Mɑtʉ̈ɔ 4
4
Sɑ́ttɑ kwɑꞋnɛ Yɛ́su
(Mɑ́lɛ́kúshi 1.12-13; Lúkɑ́shi 4.1-13)
1Ɛ́ ɡɛ pɔ́Ꞌɔ Zẅikŋɛ-Sɛ́ fú zúꞋu, ńdɔk Yɛ́su ŋ́ɡʉ kɔ̂ŋtɛt, pɑ́Ꞌ Sɑ́ttɑ ɡʉ ŋ́kwɑꞋnɛ wɛ́. 2A nɑ́ŋ zúꞋu lɛ́Ꞌlɑ́Ꞌ mɛɡɛ́mɛ́nɛ́kwɑ kɛ́ kwɛ́t yúu tɛ njí zɑ́ŋ wɛ́. 3Sɑ́ttɑ tɔ́ ŋ́kwɑꞋlɛ wɛ́, ńcú ŋɡɔ: «Pɑ́Ꞌ ɔ mɔ́ɔ-Sɛ́ lɑ́, ɡɔ́ɔ ŋ́kɛ́ ńcú mbɔ̌ mɛŋɡɔꞋ mɔ ŋɡɔ ɛ́ shɔtnɛ ńtsʉ́Ꞌ yúujʉ́ ɔ jʉ́.» 4Yɛ́su tsɔ́Ꞌ ŋɡɔ: «Pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ:
“Ŋu kɛ́ lɔk pɔ ndɑꞋ yúu mi ɑ kwɛ́tnɛ lɑ ḿbɔ́ ɡú pɔ́.
A ńdɔk pɔ sẅiŋɛ yí ɛ́ cẅɛtnɛ ntsu-Sɛ́.”»
5Sɑ́ttɑ lɔk Yɛ́su ŋ́ɡʉ nɛ́ tʉsɔ́ŋ-Yɛlúsɑlɛm, ńtík wɛ́ ndǔ ndɛ̂k yi ɛ́ zʉꞋ-nɔŋpɔꞋ#4.5 Pɛ́ kwɑŋɛ ŋɡɔ yîyɑ́ ndɛ̂k kɑ pɔ́ ndǔ ndɑ́ yi ɛ́ zʉꞋ-nɔŋpɔꞋ, ḿbɔ́ zʉꞋ yi ŋu lɑɑ ɛ́fú zúꞋu ɛ́sẅiklɛ ḿvu sɛ́ ɑ tsʉ́Ꞌ pɔ ŋkʉ́ɔ., 6Ńcú mbɔ̌ wɛ́ ŋɡɔ: «Pɑ́Ꞌ ɔ mɔ́ɔ-Sɛ́ lɑ́, kít ńtʉ́ʉ sɛ́, mbíꞋŋɡɔ pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: “Sɛ́ ɡʉ ɛ́sẅíi pɛcʉ̈ɔ́Ꞌ pɛ́ pɑ́Ꞌ pɔ́p ɡʉ ŋ́ɡɛ nǔu ɡu, pɔ́p ɡʉ ńdɔk mbɔ́ mɔ́p ńtíi wú tɛ ɔ pɔɔ tɛ́m ku yú nǔu ŋɡɔꞋ pɔ́.”» 7Yɛ́su tsɔ́Ꞌ mbɔ̌ wɛ́ ŋɡɔ: «Pɛ́ kɑ pɛn ŋ́ŋwɑꞋnɛ tsɛt ŋwɑꞋnɛ-Sɛ́ ŋɡɔ: “Ḿbɑ́ɑ ŋu nɛkwɑꞋnɛ Tsɑpʉɔ Sɛ́ wɛ kwɑꞋnɛ́nɛ ŋɡɔ ɑ ɡɛ yúu nǔu wɛ́.”»
8Sɑ́ttɑ pɛn ńdɔk wɛ́ ŋ́ɡʉ, ńtík wɛ́ ndǔ nɛcɔ́ nɛŋkɔ́Ꞌ ni ɛ́ ɡʉ tɛ tʉ́, ńtʉ́ʉ zúꞋu, ńnyɛt wɛ́ nɛ́ ŋɡɔŋ nɛ́ ŋɡɔŋ yi ɛ́ ndǔ mbí mbɑ yúu mi pɔ́p lɔknɛ ŋ́ɡúꞋ, 9ńcú mbɔ̌ wɛ́ ŋɡɔ: «Ɔ lɑɑ ŋ́kẅíꞋlɛ sɛ́ mbi mɔ ŋ́ɡúꞋlɛ wɑ́ɑ, ŋ́ɡɑ́ nɛ́ ɡu.» 10Yɛ́su cú mbɔ̌ wɛ́ ŋɡɔ: «Sɑ́ttɑ, fú nɛjɔ́ŋ mɔ kẅɛ́Ꞌlɛ, mbíꞋŋɡɔ pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: “Ŋu ɡúꞋlɛ pɔ ndɑꞋ Tsɑpʉɔ Sɛ́ wɛ zɛnɛ́jʉ́ ḿbɛn ńzúꞋ pɔ ndɑꞋ ntsu wɛ́.”» 11Sɑ́ttɑ ɡɔ́ɔ ŋ́kɛ́ ńnɑ́ Yɛ́su. Pɛcʉ̈ɔ́Ꞌ-Sɛ́ tɔ́, ḿbɔ́ ńniitɛ yúu ńdɔk ńdíŋɛ wɛ́.
Yɛ́su pɛn Ŋɡɑlilɛɛ ńzɛ fɑꞋ yɛ́
(Mɑ́lɛ́kúshi 1.14-15; Lúkɑ́shi 4.14-15)
12Pɛ́ kɑ níꞋ Jɑ̂ŋ ndɑ́tsɑ́ŋ, Yɛ́su ɡɛ ńzúꞋ, ŋ́ɡʉ nɛ́ Ŋɡɑlilɛɛ, 13ŋ́kúu Nɑ̌ɑzɑlɛt ŋ́ɡɛ ḿbɛn ŋ́ɡʉ ńtsʉ́Ꞌ ńnɑ́ŋ pɔ Kɑpɛɛnɑwûm. Ɛ́ pɔ́ tʉ́sɔŋ ḿbɔ́ mbʉʉ nɛkʉŋ-ŋki-Ŋɡɑlilɛɛ, lɑ́Ꞌ yi Zɑbulɔŋ pɔ́p Nɛftɑlî tʉ̈ɔ́tɛ́nɛ wɛ́ ńníꞋ sɔŋ. 14Ɛ́ pɔ́ pɔ́Ꞌɔ, lɑ nu yi Ɛsɑ̌yɑ Ŋɡɛ́mndʉ̈ɔ́Ꞌ-Sɛ́ kɑ cúnɛ lɔk ḿbuutɛ. A kɑ cú ŋɡɔ:
15«pʉʉ pʉɔ-ŋɡɔŋ-Zɑbulɔŋ mbɑ pʉʉ pʉɔ-ŋɡɔŋ-Nɛftɑlî,
pʉʉ ẅí pʉʉ mbʉʉ-nɛkʉŋ-ŋki, ḿbɔ́ nǔu yɛcɔ́ njʉ́n-ŋki-Juudɛŋ,
pʉʉ pʉɔ-Ŋɡɑlilɛɛ, pʉʉ ẅí pʉʉ pɛ́ pʉɔ-lɑ́Ꞌ-pɑkɛ́jí Sɛ́ pɔ nɑŋnɛ
16Pʉʉ ẅí pʉʉ kɑ nɑŋnɛ tsɛt nzɛ́nzʉ́ʉ,
yʉ́ʉ njí tsuŋ ŋ́kiɛ.
Mɔ́nɛm sɑ́Ꞌ tɛ ḿbɔ́ ńtɑ́
nǔu pʉɔ pinɛ pɔ́p kɑ nɑŋnɛ tsɛt ŋɡɔŋ-nzɛ́nzʉ́ʉ zʉꞋ yí nɛvú ḿbɔ́nɛ ńnʉk wɔ́p.»
17Yɛ́su pɔ́ Kɑpɛɛnɑwûm pɔ́Ꞌɔ, ńzɛ nɛsẅíi nu-Sɛ́, ḿbɔ́ ńcú ŋɡɔ: «Pʉʉ kúpmɛ mɑt wʉʉ, mbíꞌŋɡɔ ŋkɑ́ yi Sɛ́ ɡʉ ɛ́sɑ́Ꞌ nɛfɔɔ nɛ́ kẅɛ́Ꞌlɛ tɛ ḿbɔ́ ḿbɑ́ɑtɛ.»
Yɛ́su tsɔ́Ꞌ pʉɔ pɛ́nɛ́kwɑ ńdɔk ŋ́ɡɛ ɡɑŋku pɛ́
(Mɑ́lɛ́kúshi 1.16-20; Lúkɑ́shi 5.1-11)
18Yɛ́su ɡɛ ḿbɔ́ ńnɛn mbʉʉ nɛkʉŋ-ŋki-Ŋɡɑlilɛɛ, ńjʉ́ɔ pɔ́ɔpɛ́mɑ́ pɛ́pɑ́. Símɔ ẅí pɛ́ pɛnnɛ ɛ́fúŋ wɛ́ ŋɡɔ Pyɛ̂, mbɑ Ndɛlɛ́yɑ ẅí ɑ mɔ́ɔmɑ́ pɛ́ Símɔ ɛ̂wɑ́. Pɔ́p pɔ́ ḿmɑꞋ mɛŋkʉ ŋki. MbíꞋŋɡɔ pɔ́p ḿbɔ́ pɑmɑꞋshú. 19Yɛ́su cú mbɔ̌ pɔ́p ŋɡɔ: «Pʉʉ tɔ́, ńcʉ́ɔ nzʉʉ mɔ, n dɔk wʉ́ʉ ŋ́ɡɛ pɑlɔɔ pʉɔmɛsɔŋ.» 20Pɔ́p ɡɔ́ɔ ńnɑ́ mɛŋkʉ mɔ́p ńcʉ́ɔ nzʉʉ yɛ́.
21Pɛ́ nɑꞋ ńzɛɛ ńnɛn, Yɛ́su pɛn ńjʉ́ɔ pɛcɔ́ pɔ́ɔpɛ́mɑ́ pɛ́pɑ́ Jɑ̂k pɔ́p Jɑ̂ŋ, pɔ́p pɔ́ pɔ́ɔ-Zɛbɛ́dɛ́ɛ, pɔ́p pɛ́ tɑ̌ɑ wɔp pɔ́ tsɛt kɑnúꞋ ḿbɔ́ ńniitɛ mɛŋkʉ mɔ́p, ɑ fúŋ wɔ́p. 22Pɔ́p ɡɔ́ɔ ńnɑ́ kɑnúꞋ mbɑ tɑ̌ɑ wɔp ńcʉ́ɔ nzʉʉ yɛ́.
23Yɛ́su ɡɛ ḿbɔ́ ŋ́ɡɔ́ ńnɛn zʉꞋ tsʉʉ tsɛt Ŋɡɑlilɛɛ, ńzíꞋ pʉɔ nɛ́ nu-Sɛ́ tsɛt mɛndɑ́-cúꞋlɛ-pɑyúdɑ, ɛ́sɑ́Ꞌ Ŋkʉʉ sʉ́Ꞌnɛ ẅí ɛ́ sẅíinɛ pʉɔ pɑ́Ꞌ nɛfɔɔ-Sɛ́ pɔ́nɛ, ḿbɔ́ ŋ́ɡɛ ŋu ẅí ɑ ɡẅɛɛnɛ pɔ yɛ́tɛ́ ntɛ́ ɡɔɔ lɑ́ kɛ yɛ́tɛ́ ntɛ́ lɔ́Ꞌ ɔɔ, fíitɛ. 24Ɛ́ pɔ́ pɔ́Ꞌɔ, pɛ́ lɔk lík yɛ́ ɛ́sɑt ŋɡɔŋ-Silii tsʉʉ. Pɛ́ pɔ́ ńdɔk pʉɔ tsʉʉ pinɛ mɛɡɔɔ ntɛ́ nɛ́ ntɛ́ m̄bɔ́nɛ nǔu pɔ́p, pʉɔ pinɛ mɛzẅikŋɛ kɛpɔŋ kɑ pɔ́ ḿbúunɛ wɔ́p, mbɑ pɑvu tú, pɔ́p ɡɑŋkẅíꞋlɛ ńtɔ́, Yɛ́su ɡɛ pɔ́p fíitɛ. 25Lɑ́Ꞌ mɛnɔɔ mɛnɔɔ fú Ŋɡɑlilɛɛ, ɛ́fú tsɛt mɛtʉ́sɔŋ nɛɡɛ́m, ɛ́fú Yɛlúsɑlɛm, ɛ́fú Judɛ̂ tɛ mbɑ nǔu yɛcɔ́ njʉ́n-ŋki-Juudɛŋ, ńcʉ́ɔ nzʉʉ yɛ́.
Sélection en cours:
Mɑtʉ̈ɔ 4: JGO
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
CABTAL, 2017