Génesis 35

Dios tsi' yʌq'ue i yutslel i t'añ Jacob ya' ti Bet-el

1Dios tsi' su'be Jacob: “Ch'ojyen, letsen majlel ti Bet-el, ya' ma' cʌlel ya'i; melben i pulʌntib i majtañ Dios tsa' bʌ i pʌsbeyet i bʌ che' ba' ora woliyet ti puts'el ti' tojlel a wʌscun Esaú.”#Gn 28.11-17 2Jiñi cha'añ Jacob tsi' su'be jiñi año' bʌ ti yotot yic'ot pejtelel año' bʌ ti' wenta:

—Chocola loq'uel jiñi dios tac am bʌ la' cha'añ, sʌc-esan la' bʌ yic'ot q'uextan la' pislel. 3Mi caj lac letsel majlel ti Bet-el come ya'i mi caj c melben i pulʌntib i majtañ Dios, jiñi Dios tsa' bʌ i jac'beyon ti jiñi q'uiñ che' bʌ tsa' cu'bi wocol yic'ot tsa' bʌ ajñi quic'ot tic bijlel ya' ba' tsa' c cha'le xʌmbal ñumel.

4Ti' pejtelelob tsi' yʌq'ueyob Jacob pejtelel i dioste'ob yic'ot i yuya' año' bʌ ti' chiquin;#35.4 I yuya' año' bʌ ti' chiquin: Ili uya'ʌl tac tsi' q'ueleyob che' bajche' i diosob woli bʌ i cʌntañob; lamital tsi' ch'ujutesayob. Jiñi cha'añ yom mi' jisʌntel. Jacob tsi' mucu ti' ye'bal colem te'#35.4 Colem te': Q'uele nota am bʌ ti Gn 12.6. lʌc'ʌl bʌ ya' ti Siquem.#35.4 Siquem: Yom ma' q'uel nota am bʌ ti Gn 12.6, cha'añ ma' ch'ʌmben isujm. 5Che' bʌ tsa' loq'uiyob majlel. Jiñi año' bʌ ti tejclum tac ya' ti' joytʌlel tsa' cajiyob ti bʌq'uen cha'añ i Dios Jacob, jiñi cha'añ ma'añic tsi' yajñesayob majlel i yalobilob Jacob.

6Tsa' c'oti Jacob yic'ot pejtelel jiñi tsa' bʌ majliyob yic'ot ya' ti Luz, am bʌ ti' lumal Canaán, jiñʌch Bet-el. 7Tsi' melbe i pulʌntib i majtañ Dios ya'i, tsi' yotsʌbe i c'aba' jiñi lum ti “El-bet-el”,#35.7 El-bet-el: Jiñʌch t'añ ti hebreo am bʌ isujmlel ti lac t'añ: I Dios jiñi año' bʌ ti Bet-el. Q'uele nota am bʌ ti Gn 28.17. come ya'i tsi' pʌsbe i bʌ Dios che' bʌ woli ti puts'el majlel ti' tojlel i yeran.#28.10-22 8Ti jim bʌ ora tsa' chʌmi Débora, jiñi tsa' bʌ i cʌnta Rebeca c'ʌlʌl che' alʌ to; tsa' mujqui ti ye'bal colem te' ya' ti' yentʌlal Bet-el, tsa' bʌ otsʌbenti i c'aba' ti “Alón-bacut.”#35.8 Alón-bacut: Jiñʌch colem te' ba' tsi' cha'leyob uq'uel.

9Dios tsi' cha' pʌsʌ i bʌ ti' tojlel Jacob che' bʌ woli i cha' sujtel tilel ti Padan-aram.#35.9 Padan-aram: Cha'añ ma' ch'ʌmben isujmlel, q'uele Gn 25.20 am bʌ ti nota. Tsi' yʌq'ue i yutslel i t'añ. 10Dios tsi' su'be:

“A c'aba' jiñʌch Jacob;

pero ma'añix mi caj a pejcʌntel ti Jacob,

mi caj a pejcʌntel ti Israel.”

Che'ʌch tsa' ochi i c'aba' ti Israel.#35.10 Q'uele jiñi nota am bʌ ti Gn 32.28, cha'añ ma' ch'ʌmben isujmlel. 11Che' ja'el Dios tsi' su'be:

“Joñoñʌch jiñi Dios Mach Bʌ Añic i P'isol i p'ʌtʌlel:

La' p'ojlic a walobilob;

la' ochiquet ti ñuc bʌ tejclum yic'ot la' loq'uicob ca'bʌl tejclum tac ti a tojlel,

yic'ot mi caj i loq'uel reyob tilemo' bʌ ti a p'olbal.

12Jiñi lum tsa' bʌ cʌq'ue Abraham yic'ot Isaac

mi caj cʌq'ueñet,

yic'ot mi caj cʌq'ueñob a p'olbal mu' bʌ caj i tilelob.”#Gn 17.4-8

13Che' bʌ tsa' letsi majlel Dios ti' tojlel Jacob ya' ba' tsi' pejca, 14che' jiñi Jacob tsi' wa'choco xajlel i yejtal cha'añ mi' chʌn ña'tʌntel ya' ba' tsi' pejca Dios; tsi' mulbe i pam jiñi xajlel ti vino yic'ot ti olivo aceite. 15Jacob tsi' yotsʌbe i c'aba' jiñi ajñibʌl ti Bet-el, ya' ba' tsi' pejca Dios.#Gn 28.18-19

Tsa' chʌmi Raquel

16Tsa' loq'uiyob ti Bet-el, tsa' cajiyob ti majlel, che' bʌ ñajt to añob cha'añ mi' c'otelob ti Efrata,#35.16 Efrata: Jiñʌch jump'ejl tejclum lʌc'ʌl bʌ ti Belén (Rt 1.2; 1 Sm 17.12). Raquel tsa' caji ti bajq'uel cha'añ i yalobil, wen wocol tsi' yu'bi. 17Che' woli ti bajq'uel Raquel, jiñi i co' alʌl tsi' su'be: “Mach a cha'len bʌq'uen, come mi caj a wʌc' ti pañimil yam bʌ ch'itoñ bʌ a walobil.” 18Che' bʌ woli' loq'uel i ch'ujlel, —come tsa' chʌmi Raquel—, tsi' yotsʌbe i c'aba' ti Benoni,#35.18 Benoni: Yom mi yʌl ti' t'añ hebreo: “Calobil tsa' bʌ i yila pañimil che' ch'ijiyemon.” pero i tat tsi' yotsʌbe i c'aba' ti Benjamín.#35.18 Benjamín: Yom mi yʌl ti' t'añ hebreo: “Calobil ñuc bʌ tic pusic'al.” Jiñʌch yom mi yʌl, mu' bʌ caj i ch'ʌm pejtelel i chu'bʌañ i tat.

19Che'ʌch tsa' chʌmi Raquel, tsa' mujqui ya' ti' bijlel Efrata, jiñʌch Belén. 20Jacob tsi' wa'choco xajlel ya' ti mucoñibʌl, jiñʌch i yejtal ba' mucul Raquel c'ʌlʌl wʌle.

21Israel tsa' loq'ui ya'i, tsi' wa'choco pisil bʌ i yotot ti junwejl Migdal Edar. 22Che' ya' chumul Israel ti ili lum, Rubén tsi' pi'le Bilha, i majan ijñam i tat; pero Israel tsi' yu'bi chuqui tsi' mele Rubén.

I yalobilob Jacob

(1 Cr 2.1-2)

Añ lajchʌntiquil ch'itoñ bʌ i yalobilob Jacob. 23I yalobilob Lea jiñobʌch: Rubén, jiñi ascuñʌl bʌ, Simeón, Leví, Judá, Isacar yic'ot Zabulón. 24I yalobilob Raquel jiñobʌch: José yic'ot Benjamín. 25I yalobilob Bilha, i criada Raquel, jiñobʌch: Dan yic'ot Neftalí. 26I yalobilob Zilpa, i criada Lea, jiñobʌch: Gad yic'ot Aser. Jiñobʌch i yalobilob Jacob tsa' bʌ i yilayob pañimil ti Padan-aram.

Tsa' chʌmi Isaac

27Jacob tsa' c'oti ba'añ Isaac i tat ya' ti Mamre, ya' ti tejclum i c'aba' Arba, jiñʌch Hebrón, ya' ba' tsa' chumleyob Abraham yic'ot Isaac. 28I ja'bilel Isaac che' bʌ tsa' chʌmi, jiñʌch bolonc'al (180) ja'b ti' pejtelel. 29Tsa' chʌmi Isaac che' wen ñoxix. Esaú yic'ot Jacob tsi' mucuyob i tat.#35.29 Tsi' mucuyob Isaac ya' ba' tsa' mujqui Abraham ya' ti lum i c'aba' Macpela (Gn 23.17-20; 49.30-31).

Sélection en cours:

Génesis 35: NTCH

Surbrillance

Copier