ATHƐSALONIANAƐ NSENDƐ 4
4
Ŋkaɛ ma hini Hɔbatokɛ gbɔl lɛ
1Mɛkindɛ ni gbi, anyami, hinɔ hɔm ni hinɔ thɛlɛni ilel Bɛɛ Jisɔsay, sɔŋgɔma ha koŋ kaŋ hiŋg hindɛ hɔ ŋa ha che ni hɔ ŋa ha hini Hɔbatokɛ gbɔl lɛ, sɔŋgɔma hɔ ŋala gbo haɛ, ŋa kɔ che ha chela ha. 2Haliwɔ ŋa si mɛy yɛ kɔ hi kanɔ ha satɔkin Bɛɛ Jisɔsɛ. 3Haliwɔ la Hɔbatokɛ yema laɛ, chenɔ charaŋdɛ: ni ŋa hɛthni hiŋg lichoŋdal; 4ni ŋa si hɔ ŋa ha gbisiŋ nɔma ŋa ndelmawɔɛ ka che charaŋay ni limaniɛ, 5nchen ka theni ichɛk ŋanɛ ha laanɛniɛ ŋa sini Hɔbatokɛ. 6Ni nɔ gbi che ha kwe isɔn thɔm wɔɛ, ni ma sɔkba pɛnte wɔɛ halanɔki, haliwɔ Bɛɛ wɔ muŋgɔ lanɔ ki gbiay, kendɛ hi koŋ nɔ mɛy fuliɛ. 7Haliwɔ Hɔbatokɛ velɛ hini ha iche charaŋ, kɛ ha che charaŋ. 8Labiɛ nɔɛ gbi wɔ fɛkiɛ gbo lanɔ kiɛ, fɛkiɛ ni ayin kɛ Hɔbatokɛ, wɔ kanɔ Min wɔ Charaŋdɛ.
9Kɛ ha chɔŋmalen ha anya nɔɛ che chaŋ pɔ gbala ko-nɔ-ko, haliwɔ Hɔbatokɛ koŋ nɔ kaŋ ha han chɔŋnilen 10ni la rɔŋ ŋa chɔŋ anya nɔɛ gbi len Masidoniako. Kɛ hi nɔ thɛlɛni, anyami, ŋa hala mɛŋkɛ hɔngbi, 11ŋa hɛl ha ŋan che pempem, ŋa bi bisin ko ŋalinɔɛ gbo, ni ŋa ha mpanth ka piathi nɔɛ, kendɛ hi gbɔnda nɔɛ; 12chelɛ ŋa bɔ gbɔnda manili ŋanɛ ha laanɛniɛ che, ni ŋa ma fani be nɔ.
Hun Bɛɛ
13Kɛ hi che nɔ la matha, anyami, ha ŋanɛ ŋa koŋ wuiyɛ, chelɛ ŋa chen taŋ sɔŋkɔma ŋanɛ ŋa biɛni kithgbɔllɛ. 14Haliwɔ kendɛ hi laanɛ lɛ Jisɔs wu ni muni poɛ, ni lacheɛ, Jisɔsay, Hɔbatokɛ bi ha chima wɔni ŋanɛ ŋa koŋ wuiyɛ.
15Ha lanɔki la hi nɔ wɔmɛ ka hɔk Bɛɛ, lɛ hin hibi mu ihɔlɔŋdɛ, hi koŋ le haŋ mɛŋkɛ Bɛɛ wɔ hundɛ, hi chen bi ŋa sɛm ŋanɛ ha koŋ wuiyɛ chee. 16Haliwɔ Bɛɛ wɔnayɛn bi ha thol hiŋg arijana ka taŋ gbɔnda, ni vel sɛmthache malkaɛ, ni lom thakɛm Hɔbatokɛ. Ni ŋanɛ ha wu Kraystayɛ ŋa peŋgɛ poɛ; 17ni hin hi bi mu ihɔlɔŋdɛ, hi leɛ, hi bi ha thaŋni fenaɛy ni ŋan ha bɔnth Bɛɛ ihɛnday; hibi ŋa che mɛŋkɛ hɔn gbi ni Bɛɛ. 18Labiɛ ŋa thɛthɛ ni ka ŋhɔko ki.
Sélection en cours:
ATHƐSALONIANAƐ NSENDƐ 4: SNT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Sherbro New Testament Portions © Bible Society in Sierra Leone, 2020.