मत्ती 18
18
घेप्पा जैसिन्या पाँ
(मर्कूस ९:३३-३७; लूका ९:४६-४८)
1हो बेलाक ज़ येसुए उसिसर ओल्योक हुद, “स्वर्गताव राज्याल प़ाइँरानी घेप्पा सु गेलिज़्याव?” है यादोक ते, 2येसुए तोबो ज़िम्ज़ा ल़ुज़ालाई रैद याङ़ाक सच्याँद, 3“जेलाई साचो है ङादाचिज़्या, जे जेयुँर त़ोद ल़ुज़ा मिताव जेमातावा पै स्वर्गताव राज्याल पसिउ दैन्या जेमाले। 4जो आव ल़ुज़ा मिताव मासघ्योःसिद सज़िम्सिज़्या, हो ज़ स्वर्गताव राज्याल घेप्पा ताज़्या। 5फरी जोए ङामिनत आव मिताव ज़िम्ज़ारालाई यासुम्ज़्याव, होए ङालाई ब सुम्नाज़्याव। 6फरी जोए आव मिताव ङालाई यायुँ हुबो ज़िम्ज़ारालाई पापल ओरापारैकिन, नितावलाई ते बुरू ओधेंल राँथै सुर्द्याद समुन्द्रल ख्यान्या पाथ लिज़्या। 7पापल पारैज़्याव पाँराए जूँनी आव मानुवालाई थैए माँतकन ज़ लिज़्या। निताव पाँर ते जुनी ब हुन्या ज़ लेर, खाली निताव पाँर पले·ज़्यावलाई थैए माँतकन ज़ लिज़्या।”
मिँलाई बले·ज़्याव खँ कुइ
(मर्कूस ९:४२-४८)
8“नखँए तादी ब नकुइए तादी ब माचावल ओपारैनिकिन च़म्द ख्याके। नो नखँ नकुइए माजिप्तिन्या मेंःल ख्याव ओदोज़्याव देखा बुरू अजम्बरी जुनील थूँद्यासो पसिन्या पाथ लिज़्या। 9हो मिताव ज़ नमीए माचावल ओपारैनिकिन, नो नमीलाई कोला·द ख्याके। नो नमीए नर्गलाव मेंःल ख्याव ओदोज़्याव देखा बुरू परमेस्वरए ओराज्याल काना ताद पसिन्या पाथ लिज़्या। 10है जैद जे आव मिताव ज़िम्ज़ारालाई सुए ज़ तारासोच्यो। नोरालाई समारिज़्याव परमेस्वरए ओचाकर्यार एकतार ज़ स्वर्गताव परमेस्वर ङाबाबुए ओङ़ाक ज़ लिज़्यार,” है यादोक्यो।
ङोइव बेधाए ओघर्ती
(लूका १५:३-७)
11[“है जैद ङा मिँ मिन्सिद हुवए म़ाव ङोइवरालाई साप्द परमेस्वरए ल्योदा लाँन्याए जूँनी ङाहुव ज़।] 12जे कै जेलिज़्या? तोबोए ओबेधार तसय यालिकिन ननी तोबो फातिद ओङोइकिन नो उनान्सयरालाई बनल ज़ ख्यानैद नो ङोइवलाई खिम्नाज़्याखेहो सानी। 13ङा साचो है ङादाचिज़्या, नोलाई ओदैकिन नो माङोइव उनान्सयराकिन नो तोबोए ल्योदा झन उयुँ होलाँ ताद रेंज़्या। 14हो मिताव ज़ स्वर्गताव जेबाबुए ब इताव ज़िम्ज़ा तादी ब ‘तँदा बाद ताङोइक’ लिद उयुँ थू जैज़्याव।”
मादान्या दाज़्याव नैं
15“तोबो ननैंए मादान्या ओदोज़्याव नरँःकिन ङ़ादा नोलाई अलगज़ा ओखत सतैंदियो। नोए नपाँ थैद ओभैंःकिन नोलाई नबाँचैव मिताव ज़ ताके। 16फरी नोए नपाँ थैव ओमाभैंःकिन छुतर ब तोबो ऩेब्लो बाद सम्जैव ताके। धर्मसास्त्रल ब नोए उजूँनी इताव सर्सिउ लिज़्या, ‘छुतए ओङ़ैताव पाँ ऩेब्लो स़ोम्लोए यासाची ओखैकिन नो पाँ ज़ थ॰रिउ ताज़्या।’#ब्य १९:१५ 17नोए नोराए यापाँ ब ओमाभैंःकिन नोलाई परमेस्वरए उमिनताव भरिराए ङ़ाक ज़ है दाव ताके। नोराए यापाँ ब ओमाभैंःकिन नो मिँलाई परमेस्वरकिन तँदाङावरासकाव स़ोनो सिर्मा स्यो·ज़्यावरासकाव गनिउ ताके। 18है जैद ङा जेलाई साचो है ङादाचिज़्या, जे आव मानुवात जो जेथ·रैज़्या, स्वर्गत ब हो ज़ थ॰रिन्या ले। फरी, आव मानुवात जो य़ेन मादान्या जेथ·रैज़्या, स्वर्गत मनी हिताव ज़ थ॰रिन्या ले। 19फरी ङा जेलाई है ङादाचिज़्या, आव मानुवात ऩेब्लोए वाज़ तयुँ जैद काताराए जूँनी जेपोंखारिकिन, नो जेपाँ स्वर्गताव ङाबाबुए सयो·द्यान्या ले। 20है जैद जोक तादी ब ङामिनत ऩेब्लोकिन यादा जेदुप्सिकिन ङा ब जेस ज़ ङातारिज़्या।”
ओनैंलाई उयुँ मानाज़्याव
21नकिन पत्रुस येसुए ल्योक बाद, “प्रभु, तोबोए ङाउपर्त मादान्या ओदोकिन, नोलाई ङा खापाला ऱास्न्या, सात पाला सैं खापाला?” है ओदोक ते, 22येसुए, “ङा नँलाई सात पाला वाज़ है ङामादींए। नोकिन झन सत्तरी दोबोर सात पाला ऱासो ताके है ङादींज़्या।
23“है जैद स्वर्गताव राज्या तोबो राजाए ओनोकोररास हिसाप ओसखैज़्याव मिताव लिज़्या। 24नो राजाए निताव हिसाप ओसखैज़्याक तोबोए ओलाँव दस हजार सुनए सिक्कालाव तुम्सुक पुलुस्के दी। नोए उरिन ओमाफो·धुवए राजाए ओय़ेन दाज़्यावराए ओललाई ज़ राजाए ल्योक रैकेर दी। 25राजाए नोरालाई, ‘आवलाई ओज्या ओज़ारास स़ोनो ओलसकाव लिज़्याव भरी यो·द तादी ब जुनी ब सयो·द रैचिके,’ है यादोक्यो दी। 26नो नोकोरए आव थैद राजाए उखँत फुलुप्सिद, ‘जेरो प्रभु, ङालाई नयुँ ओनाक, छ्यावा पै कींनाके। तछा जुनी ब ङाफो·या ज़,’ है ओदोक ते, 27नो राजाए उयुँ नाद उतुम्सुक चीद्याद अइज़ ऱास्क्यो दी। 28नो नोकोर ते झन ननी पुलुस्द बाद, ओलस य़ेन दाज़्याव तोबो ओनैंए ल्योक तसय चाँदीए सिक्का ओकाछ थाँनाक्यो दी। नोलाई ओधेंनी क्योःद, ‘ङाकाछ नमाफो·रिज़्या?’ है ओदोक ते, 29नो ओनैं उखँत फुलुप्सिद, ‘जेरो ङानैं, ङालाई नयुँ ओनाक। छ्यावा पै कींनाके, तछा प़ाइँ ज़ ङायाँ,’ है ओदोक ते, 30माभैंःद, ‘हुकी नमासयो·वा पै झ्यालखानाल ल्यो ताके’ लिद झ्यालखानाल झाःक्यो दी।
31“ओनैंलाई नै ओजैव राजाए ओय़ेन दाज़्यावराए रँःद यायुँ बनै नाद राजाए ल्योक पैंनाकेर दी। 32नो पाँ थैद राजाए नो ओऱासो नोकोरलाई खुल्द, ‘ए हरामी, नँ ङास बिन्ती नदोक नङ़ैताव रिन भरी ख्याद ङाईंके। 33ङा किताव नँलाई ङायुँ नाद ङाऱास्निउ, नँ कै जैद नो नँस य़ेन दोज़्याव ननैंलाई नयुँ नाद नमाऱासो?’ है दाद, 34नो राजा रसिद ओऱासो रिन भरी फरी ब सुघुर्द प़ाइँ ओमाफो·वा पै झ्यालखानालाव हाकिमए उकुइत सूँपिक्यो दी। 35है जैद ङा जेलाई साचो है ङादाचिज़्या, हो मिताव ज़ स्वर्गताव ङाबाबुए मनी जे जेउपर्त मादान्या दोज़्यावलाई जेयुँल नैद जेमाऱास्किन जेलाई मनी हिताव ज़ जैचिरिज़्याव।”
Sélection en cours:
मत्ती 18: NKham
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2015, Wycliffe Bible Translators, Inc. All rights reserved.
