GÉNESIS 3

Runaq Diosta mana kasukusqan

1Mach'aqwayqa yuyaysapan karqan Apu Señor Diospa ruwasqan llapan salqa animalkunamanta, hinan warmita nirqan:

—¡Ahá! ¿Dioschu nirqasunkichis: Aman mikhunkichischu huertapi llapa sach'a ruruta, nispa? nispan.

2Warmitaq mach'aqwayman kutichirqan:

—Huertapi sach'akunaq ruruntaqa atiykun mikhuyta, 3huerta chawpipi kaq sach'a rurullata manaqa, Diosmi niwarqanku: Aman chaytaqa mikhunkichischu, amallataq llamiykunkichispaschu, mana chayqa wañunkichismi, nispa, nispan.

4Hinaqtinmi mach'aqwayqa warmita nirqan:

—Manapunin wañunkichischu. 5Diosqa yachanmi chayta mikhuqtiykichis hina ñawiykichis kicharikunanta, hinaspa Dios hina allinkaqta mana allinkaqta reqsiq kanaykichista, nispa.

6Hinan warmiqa repararqan sach'a ruruqa mikhunapaq sumaq kasqanta, munayllaña kasqanta, yachayniyoq kanapaq munapayana kasqantapas. P'itispataq mikhuykurqan. Hinaspan qosanmanpas haywarirqan, hinan paypas mikhuykullarqantaq. 7Hinaqtinmi iskayninkuq ñawinqa kicharikurqan, hinaspan reparanakurqanku q'alalla kasqankuta. Hinan higos raphita siraspanku p'istunakunata ruwakurqanku.

8Hinaspanmi tarde kinray wayrarimuyta Apu Señor Diospa huertapi purishasqanta uyarirqanku, hinan Apu Señor Diospa qayllanmanta warmi-qhari huerta sach'a-sach'api pakakurqanku. 9Apu Señor Diostaq qharita waqyaspa nirqan:

—¿Maypin kashanki? nispa.

10Paytaq kutichirqan:

—Huertapi purishasqaykita uyarispan manchakurqani q'alalla kasqayrayku, chaymi pakakurqani, nispa.

11Diostaq tapurqan:

—¿Pin willarqasunki q'alalla kasqaykita? ¿Hark'arqayki chay sach'a rurutachu mikhurqanki? nispa.

12Qharitaq kutichirqan:

—Kawsaysiwananpaq qowasqayki warmin sach'a ruruta qowarqan, hinan mikhurqani, nispa.

13Hinaqtinmi Apu Señor Diosqa warmita nirqan:

—¿Imatan ruwarqanki? nispa.

Warmitaq nirqan:

—Mach'aqwaymi q'otuwarqan, hinan mikhurqani, nispa.

14Hinan Apu Señor Diosqa mach'aqwayta nirqan:

—Kayta ruwasqaykiraykun ñakasqa kanki

uywakuna ukhupi, lliw salqa animalkuna ukhupipas.

Lliw kawsasqayki p'unchaypin suchuspa purinki,

ñut'u hallp'atan hak'unki.

15Qantawan warmitawantaq cheqninachisqaykichis,

mirayniykitawanpas paypa miraynintawanpas,

mirayninmi umaykipi t'ustusunki,

qantaq talonninpi kaninki, nispa.

16Warmitataq nirqan:

—Ancha nanaywanmi wiksallikunki,

nanaywanmi wawakunata wachakunki.

Qosaykitataq munanki, paytaq kamachisunki, nispa.

17Qharitataq nirqan:

—Warmiykita kasusqaykirayku,

hark'arqayki chay sach'a ruruta mikhusqaykiraykupiwan,

qan hawa hallp'aqa ñakasqa kanqa,

sayk'uywanmi hallp'ata ruruchinki,

chaytan tukuy kawsasqayki p'unchay mikhunki.

18Khiskakunan kisakunan wiñapusunki,

k'ita q'omerkunatataq mikhunki.

19Hump'iykita hich'arispan mikhunata tarinki

ruwasqa kasqayki hallp'aman tukunaykikama,

ñut'u hallp'an kanki,

ñut'u hallp'amantaq tukupunki, nispa.

20Qharitaq warminta suticharqan Evata, #Hebreo rimaypin “Eva” sutiqa “kawsaq” niq simiman rikch'akun. payqa llapa kawsaqkunaq maman kasqanrayku. 21Apu Señor Diostaq qharipaq warmipaqwan qara p'achata ruwapurqan, hinaspan paykunata p'achaykachirqan. 22Hinaspan nirqan:

—Kayqa, qhariqa hukninchis hinan kapun allinkaqta mana allinkaqta yachaspa. Kunanqa, paqtan makinta haywarispa kawsachiq sach'a ruruta p'itinman, mikhuspataq wiñaypaq kawsanman, nispa.

23Chaymi Apu Señor Diosqa Edén huertamanta payta wikch'umurqan hallp'ata llank'ananpaq, chay hallp'amantan payqa ruwasqa karqan. 24Qharita qarqomuspantaq, Edén huertaq inti lloqsimuy kinrayninpi churarqan raphrayoqkunata, tukuyneqman wach'iq nina espadatapas, kawsachiq sach'aman ñanta hark'ananpaq.

Sélection en cours:

GÉNESIS 3: QC88

Surbrillance

Copier