GÉNESIS 7
7
Unuq millp'usqan
1Señor Diostaq Noeta nirqan:
—Tuyuq wasiman haykuy llapa familiaykipiwan, qantan kay wiñay-masiykikuna ukhupi chaninta rikuyki. 2Lliw sacrificana animalmanta qanchis orqota qanchis chinatawan haykuchinki, mana sacrificana animalkunamantataq iskaytakama, orqotawan chinatawan. 3Hinallataq phalaq animalkunamantapas qanchis orqota qanchis chinatawan. Chaytaqa ruwanki kay pachantinpi sapanka t'aqa ama tukukunanpaq. 4Qanchis p'unchaymantataq ñoqa kay pachaman parachimusaq tawa chunka p'unchayta tawa chunka tutatawan, hinan hayk'an kawsaq ruwasqayta kay pachamanta ch'usaqyachisaq, nispa.
5Hinaqtinmi Noeqa Señor Diospa tukuy kamachisqanman hina ruwarqan.
6Noé soqta pachak watayoq kashaqtintaq unuqa kay pachata millp'urqan. 7Noetaq tuyuq wasiman warmintin haykurqan, hinallataq paywan kuska churinkunapas warmintinkama, millp'uq unumanta ayqenankupaq haykurqanku. 8Sacrificana animalkunamanta mana sacrificana animalkunamantapas, phalaq animalkunamantapas lliw pampanta suchuqkunamantapas, 9orqontin chinantin, iskay-iskaymanta Noewan tuyuq wasiman haykurqanku, Noeta Diospa kamachisqanman hina.
10Qanchis p'unchaymantataq millp'uq unu kay pachata millp'urqan. 11Soqta pachak watayoq Noé kashaqtintaq, iskaykaq killapi, chunka qanchisniyoq p'unchaypi manchay chinkay-chinkay ukhumanta llapa pukyukuna t'oqyarqan, hanaq pacha phawchikunapas kicharikamurqan, 12hinaqtinmi kay pachapi sinchita pararqan tawa chunka p'unchayta tawa chunka tutatawan. 13Chay kikin p'unchaypin Noeqa tuyuq wasiman haykurqan, hinallataq churinkunapas Sem, Kam, Jafet, Noepa warminpas, churinkunaq kinsantin warminkunapas. 14Paykunawan llapa salqa animalkuna, uywakuna, pampanta llapa suchuqkuna, llapa phalaq animalkuna, llapa phalaq kurukunapas, t'aqankuman hina haykurqanku. 15-16Noepa kasqan tuyuq wasimantaq llapa animalkuna chinantin orqontinkama haykurqanku Diospa payta kamachisqanman hina. Señor Diostaq payta wisq'aykapurqan.
17Millp'uq unutaq kay pachapi tawa chunkantin p'unchayta p'ampasharqan, unun askhayaspa chay wasita hoqarirqan, hinan kay pachapi tuyurqan. 18Unutaq kay pachapi sinchitapuni hunt'aykusharqan, hinan unu patapi chay wasiqa tuyusharqan. 19Unutaq sinchitapuni wichasharqan, kay pachantinpi llapa hatuchachaq orqokunapas millp'usqan karqan. 20Orqokunata millp'usqanmantapas qanchis metrotawanraq unu wicharqan. 21Lliw kawsaqmi kay pachapi wañurqan, phalaq animalkuna, uywakuna, animalkuna, pampanta llapa suchuqkuna, llapa runapas. 22Llapa samayniyoq hayk'an hallp'a pachapi kawsaqmi wañurqan. 23Ahinatan Diosqa kay pachamanta lliw kawsaqta ch'usaqyachirqan, runatapas animalkunatapas, pampanta suchuqkunatapas, phalaq animalkunatapas. Noé sapallanmi qheparqan, paywan tuyuq wasipi kaqkunapiwan. 24Unutaq kay pachapi qocharayarqan pachak phisqa chunkayoq p'unchayta.
Sélection en cours:
GÉNESIS 7: QC88
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Biblia en Quechua de Cuzco © Sociedades Bíblicas Unidas, 1988.
