Génesis 16

Agar yic'ot Ismael

1Ma'añic i yalobil Sarai, i yijñam Abram; pero añ i criada i c'aba' Agar ch'oyol bʌ ti Egipto. 2Sarai tsi' su'be Abram:

—Woli a q'uel cha'añ lac Yum Dios tsi' yotsayon ti to'ol wa'al jach bʌ x'ixic; jiñi cha'añ ti wocol t'añ mic su'beñet, yom ma' pi'len jiñi criada c cha'añ, tic'ʌl mi' mejlel c taj calobil ti Agar.

Abram tsi' jac'be i t'añ Sarai.#16.2 Ti wajali mi' ña'tañob cha'añ jiñi x'ixic mach bʌ añic i yalobil, mi q'uejlel che' bajche' mach bʌ añix i c'ʌjñibal (1 Sm 1.10-11). Cha'añ mi' taj i ñuclel jiñi x'ixic, mi' mejlel i yʌq'ueñ i ñoxi'al juntiquil i criada cha'añ mi' pi'len cha'añ mi' taj i yalobil; ixcu i yalobil jiñi criada mi yotsan che' bajche' mero i yalobil (Gn 30.1-13). 3Che' lujump'ejlix ja'b chumul Abram ti' lumal Canaán, Sarai i yijñam Abram, tsi' pʌyʌ Agar i criada ch'oyol bʌ ti Egipto, tsi' yʌq'ue Abram i ñoxi'al cha'añ mi' pi'len. 4Abram tsi' pi'le Agar, tsa' caji i cʌntan i yalobil; pero che' ba' ora Agar tsi' ña'ta wolix i cʌntan i yalobil, tsa' caji i ts'a'len Sarai i yum.#1 Sm 1.6-7 5Jiñi cha'añ Sarai tsi' su'be Abram:

—¡La' ochic ti a wenta ili wocol woli bʌ cu'bin! Tsa' cʌq'ueyet j criada Agar cha'añ ma' pi'len, pero che' bʌ tsi' q'uele cʌntʌbilix i yalobil, tsa' caji i ts'a'leñon. ¡La' i melonla lac Yum!

6Abram tsi' jac'be Sarai:

—Awilan, a criada añʌch ti a wenta. Melben chuqui a wom.

Jiñi cha'añ Sarai tsʌts tsa' caji i pejcan Agar, jinto tsi' yʌc'ʌ ti ca'bʌl wocol; che' jiñi Agar tsa' puts'i loq'uel ti' tojlel Sarai.

7I yángel lac Yum tsi' taja Agar ba'añ cuxul bʌ ja' ti jochol bʌ lum, jiñi cuxul bʌ ja' am bʌ ti' bijlel Shur. 8Tsi' su'be:

—Agar, i criadajet bʌ Sarai, ¿baqui tsa' tiliyet? ¿Baqui ma' majlel?

Agar tsi' jac'be:

—Wolic puts'tan c yum Sarai.

9I yángel lac Yum tsi' su'be:

—Cha' cucu ba'añ a yum, ac'ʌ a bʌ ti' wenta.

10I yángel lac Yum tsi' cha' su'be:

—Mi caj c wen p'ojlesan a walobil,

jinto che' mach mejlix ti tsijquel.

11I yángel lac Yum tsi' cha' alʌ:

—Cʌntʌbil a walobil, mi caj a wʌc' ti pañimil juntiquil ch'itoñ,

mi caj a wotsʌben i c'aba' ti Ismael,#16.11 Ismael: Yom mi yʌl ti t'añ hebreo “Dios mi yu'bin lac t'añ.”

come lac Yum tsi' yu'bi a wocol.

12Wen jontol mi caj i pʌs i bʌ ili wiñic che' bajche' caballo maxto bʌ uts-esʌbilic,

mi caj i contrajin pejtelel wiñicob,

pejtelel wiñicob mi caj i contrajiñob ja'el;

tʌts'ʌl mi' caj ti chumtʌl ba'añ i pi'ʌlob.#16.12 Ili versículo mi' tsictesan che' bajche' mi caj i cha'leñob chumtʌl i p'olbal Ismael ya' ti jochol bʌ lum (Gn 25.16-18).

13Jiñi cha'añ Agar tsi' yotsʌbe i c'aba' lac Yum tsa' bʌ i pejca: “Jatetʌch jiñi Dios woli bʌ i q'uelon,” come tsi' yʌlʌ: “¿Mach ba tsa'ic q'uele jiñi woli bʌ i q'uelon?”#16.13 Pejtelel mu' bʌ i q'uel Dios, mi' chʌmel, che' bajche' mi laj q'uel ti Ex 33.20; Jue 6.22-23; 13.22; pero Agar ma'añic tsa' chʌmi. 14Jiñi cha'añ tsi' yotsʌbe i c'aba' jiñi pozo: “I pozo jiñi Cuxul bʌ mu' bʌ i q'uelon.”#16.14 Ti ili pozo tsa' c'oti ti chumtʌl Isaac (Gn 24.62; 25.11). Ili pozo xinlʌpʌl añ ti yojlil Cades#16.14 Cades: Q'uele Gn 14.7; Nm 13.26. yic'ot Bered.

15Agar tsi' yʌc'ʌ ti pañimil juntiquil ch'itoñ bʌ i yalobil Abram;#Gl 4.22 jiñi Abram tsi' yotsʌbe i c'aba' ti Ismael tsa' bʌ yʌc'ʌ ti pañimil Agar. 16Añix wʌcp'ejl i jo'c'al (86) i ja'bilel Abram che' bʌ tsi' yila pañimil Ismael tsa' bʌ i yʌc'ʌ ti pañimil Agar.

Sélection en cours:

Génesis 16: NTCH

Surbrillance

Copier