LITANGA 13
13
Aburamu na Loti Vaavukana
1Aburamu yazia Ivaale kutura Egebeti kuduuka Isavaalu mukedonye cha Kanaani harara nu mukali weve kandi nivindu viosi viayaali navio; Loti yazia harara naye. 2Aburamu yaali umundu mutugi ligali na magondi, zimburi, kandi mitugu kali izahabu ni ifeza. 3Maku yatura hene ho kandi nagendagenda nazizaa Bezeli. Yaduuka hagati ha Bezeli na Ayi uwa yaali namenyi maziambiri 4kandi yaali niyumbaka yo uvwali. Hene yaho yasigamira Yahova.
5Loti yaali kandi na magondi, zimburi kandi ni mitugu, na avinyumba yeeye kandi na vayinziri. 6Kunangwa uvwayiru si vwali ho uvudukiru ku avandu vaviri komenya harara mba, kigira vaali ni mitugu minyingi. 7Kunangwa avasaza vaalinda mitugu ja Aburamu ni mitugu ja Loti vaarembana. Mu ing'inga yeyo avandu va Kanaani na vandu va Peri vaali nivakemenyi mukivala yicho.
8Maku Aburamu yavolera Loti, “Kunyi kutarembana, anoho avandu vovo na vandu vange vatarembana mba, kigira kunyi koveeye avamwavo. 9Kunangwa oleke kwavukane. Otovole lovega lwikivala cha wenyaa. Niiva ulazia ku lovega lwu mukono mulungi, inzi ndazia ku lovega lwu mukono mumosi.”
10Loti yahenza muzimbega ziosi kandi nalora livona liosi lia Jorodani kutura Zohari liali na mazi manyingi kuli mulimi gwa Yahova anoho kuli kivala cha Egebeti. Yaga gaali imbiri wa Yahova yaali nakikiri kudiviza madaala manene ga Sodoma na Gomora. 11Kunangwa Loti yatovola livona liosi lia Jorodani kandi nazia ihale kolovega lwi Ivugwi. Nindio avasaza vaviri yava vaavukana. 12Aburamu yamenya mukivala cha Kanaani, kandi Loti yamenya hagati ha madaala mu livona ma niyumbaka lihema ahimbi Sodoma, 13uwa vandu valio vaali avachamu kandi vakora uvwoni ku Yahova.
Aburamu Azizaa mukivala cha Heburoni
14Lwinyima lwa Loti yaali ni yakazia, Yahova yavolera Aburamu, “Ohenze vulahi muzimbega ziosi kutura ha oveeye. 15Inzi ndakuha harara nivisukululwi vivio kivala cha ololaa yiki choosi, kandi kilakave chicho mihiga ni mihiga. 16Inzi ndakuha visukululwi vinyingi kali mundu sianyala kuvaliza mba. Kunangwa niiva umundu yakavalizi luguchi, visukululwi vivio viaakavaliziywi. 17Kalunu, zia ogende mukivala choosi, kigira nziza kukuha choosi.” 18Kunangwa Aburamu yaginga mahima geege kandi nazia komenya ahimbi ni misaala mitakatifu ja Mamure ha Heburoni, uwa yumbakira Yahova uvwali.
Sélection en cours:
LITANGA 13: LOGOOLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
©Bible Society of Kenya, 2019
