GENESISE 7
7
Morwalela
1Jehofa a raya Noa a re: “Tsena, wena le ntlo ya gago yotlhe mo ntlong e e kokobalang; gonne wena, ke go bonye o le tshiamo fa pele ga me mo losikeng lo. 2Ga ditshedi le diphologolo dingwe le dingwe tse di itshekileng o itseele di supa le di supa, e tona le e namagadi ya tsone; ga dikgomo le diphologolo tse di sa itshekang di le pedi, e tona le e namagadi ya tsone. 3Ga dinonyane tsa loapi le tsone, di supa le di supa, e tona le e namagadi; go tshedisa losika mo lefatsheng lotlhe fela. 4Gonne e tlaa re malatsi a supa a sena go feta, ke tlaa nesa pula mo lefatsheng ka malatsi a le 40 le masigo a le 40; dilo tsotlhe tse di tshedileng tse ke di dirileng, ke tlaa di senya ke di tlosa mo lefatsheng.” 5Noa a dira gotlhe ka fa Jehofa a mo laetseng ka gone.
6E rile morwalela wa metsi o nna mo lefatsheng, Noa a bo a le dinyaga di le 600. 7 Noa a tsena mo ntlong e e kokobalang, ene le bomorwawe, le mosadi wa gagwe le basadi ba bomorwawe nae, ka ntlha ya metsi a morwalela. 8Ga ditshedi le diphologolo tse di itshekileng, le ga ditshedi le diphologolo tse di sa itshekang, ga dinonyane, le ga sengwe le sengwe se se gagabang fa fatshe, 9tsa tsena ka bobedi le bobedi kwa go Noa mo ntlong, e tona le e namagadi, jaaka Modimo o laotse Noa. 10Ga dirala ya re malatsi a supa a sena go feta, metsi a morwalela a nna mo lefatsheng.
11 Ka ngwaga wa 600 wa botshelo jwa ga Noa, ka kgwedi ya bobedi, ka letsatsi la 17, ka letsatsi leo fela metswedi yotlhe ya boteng jo bogolo jo bo teng teng ya phunyega, le dithoba tsa legodimo tsa bulega. 12Pula ya na mo lefatsheng ka malatsi a le 40, le masigo a le 40. 13Ka letsatsi leo fela Noa a tsena mo ntlong e e kokobalang, a na le Sheme, le Hame le Jafethe, bomorwa Noa, le mosadi wa ga Noa, le basadi ba bararo ba bomorwawe nae. 14Bone le phologolo nngwe le nngwe le sebatana ka fa losikeng lwa tsone, le diruiwa tsotlhe ka fa ditshikeng tsa tsone, le sengwe le sengwe se se gagabang fa fatshe ka fa losikeng lwa sone, le mefuta yotlhe ya dinonyane ka fa losikeng lwa yone, nonyane nngwe le nngwe ya tse di diphuka tsotlhe, 15tsa tsena kwa go Noa mo ntlong e e kokobalang, bobedi le bobedi jwa nama yotlhe e mowa wa go tshela o leng mo go yone. 16Tse di tsenyeng, tsa tsena e le tona le namagadi tsa nama yotlhe fela, jaaka Modimo o mo laotse; Jehofa a mo tswalela mo teng.
17Morwalela wa tswelela ka malatsi a le 40; metsi a kokomoga, a tsholetsa ntlo; ya tsholetsega godimo ga lefatshe. 18Metsi a hupetsa, a kokomoga thata mo lefatsheng; ntlo ya tsamaya fa godimo ga metsi. 19Metsi a kokomoga thata thata mo lefatsheng: dithaba tse di godileng tsotlhe fela, tse di kwa tlase ga legodimo tsa khurumetsega. 20Metsi a kokomogela godimo tekanyo ya boleele jwa mabogo a le some le botlhano; le tsone dithaba tsa khurumetsega. 21Nama yotlhe e e tsamayang mo lefatsheng ya a swa, dinonyane le diruiwa, diphologolo le dibatana, le sengwe le sengwe se se gagabang fa fatshe, le batho botlhe. 22Tsotlhe tse go leng mowa wa botshelo mo dinkong tsa tsone, tsa tse di mo komelelong, tsa a swa. 23Sengwe le sengwe se se tshedileng se se mo lefatsheng sa senngwa, batho le diruiwa, le se se gagabang, le dinonyane tsa legodimo; tsa senngwa tsa tlosiwa mo lefatsheng; ga sala Noa a le esi fela, le ba o nang nabo mo ntlong e e kokobalang. 24Metsi a hupetsa lefatshe ka malatsi a a 150.
Sélection en cours:
GENESISE 7: TSW08NO
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Bible Society of South Africa 1992. Used with permission. All rights reserved.
