HECHOS 5
5
Ananías shuti runaca, Safira shuti huarmindimi huañushca
1Ananías shuti runaca, Safira shuti paipaj huarmihuanmi, shuj alpata jaturca. 2Chai runaca, alpata jatushca culquimanda ashata japishpami alichirca. Chaitaca, paipaj huarmipash yacharcami. Chai culquitaca ashatalla apamushpami, villachun cachashcacunapaj ñaupajpi churarca. 3Shinamandami Pedroca, cashna nirca:
—Ananías, ¿imapajta cambaj shungupi, Satanás yaicuchun saquircangui? ¿Imashpata alpata jatushca culquimanda ashata japishpa, Diospaj jucha illaj Espirituta llullajungui? 4Alpaca, ¿nachu cambaj carca? Chai jatushca culquitaca, ¿nachu tucuilla alichinalla carcangui? ¿Imashpata cambaj shungupi chashna nalita ruranatara yarircangui? Runacunataca na llullashcanguichu, ashtahuangarin Taita Diostami llullajungui— nircami.
5Pedro chashna nijpica, Ananías runaca huañushpa urmarcallami. Chashna huañushcata uyashpaca, tucui gentecunami ninandapacha manllarirca. 6Chaipi tiaj chairalla huambracuna shamushpami, Ananías runa huañushcataca pilluchinajurca. Shina rurashpami, apashpa pambanajurca.
7Ña quimsa horaspishnallami, paipaj huarmipash chaiman yaicumurca. Paipaj cusa huañushcataca nara yacharcachu. 8Chai huarmi shamujpimi, Pedroca cashna nirca:
—Cangunaca, ¿chaipajllachu alpataca jaturcanguichi? Villahuai— nircami.
Shina tapujpimi:
—Ari, chaipajllami jatuparcanchi— nirca.
9Shina nijpimi Pedroca, cashna nirca:
—¿Imashpata ishcandi parlarishpa, Jatun Diospaj Espirituta umachinatara yarircanguichi? Ricui, cambaj cusata pambashpa shamujcunaca, ñami punguta yaicumunajun. Candapash, paicunallatami apagrin— nircami.
10Chashna nijujhuanmi, chai huarmipash paipaj ñaupajpi urmashpa huañurca. Chai huambracuna yaicushpaca, huarmipash huañushcata ricushpami, paitapash apashpa, cusapaj ladopillata pambarca. 11Chashna tucushcataca, tandanajuj crijcunapash, shujcunapash uyashpami, tucuicuna ninandapacha manllarinajurca.
Imatapash rurashpa ricuchinacunatapash, imapash juyaillacunatapash ashtacatami ruranajushca
12Villachun cachashcacunaca, tucui gentecunapaj alipajmi, ashtaca ricuchinacunata, imatapash jatun manllarinacunata ruranajurca. Crijcunaca, tucuillami Salomón rurashca corredorman, shujllashnalla tandanajun carca. 13Shujcunaca, paicunahuan tandanajunataca manllarcami. Ashtahuangarin gentecunaca, ninandami paicunata alicachinajurca. 14Jaricunapash, huarmicunapash, Apunchi Jesusta crishpami ashtahuan ashtahuan miranajurca. 15Huañujujcunataca camacunandi, jatanacunandimi ñanman llujchimushpa churanajurca. Pedro chaita yalijujpica, paipaj llandullapash alichingapashchari nishpami, chashna churanajurca. 16Chai ladolla pueblocunapi causanajuj gentecunapashmi, ashtacacuna Jerusalenman shamunajurca. Paicunaca huañujujcunatapash, mapata rurachij ayacuna jundashpa llaquichijpi causanajuj gentecunatapashmi apamunajurca. Paicunaca, tucuicunami alichi tucunajurca.
Pedrotapash, Juandapash catiriashpami llaquichishca
17Shina alichijta ricushpami, curacunata mandajpash, paihuan tucui tandanajujcunapash ninanda fiñarishpa jatarirca. Paicunaca, saduceo nishca puralla tandanajuj runacunami carca. 18Chashna cashpami, villachun cachashcacunataca japishpa, prezuna jatun huasipi churachun cachanajurca. 19Ashtahuangarin Jatun Diosca, paipaj angeltami tuta cachamushpa, prezuna huasi pungutaca pascashpa, paicunataca llujchirca. Chashna llujchishpami, cashna nirca:
20—Cunanga, Diospaj huasiman richi. Chaipica, shayarishpa, gentecunaman mushuj causaimanda tucuita villanguichi— nircami.
21Shina mandajpi cazushpami, Diospaj huasiman tutamandata yaicushpa yachachinajurca.
Chaicamanmi, curacunata mandajpash, paihuan purijcunapash, mandaj puracunalla tandanajungapaj nishpa, israelcunata mandaj rucucunatapash tandachirca. Shina tandanajushpami, villachun cachashcacunataca, prezuna huasimanda llujchimugrichun cacharca. 22Ashtahuangarin apangapaj rij chai soldadocunaca, prezuna huasipica na tarircachu. Chaimandami villangapaj tigranajurca. 23Paicunaca cashnami villanajurca:
—Prezuna huasi pungutaca, alipacha vichashpa jarcashcatami japigrircanchi. Cuidaj soldadocunapash, canllapimi pungucunapi cuidashpa shayanajushca carca. Ashtahuangarin punguta pascashpa ricujpica, pipash illashcami carca— nishpami villanajurca.
24Curacunata mandajpash, Diospaj huasita cuidajcunata mandajpash, curacunata shuj mandajcunapash, ¿chai runacunaca imashi tucurca? ninajushpami na yachai ushanajurca.
25Ashtahuangarin shuj runa shamushpami, cashna nishpa villarca:
—Ricuichi, prezuna huasipi canguna vichashca runacunaca, Diospaj huasipimi gentecunaman yachachinajun— nircami.
26Shina nijpimi, cuidajcunata mandaj runaca, chai cuidaj runacunahuan cutinllata paicunata japingapaj rirca. Chaipi tandanajushca gentecuna, rumicunahuan huañuchinata manllashpami, imatapash na nishpa paicunataca alilla aparca. 27Shina apamushpaca, mandaj puracunalla tandanajushcapaj ñaupajpimi shayachinajurca. Chaipimi curacunata mandajca, cashna nishpa tapujurca:
28—¿Nachu cangunataca: ‘Chai Shutimandaca, napacha cutin yachachinachu canguichi’ nircanchi? Shina cajpipash na cazushpami, Jerusalenbi tucuicunaman yachachishpa puringuichi. Chai runatapash, paicunami yahuarta jichashpa huañuchirca nishpami, ñucanchitaca juchachingapaj munanguichi— nircami.
29Shina nijpimi Pedroca, villachun cachashca caishujcunandi, cashna nishpa tigrachirca:
—Taita Diostami, runacunatapash yali ashtahuan cazunapacha canchi. 30Cangunami, Jesustaca caspipi chacatashpa huañuchircanguichi. Shina huañuchijpipash, ñucanchi ñaupa taitacunapaj Taita Diosmi causachirca. 31Paitami, Mandaj cachumbash, Quishpichij cachumbash, Taita Diosca jatumbi churashpa, paipaj ali ladoman tiachirca. Israelcuna llaquirishpa, Diospajman tigrarijpi juchacunata anchuchingapajmi, chashnaca rurarca. 32Ñucanchica, chaita ricushcata villajcunami canchi. Diospaj jucha illaj Espiritupash, shinallatami villajun. Chai Espiritutaca, paita cazujcunamanmi Taita Diosca cararca— ninajurcami.
33Chashna villajpi uyashpami chai mandajcunaca, ninanda fiñashpa huañuchingapaj munanajurca. 34Ashtahuangarin mandaj puracunalla tandanajushca purapica, Gamaliel shuti fariseo runami tiarca. Mandashca shimita alipacha yachachij cajpimi, paitaca tucuicuna ninanda alicachin carca. Pai shayarishpami, villachun cachashcacunataca ashagucamanlla canllaman llujchipaichi nirca. 35Paicuna llujchijpimi chai yachachijca, mandajcunataca cashna nijurca:
—Ricuichi, Israel runacuna, pactarallapash nara ali yarishpata, chai runacunata imatapash ruranguichiman. 36Cainani punllacunapica, Teudas shuti runataca, mandajmi cani nijpimi, chuscu patsajshna runacuna catinajurca. Ashtahuangarin chai runata huañuchijpimi, paita tucuilla cazujcunaca caita chaita rishpa tucurirca. 37Chai jipami, mashna gentecuna tiajta yachangapaj cuentana punllacunapica, Galilea llactamanda Judas shuti runapash jatarishpa, ashtaca gentecunata catichirca. Shinallata paita huañuchijpica, paita tucui cazujcunapash caita chaita rircallami. 38Chaimandami cunambash, cashna nini: Cai runacunamandaca anchurichi, ama imatapash nishpa cacharichilla. Paicuna yarinajushpa imata rurashpa purijushcapash, paicunapaj munaimandalla cashpaca, tucuringallami. 39Ashtahuangarin Taita Diosmanda cajpica, na tucuchi usharingachu, pactarallapash Taita Diosta fiñachinguichiman— nijurcami.
40Pai villashcataca, alicachishpami uyanajurca. Chaimandami, villachun cachashcacunata cayachun cachashpaca astirca. Chai jipaca: “Jesuspaj shutipica, cutinga na villanachu canguichi” nishpa rimashpami, manllachishpa cacharirca.
41Mandaj puracunalla tandanajushca ñaupajmanda paicuna llujshishpaca, Jesuspaj Shutimanda llaquita apachun Dios saquishcamandami, ninanda cushijunajurca.
42Ashtahuangarin paicunaca Jesucristomamdami, punllandi Diospaj huasipipash, shuj huasicunapipash yachachishpa villanataca na saquinajurca.
Sélection en cours:
HECHOS 5: QUII
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Quichua Imbabura Bible © United Bible Societies, 1994.
