye malungi kazozo. 2Inzi ndakalombe lilagana liange na ivi kandi ndakakohe visukululwi vinyingi.” 3Aburamu yinama hasi mamumama kandi Nyasaye yavoola, 4“Inzi nombaa lilagana yili nivi: Ndagaa ndi ivi ulakave guuga wi zihiiri zinyingi. 5Lieta liilio si lilava Aburamu kandi mba, navuzwa lilava Aburahamu#17:5 Aburahamu: Liveeye lieta liu Luheburaina livoora, “Guuga wi zihiiri zinyingi.” kigira ndakokola ove guuga wi zihiiri zinyingi. 6Inzi ndakuha visukululwi vinyingi, kandi valala kuvo valakave avami. Ivi ulakave ni visukululwi vinyingi kandi mu madiku gaaza valakave zihiiri.
7“Inzi ndakalindi lilagana liange ku ivi kandi ku visukululwi vivio mu makura gaaza kuli lilagana lihindira mihiga ni mihiga. Inzi ndakave Nyasaye woovo kandi wi visukululwi vivio. 8Inzi ndakakohe harara nivisukululwi vivio kivala yiki cha oveeye mu mugeni. Kivala choosi cha Kanaani kilakave chi visukululwi vivio mihiga ni mihiga, kandi inzi ndakave Nyasaye wavo.”
9Nyasaye yavolera Aburahamu, “Ivi kandi kuduuka uvugiliri kulinda lilagana harara ninzi, mwombi ivi kandi ni visukululwi vivio mu makura gaaza. 10Ivi kandi visukululwi vivio kuduuka mwosi muvugiliri kokeva musaza woosi oveeye hagati hinyu. 11Munyi mulakevwa kandi kilava kelolero chi lilagana hagati hange na munyi. 12Ku makura gaaza vuli muyaayi oveeye na madiku munane kuduuka akevwe, harara na vatugwa vivulwa munyumba yooyo kandi na vatugwa avaagulwa kutura ku vageni avataveeye avamasahi googo. 13Vuli mulala kuduuka akevwe, kandi yiki kilava kelolero chu muviri kumanyia ndi lilagana liange ni munyi liveeye limihiga ni mihiga. 14Vuli musaza utakevwa sialava mulala ku vandu vange mba, kigira siyalindi lilagana liange mba.”
15Nyasaye yavolera Aburahamu, “Ivi si ulalanga mukali woovo Sarai kandi mba; kutura kalunu ulamulanga Sara. 16Inzi ndamugasiza, kandi ndamuha mwana muyaayi. Ndamugasiza kandi alava mama wi zihiiri zinyingi, kandi avami valakatuli mu visukululwi vivie.”
17Aburahamu yinama hasi mamumama, navuzwa yaatanga koseka lwayaganaganyia ndi, “Umundu musaza anyala konyoora mwana lwaveeye ni mihiga 100? Sara anyala konyoora mwana naveeye ni mihiga 90?” 18Yateeva Nyasaye, “Kigira ki si oleka Ishimaeli anyoore uvugasu vwa wandaga?”
19Navuzwa Nyasaye yavoola, “Awa. Mukali woovo Sara alakwivulira mwana muyaayi kandi ivi ulamugulika Isaka. Inzi ndalinda lilagana liange harara naye kandi ni visukululwi vivie mihiga ni mihiga. Liveeye lilagana litaveeye ne keheri. 20Inzi mali kuhulira lienya liilio kigira Ishimaeli, kunangwa ndamugasiza kandi ndamuha avana vanyingi kandi visukululwi vinyingi. Alakave baba wa avami 12 kandi ndakakole visukululwi vivie kuva ihiiri enene. 21Navuzwa inzi ndalinda lilagana liange nu muyaayi woovo Isaka, uwa Sara alakivuli mu ing'inga kuli yinu muhiga guzaa.” 22Lwa Nyasaye yamala komoloma na Aburahamu, yamanya nazia.
23Ku lidiku lilala liere yilio Aburahamu yatia Nyasaye kandi naakeva mwana weve muyaayi Ishimaeli na vasaza vosi munyumba yeeye, harara navatugwa vivulwa munyumba yeeye kandi na yavo avayaali naguli. 24Aburahamu yaali ni mihiga 99 lwa yakevwa, 25kandi mwana weve muyaayi Ishimaeli yaali ni mihiga 13. 26Vosi vakevwa ku lidiku lilala, 27harara na vatugwa va Aburahamu vosi.
Sélection en cours:
LITANGA 17: LOGOOLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
©Bible Society of Kenya, 2019
