Matthew 4

Jisua'n methêmna a tongna

(Mk 1:12-13; Luk 4:1-13)

1Male Jisua hah Diabol methêma a om rangin Ratha'n ramchâra a tuong zoi.#Heb 2:18; 4:15 2Sûn sômminli jân sômminli sâk sâkloiin a om suolechu Jisua hah a vonchâm zoia. 3Hanchu Diabol a honga, a kôm, “Pathien Nâipasal ni nîn chu, hi lungngei hih vâipôl chang rangin chongpêk roh,” a tia.

4Hannirese, Jisua'n a kôm han, “Pathien Lekhabu'n Miriem hi vâipôl korongin ring no nia, Pathien bâia chong hongsuokin kêng an a ring rang ani,”#Bal 8:3 tiin a thuona.

5Hanchu Diabol'n Jisua hah, Khopuilien Inthieng Jerusalema a tuonga, Biekin sîpinsângtaka a mindinga, 6male a kôm, “Pathien Nâipasal ni nîn chu nangma nethenin inchôm inla, Pathien Lekhabu'n ati anghan:#Lap 91:11-12

‘Nu chungroia chu Pathien'n a vântîrtonngei chongpêk ngei a ta;

an kutngei leh nang lei modong an tih,

masikin ne kengei luo khom lunga nên sûi loina rangin,’ ” a tia.

7Jisua'n a kôm, “Aniatachu Pathien Lekhabu'n, Pumapa na Pathien minsin no roh, ti khom ânziek sa,”#Bal 6:16 tiin a thuona.

8Male, Diabol hah muol insângtaka a tuonga rammuola rêngramngei murdi le an roiinpuinangei a min mua. 9A kôm, “khûkinbilin chubai mi ni mûkin chu hi ngei murdi hih nang pêk let ki tih,” a ti pea.

10Male Jisua'n a kôm, “Soitan, rotpai roh! Pathien Lekhabu'n, ‘Pumapa na Pathien vai chubaimûk inla, ama sin vai tho roh a ti!’” #Bal 6:13 tiin a thuona. 11Masuole chu Diabol'n Jisua a mâka; male vântîrtonngei an juonga, ama an juong san zoi.

Galilee rama Jisua sintho a phutna roi

(Mk 1:14-15; Luk 4:14-15)

12Jisua'n, John an sûr ti a riet lechu, Galilee rama a thengpata.#Mat 14:3; Mk 6:17; Luk 3:19-20 13Nazareth a mâka, Capernaum khopuia ava om zoia, mahah Galilee Dîl pang Zebulun le Naphtali ramhuola om ani.#Joh 2:12 14Mahi dêipu Isaiah lei ti hah ahongtung adikna ranga ani:

15“Zebulun ram le Naphtali ram,#Isa 9:1-2

tuipui panna lampuia, Jordan râl kângkhat tieng,

Galilee, Jentailngei ram!

16Ijîng nuoia om mingei han

vâr roiinpuitak mûng an ta.

Thina ram ijîng nuoia omngei chunga han

vâr hah hong êl atih.”

17Ma zora renga hah Jisua'n, “Nin nunsienangei renga inhei ta roi, Invân Rêngram hih anâi zoi sikin!”#Mat 3:2 tiin thurchi misîr a phut kelen zoi.

Jisua'n ngasûrpungei minli a koi

(Mk 1:16-20; Luk 5:1-11)

18Jisua'n Galilee dîl pang rûla a chai anghan ngasûrpungei lâibungsa inik a mu ngeia, Simon (Peter an ti) le anâipa Andrew, dîla lên leh nga an sûra. 19Jisua'n an kôm, “Ko kôm hong ungla, miriem sûrna chang nangni minchu ki tih,” a tipe ngeia. 20Voikhat rengin an lênngei an mâkraka, an jûi kelen zoi.

21Ava se nôk uol vietin chu lâibungsa adang, Zebedee nâipasalngei Jacob le John ava mu ngei nôka. Anni ngei hah an pa Zebedee leh an rukuong sûnga an lei oma, an lênngei an lei sina. Jisua'n a koi ngeia, 22male voikhat rengin rukuong le an pa mâkrakin, an jûi kelen zoi.

Jisua minchuna, thurchi misîrna, le mindamna ngei

(Luk 6:17-19)

23Jisua'n Galilee ram pumpuia a sea, synagog in sûng ngeia a minchua, Rêngram Thurchi Sa a misira, mingei lâia natna le damloina jât tamtak a mindama.#Mat 9:35; Mk 1:39 24Ama chungroi hah Syria ram pumpuia ânthang zoia, masikin mingei han damloi murdi, natna jât tamtak le intaknangei renga an hong tuong ngeia: ramkhori sûrngei, risangol inveingei, phalkhatthi ngei, hah Jisua'n a lei mindam ngei pak ani. 25Galilee ram le Khopui Sôm ngei renga, Jerusalem renga, Judea ram renga le Jordan râla ramngei renga mipui tamtak ama an jûi zoi ani.

Sélection en cours:

Matthew 4: SAKNT

Surbrillance

Copier