मत्ती 22
22
राजाए ओभत्यार
(लूका १४:१५-२४)
1येसुए नोर यारसिउ रँःद अइ लिद घर्ती तोबो झाःद याएक्यो, 2“स्वर्गताव राज्या ते तोबो राजा स्यासो लिज़्या। नोए खेपा ओज़ाए उबिह्याए जूँनी भत्यार जैद, 3ओनोकोररालाई नो भत्यारल हुन्या सोर ओरायोरालाई खुल्नाव यापरींक्यो दी। नो सोर दैवर झन हुव माभैंःकेर दी। 4है जैद फरी ब छुत ओनोकोररालाई खुल्द, ‘जे नो सोर दैवराए ल्योक फरी ब बाद, ‘राजाए जेजूँनी सोइव सोइव मारर सैःद ज़्याव भरी जैधुक्यो दी, जे काचाबुल ज़ बान्या दी,’ है यारादोनाचिके,’ लिद यापरींक्यो दी। 5नोर झन सोर माथैव मिताव जैसिद याय़ेन माऱास्द ख्वार याएँःदा, ख्वार बेपार दाना बाकेर दी। 6ख्वाराए झन नो क़िना बाव ओनोकोररालाई क्योःद बीज्यात जैद यारासैःकेर दी।
7“छींनी नो राजाए नो भरी थैद उरिस चोद उसिपाईंर परींद नो सैःज़्यावरालाई खदम जैद यानाखारलाई ब मेंः लैद याराएकेर दी। 8नकिन नो राजाए ओनोकोररालाई खुल्द, ‘भत्यार भरी जैसिधुके, नो सोर दैवर भत्यार ज़्यान्या स्यासोर माताकेर। 9है जैद जे येम जीदा बाद जो जोर जेरादैज़्या, हो होर ज़ भत्यारल यारारैच्यो,’ है दाद यापरींक्यो दी। 10है जैद नो ओनोकोरर येम जीदा बाद चाव माचाव यारादैव भरी दुप्द भत्यारल यारारैकेर दी। नोर राजाए उझ़िमल तसी ज़ ब्याल्केर दी।
11“नकिन राजा ओपाहुनारास दैसिना हुके दी। नल तोबोलाई बिह्यालाव क्वा माक्वाइसिउ रँःद, 12राजाए नोलाई, ‘ङानैं, बिह्यालाव क्वा माक्वाइसिद कै जैद आल नपसिहुव?’ है ओदोक ते, नो मिँ लोलोतोःव ज़ ताके दी। 13हाःत ज़ नो राजाए ओनोकोररालाई खुल्द, ‘आवलाई उखँ उकुइ किद लाँःकाव चुम चुमोल ख्यानाचिके। नल ओहार ङर ङर कैद चिर चिर क़िद गघर्क।’ ”
14येसुए नो घर्ती नत ज़ तुपैद, “हिताव ज़ खुल्सिउर कुधु ज़ लिज़्यार, छाँतिसिउर ते छ्या ज़ लिज़्यार,” है यादोक्यो।
माहाराजालाई सिर्मा यान्या सैं मायान्या
(मर्कूस १२:१३-१७; लूका २०:१९-२६)
15नो पाँर थैद फरिसीराए, “येसुए ओपाँ कान्नी क्योःद गेएके?” लिद गुमुस्ता दाद, 16यासिसर स़ोनो हेरोद राजासकावरालाई येसुए ल्योक यारापरींकेर। नोर ओल्योक बाद, “गुर्बा, नँ गेस नपाँज़्याव भरी साचो वाज़ लिज़्या। परमेस्वरए ल्योदा बान्या येम ब साचोस नपैसिज़्या। मिँ रँःद ब नमादोए, सुए ल्योदा ब नमाजैसिए। 17है जैद गेलाई तोबो पाँ है दाव ताके, माहाराजालाई गे सिर्मा यान्या सैं मायान्या?” है यादोक ते, 18येसुए नोराए याचाल सैंद, “ए कैफतीर, ङालाई काराव जेजाँचिनाज़्याव? 19सिर्मा फो·न्या पैसा ङालाई तोबो सतैंद्याँचिके,” है ओरादोक ते, पैसा रैदिकेर। 20येसुए फरी, “आत सुए उसुरूप, सुए उमिन उलिज़्याव?” है ओरादोक ते, 21“माहाराजाए उमीं ज़,” है दोकेर। नकिन येसुए, “हो ची ताकिन्दा माहाराजाए उमीं भरी माहाराजालाई ज़ एच्यो, परमेस्वरए उमीं भरी परमेस्वरलाई ज़ एच्यो,” है ओरादोक ते, 22नोर अचम्ब ताद नोलाई ऱास्द बाकेर।
सदुकीराए यापाँ
(मर्कूस १२:१८-२७; लूका २०:२७-४०)
23नकिन हो छ्याम ज़ सदुकीर ब येसुए ल्योक तोबो पाँ है दोहुकेर। सदुकी है यारादोज़्यावराए ‘सिउकिन सैंसिन्या माताए’ है यालिज़्याव। 24है जैद नोराए, “गुर्बा, मोसाए ओकानुनल तोबो अइ लिद सर्सिउ लिज़्या, ‘तोबोए ज्या दाद ज़ार मादैद उसिकिन, ओभाइए ओदाज्युए ओथोर माफ्या·न्याए जूँनी ओमारूमलाई ओरैवक।’#ब्य २५:५ 25किताव गेस तोबोए ओज़ार सात भाइ याल्यो। यादाज्युए ज्या दाद ज़ार मादैद ज़ सिके। ओज़ार यामाल्योए ओज्या ओभाइलाई ख्यानैदिक्यो। 26फरी होए उधूँलावए नो ओमारूमलाई रैद नो मनी ज़ार मादैद ज़ सिके। नकिन साइँला मनी हिताव ज़ ताके। नितावनी ज़ नो मेंमालाई सात भाइए ज़ रैकेर। नोर प़ाइँ ज़ार मादैद ज़ सिकेर। 27प़ाइँरानी छींनी नो मेंमा ब सिके। 28है जैद नो मेंमा सात भाइए याज्या ओतावए अजम्बरी जुनील काताकावए याज्या तान्या?” है लिकेर।
29हाःत ज़ येसुए, “जे धर्मसास्त्रलाव पाँ मातीद परमेस्वरए ओसक्ती ब जेमाथ·रैधुवए ज़ चबनै बिरैद जेनै। 30अजम्बरी जुनील सुए ज़ ज्या ब मादोर, रे ब मादोर। प़ाइँ ज़ स्वर्गताव चाकर्या स्यासोर ताज़्यार। 31है जैद जे ‘सिउकिन सैंसिन्या माताए’ है ल्यो पैंज़्यावर आव धर्मसास्त्रलाव परमेस्वरए ओपाँव पाँ थैचिके, 32‘ङा अब्राहामए ओपरमेस्वर, इसहाकए ओपरमेस्वर स़ोनो याकूबए ओपरमेस्वर ज़।’#प्रस ३:६ है जैद मोरोराए यापरमेस्वर माःक, जींदो तावराए यापरमेस्वर ची,” है लिद यासथैक्यो। 33नक लिज़्याव माहोल्यार येसुए ओपाँ थैद अचम्ब ताकेर।
प़ाइँरानी दान्या य़ेन
(मर्कूस १२:२८-३४; लूका १०:२५-२८)
34येसुए सदुकीरालाई थाम थुम ओराख्याव थैद नक लिज़्याव फरिसीर दुप्सिद, 35कानुनलाव तोबो यागुर्बालाई येसुलाई जाँचिना परींकेर। नोए येसुलाई, 36“गुर्बा, कानुन भरिरानी प़ाइँरानी दान्या काताकाव उलिज़्याव?” है ओदोक ते, 37येसुए, “ ‘जेयुँलाई आदा होदा मादुलैद, जेर्सा माम़ोंद, जेप्रभु परमेस्वरए ल्योदा युँ थू जैद ओललाई वाज़ मया दान्या।’#ब्य ६:५ 38प़ाइँरानी ङ़ात दान्या य़ेन नो ज़। 39होए उधूँलाव य़ेन ब हो मिताव ज़, ‘जेक्याँलाई किताव जेसमारिज़्या, छुतलाई ब हिताव ज़ समारिन्या।’#लेबी १९:१८ 40मोसाए ओकानुन भरी स़ोनो अगमबक्ताराए यासरो भरी ब आव ऩेब्लोत थोम्सिज़्या,” है दोक्यो।
ख्रीस दाऊद राजाकिन घेप्पा लिज़्या
(मर्कूस १२:३५-३७; लूका २०:४१-४४)
41नकिन नो दुप्सिद लिज़्याव फरिसीरालाई येसुए, “जे ङालाई है दाँचिके, 42ख्रीस सुए ओथोलाव ओताज़्याव है जेलिज़्या?” है ओरादोक ते, “दाऊदए ओथोलाव ज़,” है दोकेर। 43येसुए फरी, “दाऊदए ओथोलाव वाज़ ओताकिन कै जैद धर्मसास्त्रल ओल दाऊदए मनी परमेस्वरए उपुरूसनी ओपाँक ख्रीसलाई ‘ङाप्रभु ज़’ है ओदोज़्याव? नो धर्मसास्त्रलाव ओपाँव आव ज़,
44‘परमेस्वरए ङाप्रभुलाई,
‘नसुतुररालाई नखँ धूँल झाःद ङामाईंवा पै,
ङावोर्दा च़ुसिद लिन्के,’ है दोक्यो।’#भज ११०:१
45है जैद ओल दाऊदए ब ख्रीसलाई ‘ङाप्रभु ज़’ है ओदोकिन नो कै जैद दाऊदए ओथोल वाज़ उगनिसिज़्याव?” है ओरादोक ते, 46येसुस सु ज़ मापाँधुकेर। हो छ्यामकिन ज़ सुए ज़ येसुस पाँन्या आँत मादोकेर।
Sélection en cours:
मत्ती 22: NKham
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2015, Wycliffe Bible Translators, Inc. All rights reserved.
