San Mateo 7

Jesús rixxiꞌe bittu dica inne güeri gue ca benni

(Lc. 6:37-38, 41-42)

1’Bittu oquinna iquile anca benni nu te tulha gueni, qui bittu oquinna iqui Tata Do Iyyabaaha ancale nu te tulha gueni. 2Cumu attiguaba oquinna iquile anca benni nu te tulha gueni, aníaguaba un Tata Do Iyyabaaha len lebiꞌi. Loesi nu rudhacale adí benni, loesi unnuhaguaba odequi Ben-na guele. 3¿Biaca ridolu rugüialu libitsu yuꞌu lheꞌe iyya lo betsilha, nianna bittu retábinlu gue yaga yuꞌu lheꞌe iyya lolha? 4¿Gasná gálu ttu betsi loeslu: “Begüelha cueaya libitsu yuꞌu lheꞌe iyya lolha”, inqui lu nna análi de anca yaga yuꞌu lheꞌe iyya lolha nna? 5¡Lu ancalu nu ni lo ni tisaba runi dequi ancalu nu runi nu anca tsee! Ulequixa yaga yuꞌu lheꞌe iyya lolha, qui ilá tseenlu cuequilu libitsu yuꞌu lheꞌe iyya lo betsilha.

6’Bittu udelhale nu anca leꞌa lo ca becu-na qui lä eyequicana goyaꞌacan le ttuttíru itsucan le, bittuguaba udelhale lo ca cutsi-na ca iyya racalaa te lidhacani te guele, qui lä eyequicana utsutsa uleabacana iqui ca unná.

Gualnnaba len Tata Do Iyyabaaha nu reasinle

(Lc. 11:9-13; 6:31)

7’Gualinnaba len Tata Do Iyyabaaha, Benniha nna gutebe nu reasinle. Gualeguile nna gunbe eselinle nu reguilaleha. Gualnne roꞌo yoꞌo, lee nna gunbe idhalcana guele. 8Cumu iyába ca benni rinnaba, gua ridíba ca nua nu rinnabacana. Ca nu reguilaha nna gua reselbaquin nua nu reguilacana. Ca nu rinne roꞌo puertaha nna gua ridhalbacana gue ca nua.

9’¿Nú benni nua ancana tata, gansi innába xiꞌinniha ttu ttaxtila, lana nna ttu ca iyya duꞌuya lo neda-na la ugüena nua? 10¿O innába nua ttu belha raca lheꞌe inda, lana nna belha raꞌaya lheꞌeni lo yu la ugüena nua? 11Inqui lebiꞌi ancalale nu lä du tsee leni nna gua rutebale nu tsee len ca xiꞌinle-na, adíla Tata gueri do iyyabaaha, guteba Ben-na nu tsee len ca benni innábacana nu reasaquinna lenie.

12’Larcala, gualun len ca benni gaxasná raca lele uncana len lebiꞌi, cumu aná rá lo ca ley gue Tata Do Iyyabaaha, lo ca sitsi bocaꞌana ca benni uca profeta gue Ben-na lhe.

Jesús re: Gualgaꞌa roꞌo puerta güexxa-na

(Lc. 13:24)

13’Gualgaꞌa roꞌo puerta güexxa-na. Cumu puerta xeni-na lhe neda bata-na lhe richecana ca benni atta tsia nitticana. Ixeba ca benni ritaꞌacana na. 14Ttiaca puerta nu cheena ca benni atta gatta elha naban guecani ttu tsaba nna güexxaba anca roꞌoni lhe suniba anca lo neda gueni lhe. Larcala nna ttu chuparba benni guarattiꞌacan na.

Jesús rixxiꞌe re: Udori cuidadu gue ca nu run lecani requi-na

(Lc. 6:43-44)

15’Gualdo cuidadu gue ca nu güen lasi rácana dequi ancacana profeta. Lacana ruleꞌecana attiba ttu carneꞌe tana, ttiaca attiba du le sagueo lä duta leni du lecani. 16Lebiꞌi nna güeyon biabale ca unná atti ilenle gaxasná du lecani. Cumu läga dica edíri besuli lo ca ya yitsi-na, bittuguaba aca utee ca xubaya-na igu lhe. 17Anáguaba iyába ca yaga tsee-na ribía nu xixxi tsee guecani, ttiaca nu bittu ancana yaga tseeha nna lägabi nu xixxi tsee ribía gueni. 18Läga aca cuia nu xixxi tsee gue ttu yaga nu bittu ancana yaga tsee, bittuguaba aca cuia nu xixxi bittu anca tsee gue ttu yaga tsee lhe. 19Iyába yaga nu bittu ribía nu tsee gueni nna irúba nua qui tsiana lo gui. 20Larcala nna güeyon biabale ca unná atti ilenle gaxasná du lecani.

21’Läga iyá ca benni rá dequi neti anca Benni banatia cana, etaꞌacana atta rinnabia Tata Do Iyyabaaha. Sunruba ca benni rudo tisa gue Tata quia do iyyabaaha aca etaꞌacana nía. 22Gansi chi bisía sá aca elha uxtisi gue ca benni seꞌe yies lo yu-ni, ixerucana gácana neti lania: “Lu ancalu Benni baninlu riꞌitu, lálu bedettitu atti utixxiꞌatu ca tisa gue Tata Do Iyyabaaha, láguabalu bedettitu atti bebeatu ca be xxegüi yuꞌu lheꞌe cuerpu gue ca benni lhe láguabalu bedettitu qui uca ixe ca milagru lhe.” 23Ttiaca neti nna lixxaba ecabia guecani upea cana: “Tsa läganu le ancabiatia. ¡Gualbiꞌetta atta dua ni, lebiꞌi, ca nu runi nu lä anca tsee!”

Jesús rixxiꞌe gue yoꞌo nu udo lo iyya ttaꞌa lenna nu udo lo yuxi

(Lc. 6:47-49; Mr. 1:22)

24’Larcala iyába ca benni rienquinna ca tisa quia-ni, nianna rudocana tisa runcana nu ria, lacana ancacana attiba ttu unbiyuu te elha rieni gueni bedo yoꞌo gueni lo ttu iyya ttaꞌa. 25Atti uca iyya nna bixentteba ca yoo seꞌe nía, biríatteba ttu be idí guatsuꞌuna itú iqui itú leni cuꞌe yoꞌoha. Ttiaca läga udána urixxina nua, cumu tsitsiba anca cimientu gue yoꞌoha xua lo iyya ttaꞌaha. 26Ttiaca ca benni rienquinna nu ria-ni, nianna bittu rudocana tisa uncana nu rpea cana, lacana ancacana attiba ttu unbiyuu nu bittu elha rieni gueni te bedo yoꞌo gueni lo yuxi. 27Atti bisía iyyaha nna bixentteba ca yooha, biríatteba ttu be idí guatsuꞌuna itú iqui itú leni cuꞌe yoꞌoha. Unnuha nna ubixxi lobana, tsaba dia latti itúbana.

28Atti uluxa unne Jesús ca tisa-ni nna ca benni seꞌe nía nna reban tsitsiabaquinna gue nu ruleꞌe Benniha. 29Cumu ruleꞌenie cana attiba ruleꞌe ttu benni rinnabia, bittu atti runi ca nu ruleꞌe nu rá lo ca ley bocaꞌana Moisés.

Sélection en cours:

San Mateo 7: zaq

Surbrillance

Copier