Matyu 5
5
Maipanggep kadiya nagasat
Luk. 6:20-23
1Ket ito nasingen ne̍ Je̍sus dito nakad-adu nga toley, nanang-at ka tageytey. Ito nakatugew antuni nin, imadenni igina diya pasurut na. 2Ket sinuruwan na da, nga agten idi to kinunen na:
3“Nagasat diya mangipudnu iya kinakurang da
maipanggep e̍ Apu Diyus,
ta uwed met igida
ya panangituray niya Nailangitan.
4Nagasat diya agladladingit,
ata igida nad ya uwed pakaliwliwaan da.
5Nagasat diya nasingpet,
ata igida nad met
ya mangtagikuwa mettas iya lubung.
6Nagasat diya agtarigagay kadiya
nalinteg nga panggep ne̍ Apu Diyus,
ta mapnec da nad mettas.
7Nagasat diya managkaasi,
ta igida ya makaasiyan nad met pe̍.
8Nagasat diya nadalus ya panpanunut da,
ta igida ya makasingen nad met e̍ Apu Diyus.
9Nagasat diya mangpatpatunus,
ta igida, maawagan da nad
nga anac ne̍ Apu Diyus.
10Nagasat diya mairurumen gapu mettas
iya panagtungpal da ka nalinteg,
ta uwed met igida ya panangituray niya Nailangitan.
11“Dakayu nga maumsi winno mairurumen, winno mapadpadake̍c ka kumpurmi gapu iya panagtungpal nu iyaken, ket maibilang kayu met nga nagasat. 12Ngarud, agragsac kayu kuma latta, se̍ aganggem kayu kuma pe̍, ta dackel nad met ya gun-guna nu ka langit. No nairurumen kayu, agragsac kayu kuma ngarud, ta agten mettas kadito mammadtu itun ya kasasaad nu ita.”
Diya maiyarig ka asin se̍ dilag iya lubung
Mar. 9:50; Luk. 14:34-35
13“Dakayu, ket maiyarig kayu ka asin nga mange̍cde̍ ka nabaru kadiya toltoley iya lubung. Ngem no maipac ya silem niya asinin, kumaan ngarud niya panangpasilem manin iyan nga asin? Awan ngarud sirsirbi nan. Ket maitemsit ngas nga gudgudlan diya toley nga manalan iyanin.
14“Ket maiyarig kayu pe̍ manin ka dilag nga mangwada kadiya toltoley iya lubung. Ket emmu tida nga ya siyudad nga uwed iya tuctuc niya tageytey, madi ngarud mailinged. 15Ket agten met pe̍ iya dilag. Ta no sibtan niya isa nga toley, ket madi na met tacban ka salupan, no di lugud ipay na iya kustu nga pakaipayan na, tasun madilagan diya amin nga uwed iya uneg niya baley. 16Ket agten kayu met kuma, ta madi kayu kuma ngarud ilinged ya arig nga dilag nu. Ta masingen kuma diya toltoley diya nabaru nga wangwangel nu. Ket iya agten iyan, daydayawen da ya Ama nu nga uwed ka langit.”
Maipanggep iya Linteg ne̍ Muyse̍s
17“No maipanggep iya Linteg nito Muyse̍s, se̍ dito nisursuru dito mammadtu itun, mabalin nga ipagarup nu nga inumbe̍t tac tasun ipac ku ya sirbi da. Ngem madi yac met inumbe̍t tasun ipac ku diyan, no di lugud tasun tungpalec ya pagrebngan da. 18Ta ya kinapudnu na, no kumaan niya panagpaut niya abac lawa se̍ lubung, itu pe̍ yin ya panagpaut niya orey nagan na nga le̍tra se̍ orey tulnec ngas niya Linteg, agingga ka matungpal nad ya aminin. 19Itu nga ya orey nagan na nga toley nga madi na gabay ya agtungpal iya isa kadiya bilbilin niya Linteg, orey no isa ngas nga bilin nga naibilang nga e̍teng ngas ya pateg na, se̍ no isuru na pe̍ kadiya toley nga madi da kanu masapul nga agtungpal kadiya bilbilin niya Linteg, ket maibilang nad met pe̍ yan nga toley nga kanumuwan ya kasasaad na kadiya iturayan niya Nailangitan. Ngem ya toley nga agtungpal nga gennung kadiya bilbilin niya Linteg se̍ mangisuru pe̍ kadiyan, ket maibilang nad met pe̍ nga napateg kadiya iturayan niya Nailangitan. 20Ta pudnu met nga madi mabalin nga makalak-am kayu kadiya iturayan niya Nailangitan, no bekken nga napudpudnu ya kinalinteg nu ngem iya kinalinteg diya manursuru iya Linteg se̍ diya Parisiyu.”
Maipanggep iya unget niya toley
21“Emmu nu to bilin nga naisuru kadito toley itun nga, ‘Madi ka pumatey. Ket ya orey nagan na nga pumatey, rebbeng na met ya maisangu nga maukum kadiya kustisiya,’ kunen na. 22Ket ya ibagac dakayu, ket ya amin nga orey makaunget ngas iya kapada na, rebbeng na met ya maisangu nga maukum kadiya kustisiya. Se̍ ya orey nagan na nga mangagi iya kapada na nga, ‘Awan nakem mu!’ ket rebbeng na met ya maisangu iya Kunse̍hus. Se̍ ya mangagi nga, ‘Turpi ka!’ ket rebbeng na met ya maipisuc iya apuy nga pagdusaan enna impiye̍rnu.
23“Itu nga no mawe̍ ka kuma agidatun ka sagut mu e̍ Apu Diyus iya pagdatunan, se̍ malagip mu nga uwed sakit niya nakem niya kapadam ikew, 24ibatim kuma pekkem ya isagut mu iya sangu niya pagdatunan, se̍ mawe̍ ka pekkem makikinnaawatan nga mona iya kapadam. Se̍ ka nad sumoli enna pagdatunan, nga idatun mu ya sagut mun.
25“Ket no uwed mangidarum ikew, sigida ka kuma ngarud nga makikinnaawatan igina, bayat niya kauwed nu pekkem iya dalan nga mawe̍ iya pangukuman, tasun madi naka kuma isangu iya kuis. Ta kaynun no iyawat naka ya kuis iya pulisiya, ket maibalud ka. 26Ket no agten iyan, pulus nga di ka nad makaruwar iyanin, agingga nga di ka mabayadan ya amin nga nikeddeng da. Ket awan asi da ikew, orey no isa ngas nga sintabu.”
Maipanggep iya pannakikamalala
27“Ket emmu nu pe̍ to bilin nga, ‘Madi ka makitipun ka bekken mu nga asawa.’ 28Ket ya ibagac dakayu, ket amin nga mangpanunut ka dake̍c maipanggep iya babey nga singsingen na, naibilang mettin nga makitipun igina iya panpanunut nan. 29Itu nga no pakabasulam ya diwanan nga matam, kotkotem kuma ngasin, se̍ ka itemsit! Ta nabarbaru lugud no maipac ya isa nga parte̍ niya beggim ngem iya awan pagkurangan niya beggim, ngem maipisuc ka ngas met ka impiye̍rnu. 30Ket no ya diwanan nga imam ya pakabasulam, putdem masin, se̍ ka itemsitin. Ta nabarbaru lugud no agkurang ka ka isa nga parte̍ niya beggim ngem iya awan pagkurangan niya beggim, ngem mawe̍ ka ngas met ka impiye̍rnu.”
Maipanggep iya panagadi
Mat. 19:9; Mar. 10:11-12; Luk. 16:18
31“Ket uwed pe̍ to bilin nga, ‘Ya lalaki nga mayat nga mangiyadi iya asawa na, masapul nga e̍cdan na ka naisurat nga pakasingnan iya panangiyadi na igina,’ kunen na. 32Ket ya ibagac dakayu, ket ya lalaki nga bekken nga nakikamalala ya asawa na, ngem iyadi na latta, ket pairaman na mettin ya asawa na ka basul nga pannakitipun ka bekken na nga asawa. Ket ya orey nagan na nga mangasawa manin ka babey nga naiyadi yin, makabasul met pe̍ ka basul nga pannakitipun ka bekken na nga asawa.”
Maipanggep iya panagsapata
33“Ket emmu nu pe̍ to bilin nga naisuru kadito toley itun nga, ‘Madi ka paglikudan ya nikarim iya sapatam, no di lugud tungpalem diya karim nga naariman iya imatang niya Apu,’ kunen na. 34Ket ya ibagac dakayu, ket pulus nga madi kayu kuma nga agsapsapata! Ngarud, bekken nu kuma nga pagsapata nga ibalikas nu ya balikas nga ‘langit’, ta ya langit, arig mettas nga trunu ne̍ Apu Diyus nga pagturayan na. 35Se̍ bekken nu kuma met pe̍ nga pagsapata nga ibalikas nu ya balikas nga ‘lubung’, ta ya lubung, arig nga pagpatayan ne̍ Apu Diyus kadiya saka na. Se̍ bekken nu kuma met nga pagsapata nga ibalikas nu ya balikas nga ‘He̍rusale̍m’, ta siyudad mettas niya Kangatuwan nga Ari. 36Ket orey ya ulu nu mettas, bekken nu kuma lugud nga pagsapata, ta dakayu, awan met kabaellan nu nga orey mangsukat iya kulur niya orey isa ngas nga ebbuc nu, puraw man winno nangisit. 37Ngarud, pulus nga awan kuma pagsapata nu, ta ya ibaga nu kuma, basta ‘Bo’ no bo, se̍ ‘Bekken’ no bekken. Ta ya orey nagan na nga maidga kadidi, ket agtaud ngas met iya diyablu nga managdacdake̍c.”
Maipanggep iya panagibales
Luk. 6:29-30
38“Ket emmu nu pe̍ to bilin nga, ‘Rumbeng nga mabulding ya mangbulding, se̍ magorpew ya manggorpew,’ kunen na. 39Ket ya ibagac dakayu, ket madi nu pulus nga balsen diya agwangel ka dake̍c dakayu. Kaspagarigan no uwed mangtungpa ikew iya diwanan nga pasngit mu, ket islam kuma pekkem ya katigid. 40Agten pe̍ no uwed mangidarum ikew, tasun alac na kanu ya badum, ket e̍cde̍m ngarud pe̍ igina pati ya punyus mu. 41Agten pe̍ no uwed kuma mangpilit ikew nga agitulud ka kanu para igina ka isa nga kilume̍tru, ket itulud mu lugud ka duwa nga kilume̍tru. 42Ket no uwed kuma agpakaasi nga agadeng ikew, e̍cdam ngarud. Se̍ no uwed mayat nga tumkew ikew, patkawam ngarud.”
Maipanggep iya panangayat kadiya kumuntra
Luk. 6:27-28, 6:32-36
43“Emmu nu to bilin nga, ‘Ya kabulun mu, ayatem. Ket ya kumuntra ikew, guraem,’ kunen da. 44Ket ya ibagac dakayu, ket ayaten nu lugud diya kumuntra dakayu, se̍ ikararagan nu lugud pe̍ diya mangirurumen dakayu. 45Ket agten iyan kuma ngarud ya wangwanglen nu, tasun ipasingen nu nga tutu kayu nga anac niya Ama nu nga uwed ka langit. Ta e̍ Apu Diyus, padapada nga pagsinagen na ya sinag na kadiya nasingpet se̍ kadiya agdacdake̍c nga toltoley. Se̍ padapada nga ipaay na pe̍ ya udan para kadiya nalinteg se̍ kadiya bekken nga nalinteg.
46“Ket agten kayu kuma pe̍ iyan, ta no diyan nas toley nga agayat dakayu ya ayaten nu, bekken kayu nga maikari iya igun-guna ne̍ Apu Diyus. Ta orey diya kagura nu nga agsingsingir ka buis, agten met pe̍ iyan ya wangwanglen da. 47Se̍ agten pe̍ no diyan nas kapada nu ya kablaawan nu, agten kayu was kadiya kaaduwan nga toltoley. Ta orey diya bekken nga toley ne̍ Apu Diyus, agten met pe̍ iyan ya wangwanglen da. 48Ngarud, dakayu, masapul nga agbalin kayu nga awan pagkurangan iya panagbiyag nu, nga agten mettas iya gangey niya nailangitan nga Ama nu, nga awan pagkurangan na.”
Sélection en cours:
Matyu 5: YBT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 1990 New Tribes Mission, Sanford, FL 32771-1487, USA.
Printed in the Philippines.